قر پرەمەر-ءمينيسترى ءاليحان سمايىلوۆ «24KZ» تەلەارناسىنا بەرگەن سۇحباتىندا قازاقستاندا وتكەن جىلى ىسكە اسىرىلعان ماڭىزدى جوبالار تۋرالى ايتتى.

«ءبىرىنشى كەزەكتە قازاقستانعا ستراتەگيالىق ماڭىزدى اكتيۆ – قاراعاندى مەتاللۋرگيا كومبيناتىنىڭ قايتارىلۋىن اتاپ كورسەتكەن ءجون. وتكەن جىلدىڭ جەلتوقسان ايىنان باستاپ ءبىز وسى كومپانيانىڭ شەتەلدىك مەنشىك يەسىمەن كۇردەلى كەلىسسوزدەر جۇرگىزدىك جانە ينۆەستيتسيالىق يميدجگە نۇقسان كەلتىرمەي، ەل ءۇشىن ءتيىمدى شارتتار نەگىزىندە كەلىسىمدى اياقتادىق»، — دەدى پرەمەر-مينيستر.

ۇكىمەت باسشىنىڭ ايتۋىنشا، ەندىگى كەزەكتە Qarmet جاڭا ينۆەستورىنىڭ الدىندا الداعى 3-4 جىلدا كاسىپورىنعا كەمىندە $3ملرد جەكە ينۆەستيتسيا سالۋ مىندەتى تۇر، ونىڭ ىشىندە $1,3 ملرد قاراجات كەلەر جىلى باعىتتالۋى ءتيىس.

پرەمەر-مينيستر سونداي-اق بيىل «استراحان-ماڭعىشلاق» سۋ قۇبىرىن جاڭعىرتۋ اياقتالعانىن اتاپ ءوتتى. جوبا اتىراۋ جانە ماڭعىستاۋ وبلىستارىنىڭ تۇرعىندارىن اۋىز سۋمەن قامتاماسىز ەتۋ ماسەلەسىن شەشۋگە كومەكتەسەدى.

باتىس ەنەرگيا تورابىندا جاڭا ەلەكتر جەلىلەرى سالىندى. وسىلايشا، قازاقستاننىڭ بۇكىل باتىس ايماعىنىڭ تۇتىنۋشىلارىن ەنەرگيا قۋاتىمەن قامتاماسىز ەتۋ ەداۋىر ارتتى. بۇل – ەنەرگەتيكالىق قاۋىپسىزدىك ءۇشىن دە، ەل ەكونوميكاسىنىڭ دامۋى ءۇشىن دە ماڭىزدى.

«ەڭ كۇردەلى جوبالاردىڭ ءبىرى – ۇلكەن الماتى اينالما جولى ء(ۇاااج) اياقتالدى. ونىڭ اشىلۋى ءترافيتى ازايتۋعا جانە مەگاپوليستەگى ەكولوگيالىق جاعدايدى جاقسارتۋعا، سونداي-اق جۇك تاسىمالداۋ الەۋەتىن كەڭەيتۋگە مۇمكىندىك بەرەدى»، — دەپ اتاپ ءوتتى ءاليحان سمايىلوۆ.

سونىمەن قاتار استانادا جەو-3 ءبىرىنشى كەزەگى، سونداي-اق جاڭا «وڭتۇستىك-شىعىس» جانە «تۇران» گاز جىلۋ ستانتسيالارىنىڭ قۇرىلىسى اياقتالدى. بۇل نىساندار استانانى تۇگەلدەي جىلۋمەن جابدىقتاۋعا مۇمكىندىك بەرەدى.

باتىس قازاقستان وبلىسىندا «روجكوۆسكوە» ءىرى گاز كوندەنساتى كەن ورنى ونەركاسىپتىك پايدالانۋعا بەرىلدى. ول جىلىنا شامامەن 1 ملرد تەكشە مەتر گاز جانە 500 مىڭ توننا كوندەنسات كوزى بولادى.

«بۇدان باسقا قىزىلوردا جانە اقتوبە وبلىستارىندا تاعى ەكى كەن ورنى پايدالانۋعا بەرىلدى. ولار – “وڭتۇستىك اقساي” جانە “شىعىس ورىكتاۋ” كەن ورىندارى. ورتا مەرزىمدى پەرسپەكتيۆادا اقتوبە، اتىراۋ جانە ماڭعىستاۋ وبلىستارىندا تاعى ءۇش كەن ورنى ىسكە قوسىلادى دەپ كۇتىلۋدە»، — دەپ اتاپ ءوتتى پرەمەر-مينيستر.

سونىمەن قاتار بيىل ۇزىندىعى 300 كم اساتىن «بەينەۋ-جاڭاوزەن» ماگيسترالدىق گاز قۇبىرى ىسكە قوسىلدى. سونىڭ ناتيجەسىندە ماڭعىستاۋدا تۇراقتى گازبەن جابدىقتاۋ ماسەلەسى شەشىلدى.

«ءبىز ەلدىڭ شىعىسى مەن وڭتۇستىگىندە ۇزىندىعى 1300 كم اساتىن ءتورت ستراتەگيالىق ماڭىزى بار تەمىرجول جەلىلەرى قۇرىلىسىن باستادىق. جالپى، مەن كەيبىر ماڭىزدى جوبالاردى عانا اتاپ ءوتتىم. ءىس جۇزىندە مۇنداي رەسپۋبليكالىق جانە وڭىرلىك ماڭىزى بار جوبالار وتە كوپ. ءبىز ولاردى ىسكە اسىرۋ بويىنشا جۇمىستى جالعاستىرامىز»، — دەپ قورىتىندىلادى ءاليحان سمايىلوۆ.

Abai.kz