«قازگيدرومەت» رمك 2024 جىلعى سۋ تاسقىنى بويىنشا نەگىزگى بولجامدارىن جاريالاپ، سۋ تاسقىنى قاۋپى بارىن ەسكەرتتى.

«قازگيدرومەت» رمك وڭدەگەن «NASA» سپۋتنيكتەرىنىڭ جەردى قاشىقتان زوندتاۋ سۋرەتتەرى بويىنشا 2024 جىلعى 1 ناۋرىزداعى جاعدايعا سايكەس، قازاقستاننىڭ 72% اۋماعىندا قار جابىنى بار. جاۋىن-شاشىن مولشەرىن، قارداعى سۋ قورىن، توپىراقتىڭ كۇزگى ىلعالدىعى كورسەتكىشتەرىن، توپىراقتىڭ قاتۋ تەرەڭدىگىن، سونداي-اق وزەندەردىڭ مۇز رەجيمدەرىن تالداي وتىرىپ، سۋ تاسقىنى قاۋىپتى ايماقتارعا الدىن-الا باعا بەرىلدى، - دەلىنگەن «قازگيدرومەت» رمك حابارلاماسىندا.

بولجام گيدرومەتەورولوگيالىق باقىلاۋلار مەن ولشەۋ دەرەكتەرىنە سايكەس جاسالدى.

سۋ تاسقىنى قاۋپى جوعارى وڭىرلەردەن اباي، اقمولا، اقتوبە، الماتى، شىعىس قازاقستان، باتىس قازاقستان، قاراعاندى، قوستاناي، سولتۇستىك قازاقستان جانە جەتىسۋ وبلىستارى كوش باستاپ تۇرسا، ماڭعىستاۋ وبلىسىندا سۋ تاسقىنى قاۋپى جوق.

ال ورتا قاۋىپتەگى وڭىرلەر – اتىراۋ، جامبىل، قىزىلوردا، پاۆلودار، تۇركىستان جانە ۇلىتاۋ وبلىستارى.

Abai.kz