پارلامەنت ءماجىلىسىنىڭ توراعاسى ەرلان قوشانوۆ باستاعان دەپۋتاتتار دەلەگاتسياسى ماسكەۋگە كەلدى. رەسەي استاناسىندا فەدەرالدىق جينالىس مەملەكەتتىك دۋماسىنىڭ توراعاسى ۆياچەسلاۆ ۆولودينمەن جانە فەدەرالدىق جينالىس فەدەراتسيا كەڭەسىنىڭ توراعاسى ۆالەنتينا ماتۆيەنكومەن كەزدەسۋلەر ءوتتى.

ساپار بارىسىندا ەرلان قوشانوۆ مەملەكەتتىك دۋمانىڭ توراعاسى ۆياچەسلاۆ ۆولودينمەن ەكىجاقتى ىنتىماقتاستىق ماسەلەلەرىن تالقىلادى. ول رەسەي قازاقستان ءۇشىن ءاردايىم سەنىمدى وداقتاس، ستراتەگيالىق ارىپتەس، تاتۋ كورشى ەكەنىن جانە سولاي بولىپ قالا بەرەتىنىن اتاپ ءوتتى.

سۋرەتتى تۇسىرگەن ت.تانىباەۆ.

ەلدەرىمىز اراسىندا سەنىمدى ساياسي ديالوگ جولعا قويىلعان. تىعىز ەكونوميكالىق جانە مادەني-گۋمانيتارلىق بايلانىس ورناپ، بەرىك شارتتىق-قۇقىقتىق بازا قالىپتاسقان. جىل وتكەن سايىن بۇل قارىم-قاتىناستار تەك نىعايىپ كەلەدى. كوشباسشىلارىمىز قاسىم-جومارت توقاەۆ پەن ۆلاديمير پۋتين ولاردى دامۋدىڭ جاڭا دەڭگەيىنە كوتەردى، – دەدى ءماجىلىس سپيكەرى.

سۋرەتتى تۇسىرگەن ت.تانىباەۆ.

ەرلان قوشانوۆ ءماجىلىستىڭ مەملەكەتتىك دۋمامەن ءوزارا ءىس-قيمىلدى ودان ءارى نىعايتۋعا زور ءمان بەرەتىنىنە توقتالىپ، ۆياچەسلاۆ ءۆولوديندى قازاقستانعا رەسمي ساپارمەن كەلۋگە شاقىردى.

بۇگىندە ەكى ەل پارلامەنتشىلەرى دوستىق توپتارى، ءارتۇرلى حالىقارالىق جانە ايماقتىق ۇيىم اياسىندا بەلسەندى ىنتىماقتاستىقتا جۇمىس ىستەپ كەلەدى. زاڭ شىعارۋ ماسەلەلەرى بويىنشا تاجىريبە الماسادى. ءماجىلىس سپيكەرى رەسەي مەن قازاقستان شەكاراسىنداعى وتاندىق جۇك تاسىمالداۋشىلاردىڭ پروبلەمالارىن جەدەل شەشۋ پارلامەنت دەپۋتاتتارى اراسىنداعى ءوزارا ءىس-قيمىلدىڭ ناقتى ناتيجەلەرىنىڭ ءبىرى ەكەنىن ايتتى.

سۋرەتتى تۇسىرگەن ت.تانىباەۆ.

سونداي-اق توراعا وڭىرارالىق جانە ەكونوميكالىق بايلانىستىڭ كەلەشەگى جونىندە ءسوز قوزعادى. الەمدەگى ەڭ ۇزاق شەكارا قازاقستان مەن رەسەي اراسىندا ەكەنىن، قازاقستاننىڭ 8 وبلىسى رەسەيدىڭ 12 ايماعىمەن شەكتەسەتىنىن اتاپ ءوتتى. تاۋار اينالىمىنىڭ شامامەن 70 پايىزى وڭىرارالىق جانە شەكارالىق ساۋداعا تيەسىلى. مۇندا دا ساۋدا قاتىناستارىن كەڭەيتۋ مەن وندىرىستىك كووپەراتسيانى نىعايتۋ ءۇشىن الەۋەت زور.

سۋرەتتى تۇسىرگەن ت.تانىباەۆ.

