ەسكى قازاقستاننىڭ وكىلدەرى ماعاۋيننىڭ سۇحباتىن ەستىگەن دە، ەلەگەن دە جوق. ەسەسىنە، توقاەۆتىڭ "ەگەمەنگە" شىققان ەتەكتەي ماقالاسى ەسكى گۆارديانىڭ تاراپىنان مۇقيات سينتەزدەلىپ، تەرەڭ اناليز جاسالۋدا. DALA INSIDE-قا جەتكەن مالىمەت بويىنشا نازارباەۆ كلانى "سۇحباتتىڭ سالدارى قانداي بولادى؟" دەگەن ساۋالدىڭ توڭىرەگىندە ويلانىپ تولعانۋدا.

ءدۇيىم ەلدى دۇرلىكتىرگەن ماقالادا توقاەۆ قاڭتار وقيعاسىنىڭ تاساسىندا نازارباەۆتىڭ جاقتاستارى تۇرعانىن مويىنداعان.

وسىناۋ تراگەدياعا تريگگەر بولعان ساياسي شەشىمدى كىمدەر قابىلداعانىن (شارىپباەۆ & قۇلىباەۆ) تۇسپالداپ وتكەن. بەكەتاەۆ، بايبەك، ءماسىموۆ سىندى ەكس-پرەزيدەنتتىڭ شابارماندارى اقوردا مەن كىتاپحاناعا الما-كەزەك كىرىپ، ءسوز تاسىعانىن، مۇنىڭ سوڭى مەملەكەتتىڭ شاڭىراعىن شايقالتا جازداعانىن جاسىرماي ايتقان. بۇدان تۋاتىن لوگيكالىق ساۋال: ءوزى بوساتقان ورىندى ءوزى تارتىپ الماق بولعان ءارى مەمتوڭكەرىس جاساۋعا تالپىنعان نازارباەۆ جاۋاپقا تارتىلۋى مۇمكىن بە؟ ەكس-پرەزيدەنتتىڭ ەت جاقىندارى مەن سەنىمدى سەرىكتەرى تۇنەۋكۇنگى سۇحباتتىڭ پەرسپەكتيۆاسىنان، ياعني، ۇزاق مەرزىمدى قاۋىپ-قاتەرىنەن سەسكەنۋدە.

DALA INSIDE-قا ءمالىم بولعانداي جەلتوقساننىڭ قاق ورتاسىندا كەنەتتەن ماسكەۋگە جول جۇرگەن نازارباەۆ كرەمل كوسەمىنە ساتىبالدى مەن سامات ءابىشتىڭ ماسەلەسىنەن بولەك، "قاڭتار وقيعاسى قايتالانار بولسا، توقاەۆقا ارا تۇسپەۋ..." تۋرالى بۇيىمتايىن جەتكىزگەن.

ءپۇتىن بۇل ۇسىنىستى قابىل الدى ما، جوق پا ول جاعى جۇمباق. DALA INSIDE نازارباەۆتان كەيىن اراعا اپتا سالىپ پەتەربورعا اتتانعان كەمەلۇلىنىڭ ءجۇزى جۇدەۋ، كوڭىلى الدەنەگە الاڭ ەكەنىن اڭداعان ەدى. سول جولعى جيىندا پۇتىننەن اۋلاق جۇرۋگە تىرىسقانىن دا نازارباەۆ ساپارىنىڭ تابىمەن بايلانىستىرعان ەدىك.

قالاي بولعان كۇندە ەسكى قازاقستان ەسە جىبەرگىسى جوق. نازارباەۆ جاقتاستارى "ەگەمەنگە" شىققان ماقالاعا جاۋاپ دايىنداپ جاتىر. ەسكى گۆارديا قاڭتار 2.0 قايتالانعانىن قالايدى.

ال جاڭا قازاقستاننىڭ قولىنداعى جالعىز كوزىر - ءماسىموۆتىڭ ساياسي ەففەكتىسى السىرەي باستادى. حالىق ءبارىنىڭ ارتىندا تۇرعان "باستى كەيىپكەردى" سۇق ساۋساعىمەن كورسەتۋدە. ءابىشۇلى؟ ەكس-پرەزيدەنت ءالى تالاي دۇنيەنى بىلىقتىرادى.

Abai.kz