قازاق ساحنا ونەرiن الەمدiك دەڭگەيگە كوتەرىپ، مارتەبەسiن اسپانداتقان، ساحنالىق شەشiمدەرiنiڭ تەرەڭدiگiمەن جاڭاشىل رەجيسسەر اتانعان ونەر تارلانى بولات ماناشۇلى اتاباەۆتىڭ بىرەگەي قويىلىمى، اتى اڭىزعا اينالعان «ماڭگىلىك بالا بەينە» قالپىنا كەلتىرىلىپ، كورەرمەنىنە تاعى ءبىر مارتە جول تارتتى.

سپەكتاكلدە ادامزات الەمىنىڭ بۇگىنگى تاعدىر-بەينەسى، مودەلى اتومدىق ەكسپەريمەنتتىڭ وبەكتىسى بولعان قاراۋىل اۋىلى ءومىرىنىڭ اششى اقيقاتى – مۇگەدەك قىز ءلايلا جانە ونىڭ الەۋمەتتىك ورتاسى ارقىلى زەردەلەنەدى.

قاراۋىلدىڭ ادامگەرشىلىك بارومەترى، تابيعي رۋح ساۋلەسى ءلايلا ەدى. وعان ءوز ەركىمەن ومىردەن باز كەشتىرگەن اتوم عانا ەمەس، ادامدار دا. سپەكتاكل فينالىندا ءلايلا-سۇلۋلىقتىڭ دارعا اسىلعانىن كورەسىز. ادامدار سۇلۋلىقتى ءولتىردى، دەمەك ءوز تامىرىنا بالتا شاپتى. ءلايلا ءولدى – قاراۋىل ءولدى. قاراۋىل ءولدى – قازاق ءولدى... بولاشاق بار ما، جوق پا؟! وسى ءبىر اششى اقيقات سانالارىنا ۇرعان قاراۋىلدىقتاردىڭ فينالداعى مۋزىكا، رەكۆيەم-حور (كارل ورفف) اتموسفەراسىنداعى جانتالاسى عانا ءۇمىت وتىن سەبەزدەتەدى.

نەگىزگى يدەياسى: شىعارما ءبىر عانا ءلايلانىڭ ءومىرىن مىسالعا الا وتىرىپ، سەمەي پوليگونىنىڭ ەلگە تيگىزگەن زاردابىن، ءومىر قيىندىقتارىن، بارعا قاناعات ەتۋ كەرەكتىگىن كورسەتەدى. سول كەزدەگى حالىق ءومىرى دە باياندالعان. ادام مىنەزىنىڭ ءارتۇرلى بولاتىندىعىن تۇسىندىرەدى، وزگەنىڭ ومىرىنە كۇلە قاراماي، تۇسىنىستىك تانىتۋعا شاقىرادى.

«ماڭگىلىك بالا بەينە» - اتوم سىناقتاردان زارداپ شەككەن پوليگون قۇرباندارىنىڭ عانا ءومىرىن ەمەس، كۇللى ادامزاتتىڭ قاسىرەتىن بەينەلەيتىن شىعارما. ەكولوگيالىق تاقىرىپقا وزگەشە ءوڭ بەرىپ، كوركەمدىك ىزدەنىستەرىمەن تولىقتىرىلعان بۇل قويىلىمنىڭ كوزدەيتىنى جەكەلەگەن ادامداردىڭ ومىرلىك قۇندىلىقتارى تۋرالى وزىندىك كوزقاراس پوزيتسياسىنان قوعامعا زەر سالۋ.

قويىلىم توبى:

قويۋشى-رەجيسسەر                                    - ب. اتاباەۆ

قايتا ساحنالاۋشى رەجيسسەر                   - ە. نۇرسۇلتان

قويۋشى-سۋرەتشى                                      - ە. تۇياقوۆ

رەجيسسەردىڭ كومەكشىسى                           - س.گەنياروۆا

Abai.kz