سونىمەن قاتار سپيكەرلەر مادەنيەت پەن ءبىلىم بەرۋ سالاسىنداعى ىنتىماقتاستىقتىڭ ماڭىزدىلىعىنا نازار اۋداردى. ەرلان قوشانوۆ بۇگىندە قازاقستاندا رەسەيلىك جوعارى وقۋ ورىندارىنىڭ التى فيليالى جۇمىس ىستەيتىنىن ايتتى.

– سوڭعى جىلدارى بىزدە ينجەنەرلىك-تەحنيكالىق سالاداعى ماماندارعا سۇرانىس جوعارى. سوندىقتان مەملەكەت باسشىسى ەلىمىزدە تەحنيكالىق ماماندىقتار بويىنشا شەتەلدىك جەتەكشى جوعارى وقۋ ورىندارىنىڭ فيليالدارىن اشۋدى تاپسىردى. بۇل تۇرعىدا ءبىز جەتەكشى رەسەيلىك جوعارى وقۋ ورىندارىمەن جۇمىس ىستەۋگە نيەتتىمىز، – دەدى ءماجىلىس توراعاسى.

كەزدەسۋدى قورىتىندىلاي كەلە دەپۋتاتتار پارلامەنتارالىق ىنتىماقتاستىقتى كەڭەيتۋ جانە ەكىجاقتى قارىم-قاتىناستى نىعايتۋ جونىندەگى جۇمىستى ارتتىرۋ تۋرالى ۋاعدالاستى.

سونداي-اق رەسمي ساپار اياسىندا ءماجىلىس سپيكەرى رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ توراعاسى ۆالەنتينا ماتۆيەنكومەن كەزدەستى.

سۋرەتتى تۇسىرگەن ت.تانىباەۆ.

ەرلان قوشانوۆ ارىپتەسىنە مەملەكەت باسشىسىنىڭ باستاماسىمەن قازاقستانداعى ماڭىزدى وزگەرىستەر تۋرالى ايتتى.

– بىلتىر وتكەن كونستيتۋتسيالىق رەفورماعا بايلانىستى زاڭنامامىزدى ايتارلىقتاي جاڭارتتىق. ءبىز ەلىمىزدىڭ كونستيتۋتسيالىق زاڭدارىنا بىرقاتار ماڭىزدى تۇزەتۋ ەنگىزدىك. ءماجىلىس العاشقىلاردىڭ ءبىرى بولىپ «ۇلتتىق قور – بالالارعا» زاڭىن قابىلدادى. ول زاڭ قازىر قولدانىستا. جاڭا بيۋدجەت، سالىق، سۋ، قۇرىلىس كودەكستەرىمەن جۇمىس باستالدى، – دەدى ەرلان قوشانوۆ.

ءماجىلىس سپيكەرى رەسەيلىك سەناتورلارعا كۇزدە سانكت-پەتەربۋرگتە وتەتىن ءتورتىنشى ەۋرازيالىق ايەلدەر فورۋمىنا تابىس تىلەدى.

ءوز كەزەگىندە ۆالەنتينا ماتۆيەنكو قازاقستان مەن رەسەي پارلامەنتتەرىن بارلىق ماسەلە بويىنشا بەرىك دوستىق پەن ءوزارا تۇسىنىستىك بايلانىستىراتىنىن اتاپ ءوتتى. فەدەرالدىق جينالىس باسشىسى قازاقستان دەپۋتاتتارىنىڭ زاڭنامالىق باستامالارىنا قولداۋ ءبىلدىرىپ، وسى باعىتتا بەلسەندى تۇردە تاجىريبە الماسۋدى ۇسىندى.

ءماجىلىس توراعاسىنىڭ رەسمي ساپارى ودان ءارى كازان قالاسىندا جالعاسادى. وندا ەرلان قوشانوۆ تاتارستان رەسپۋبليكاسىنىڭ باسشىسى رۋستام ميننيحانوۆپەن جانە رەسپۋبليكا مەملەكەتتىك كەڭەسىنىڭ توراعاسى فاريد مۋحامەتشينمەن كەزدەسۋلەر وتكىزەدى.

Abai.kz