«تويدىڭ بولعانىنان بولادىسى قىزىق» دەگەندەي، اپتا باسىندا ماسكەۋدە بوي كورسەتكەن امەريكانىڭ رەسەيشىل ءجۋرناليسى تاكەر كارلسون رەسەي پرەزيدەنتى پۋتيننەن سۇحبات العانىن، كوپ وتپەي ءوزىنىڭ «ح» (بۇرىنعى تۆيتتەر) رەسۋرسىنداعى پاراقشاسىندا جاريالايتىنىن مالىمدەگەنى سول، وعان قىزىعۋشىلىق تانىتقاندار سانى 100 ميلليونعا جۋىقتاعان.

رەسۋرس قوجايىنى يلون ماسك تە سۇقباتتىڭ ارنادا كەدەرگىسىز جاريالاناتىنىن ايتىپ، قولداۋ بىلدىرگەن.

ءدۇبىرى جەر جارعان اتالمىش سۇحبات بۇگىن جارىق كوردى. كرەملدىڭ ءباسپاسوز حاتشىسى پەسكوۆ رەسەيدە تۆيتتەرگە تىيىم سالىنعاندىقتان سۇحباتتىڭ كرەملدىڭ رەسمي سايتىندا اعىلشىن جانە ورىس، ەكى تىلدە جاريالاناتىنىن ايتقان ەدى. ەكەۋارا اڭگىمە ەكى ساعاتقا سوزىلعان.

ەركىن كوسىلگەن پۋتين: «باتىس ەلدەرىنىڭ بۇل رەتكى سوعىستا ءبىزدىڭ جەڭەتىنىمىزگە كوزدەرى جەتتى. سول ۇشىندە ولار جاڭا باعىت ىزدەپ جاتىر»، - دەگەن.

ول سونداي-اق سوعىستى ءورشىتۋ ويى جوق ەكەنىن، پولشا رەسەيگە سوعىس اشسا عانا ولارعا قارۋ قولداناتىنىن، بالتىق ەلدەرىنە تىپتەن قىزىقپايتىنىن جەتكىزگەن. قىتايمەن ارا قاتىناسىنا دا توقتالىپ، قىتايدىڭ قۇداي تاڭداپ بەرگەن كورشىسى ەكەنىن، عاسىرلاردان بەرى ارالاسىپ كەلە جاتقانىن العا تارتىپ، قىتايمەن وداقتاستى دەۋدىڭ قيسىنسىز ەكەنىن دالەلدەۋگە تىرىسقان. قىتايمەن ەۋرووداقتىڭ ساۋداسىنىڭ رەسەيدەن كولەمدى ەكەنىن، اقش-تا دا قىتاي كومپانيالارىنىڭ كوپ ەكەنىن العا تارتقان.

كارلسون ورىس اسكەرى ۋكرايناعا باسىپ كىرگەن ەكى جىلدان بەرى پۋتيننەن سۇحبات العان العاشقى باتىس ءجۋرناليسى بولعانىمەن، وسى جولعى سۇحباتى ءۇشىن ۇلكەن بوداۋ بەرەيىن دەپ تۇر.

ەۋروپارلامەنت وعان سانكتسيا سالۋدى قاراستىرىپ جاتىر. «سوعىس قىلمىسكەرى» اتانىپ، حالىقارالىق ىزدەۋ جاريالانعان ديكتاتوردان سۇحبات الۋ – ءفاشيزدى دارىپتەۋ»، - دەيدى بەلسەندى دەپۋتاتتار مەن اقش مەديا ماگناتتارى.

كارلسون بىلتىر ءساۋىردىڭ 24-كۇنى رەسيشىل بولعانى ءۇشىن «فوكس» تەلەارناسىنان جۇمىستان قۋىلعان ەدى. وتكەن قىركۇيەك ايىندا پۋتيننەن سۇحبات الۋعا اق ءۇيدىڭ اكىمشىلىك كەدەرگىلەر جاساپ وتىرعانىن ايتىپ سۇحبات بەرگەن ەدى.

ونىڭ وسى جولعى رەسەي باسشىسىمەن بولعان سۇحباتىنا امەريكانىڭ بۇرىنعى مەملەكەت ىستەر حاتشىسى حيلاري كلينتون دا اشىنىپ ونى يتكە تەڭەپ: «ءپۋتيننىڭ ۋكراينا تۋرالى وتىرىگىن جارنامالاعان، قولجاۋلىق بولعان ارامتاماق»، - دەپ ايىپتاعان.

كارلسوننىڭ ايتىلىپ جاتقان سىندارعا دايىن ءۋاجى بار. ونىڭ سوزىنشە الەمدىك گەوساياساتتى، ەكونوميكانى باسقا ارناعا بۇرعان سوعىس باستالعالى بەرى امەريكانىڭ الپاۋىت باسىلىمدارى زەلەنسكيدى عانا باتىر ەتىپ كورسەتىپ، بىرجاقتى مايدان ۇستانىپ كەلەدى ەكەن. قاراپايىم اقش ازاماتتارى ەكى ەل اراسىندا نە بولىپ جاتقانىنان مۇلدە بەيحابار. ءوزى سول ولقىلىقتى تولتىرعىسى كەلەدى. ول پۋتيننەن بولەك، زەلەنسكيگە دە سۇحبات بەرۋگە ۇسىنىس جاساعانىن ايتۋدا.

ەسبول ۇسەنۇلى

Abai.kz