وسكەمەن قالالىق پوليتسيا باسقارماسى اكىمشىلىك پوليتسيا ءبولىمىنىڭ باستىعى قاماۋعا الىندى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تىلەۋكەنوۆ حابارلادى. 

«شىعىس قازاقستان وبلىسىنىڭ سىبايلاس جەمقورلىققا قارسى قىزمەتى ۇقك دەپارتامەنتىمەن ءوزارا ءىس-قيمىل جاساي وتىرىپ، جاسىرىن تەرگەۋ ارەكەتتەرىنىڭ ناتيجەسىندە وسكەمەن قالالىق پوليتسيا باسقارماسى اكىمشىلىك پوليتسيا ءبولىمىنىڭ لاۋازىمدى تۇلعالارى مەن باسقا دا ادامداردىڭ جەمقورلىق ارەكەتتەرىن اشكەرەلەدى. مامانداندىرىلعان تۇراقتاردان اۆتوكولىك قۇرالدارىن بەرۋ كەزىندە جۇيەلى تۇردە پارا الۋ فاكتىسىمەن اكىمشىلىك پوليتسيا ءبولىمىنىڭ باستىعى سوت سانكتسياسىمەن قاماۋعا الىندى. قازىرگى ۋاقىتتا سوتقا دەيىنگى تەرگەۋ اياقتالۋ ساتىسىندا»، - دەدى ارمان تىلەۋكەنوۆ ۆەدومستۆودا وتكەن بريفينگىدە.

ونىڭ اتاپ وتۋىنشە، قىلمىستىق-پروتسەستىك كودەكستىڭ 201-بابىنا سايكەس، وزگە اقپارات جاريا ەتۋگە جاتپايدى.

«كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى»، - دەدى ول.

فوتو: tengrinews.kz

Abai.kz