قازاق ءۇمىتىن ارقالاعان Airbus 330 ءۇشىن باكۋ باعىتى سوڭعى ەكى جىلدا ءجيى باراتىن تانىس تروتۋارعا اينالدى. اۋە لاينەرىنىڭ كومانديرى باكۋ دەسە گەيدار اليەۆ اتىنداعى اۋەجايعا كوزدى جۇمىپ قونا الاتىنداي جاعدايعا جەتىپ وتىر.

باتۋدان باكۋعا دەيىن

2022 جىلدىڭ اقپان ايىنان كەيىن ەۋروپاعا رەسەي ارقىلى شىعار جول تارىلا باستاعاندىقتان الەمدىك تاۋار تىزبەگىنىڭ تاڭداۋى قازاقستانعا، ال قازاق ەلىنىڭ تاڭداۋى ازىربايجانعا تۇسكەنى جاسىرىن ەمەس. زانگەزۋر ءدالىزى رەتتەلسە، ۇلكەن تۇران كوريدورى: قازاقستان-ءازىربايجان-تۇركيا باعىتى قىتاي مەن وڭتۇستىك-شىعىس ازيا تاۋارلارىن ەۋروپاعا ەڭ تەز جانە قاۋىپسىز جەتكىزە الاتىن جول ستاتۋسىن الادى. وسى ورايدا، اتالعان ءۇش ەلدىڭ ۇندەستىگى اسا ماڭىزدى. جانە وسى ۇندەستىك 2024 جىلى ودان سايىن كۇشەيمەك. انكارا باتىستا، استانا شىعىستا، ارامىزدا باكۋ تۇر. كاسپي جاعاسىنداعى اسەم قالاداعى كوڭىل-كۇيلەر ءبىز ءۇشىن اسا ماڭىزدى. وندا بىزگە دەگەن ىقىلاس جاقسى ەكەنىن بىلەمىز. سەبەبى ءبىزدىڭ مەملەكەت باسشىسى شىعىس ديپلوماتياسىنىڭ وزىق تاجىريبەسى اياسىندا 2022-2023 جىلدارى وسى كوڭىل-كۇيدىڭ تۇراقتى بولۋىنا بار ەرىك-جىگەرىن جۇمساعان ەدى.

مەملەكەتارالىق كەڭەس: تاۋدىڭ ەڭ بيىك نۇكتەسى

قاسىم-جومارت توقاەۆ ساپار بارىسىندا الدىمەن ءازىربايجان پرەزيدەنتى يلحام اليەۆپەن كەلىسسوز جۇرگىزىپ، قازاقستان مەن ازەربايجاننىڭ جوعارى مەملەكەتارالىق كەڭەسىنىڭ العاشقى وتىرىسىنا قاتىستى. كەلىسسوز بارىسىندا تاراپتار ەكى ەل ءۇشىن ماڭىزى بار ءبىرشاما سالالارعا توقتالدى. اتاپ ايتقاندا، ساۋدا-ەكونوميكالىق، كولىك-ترانزيتتىك، ەنەرگەتيكالىق، مادەني-گۋمانيتارلىق ىنتىماقتاستىق، سونداي-اق تسيفرلاندىرۋ، ازىق-تۇلىك قاۋىپسىزدىگى مەن جاڭارتىلاتىن ەنەرگيا كوزدەرى سالالارىنداعى ىقپالداستىق ماسەلەلەرىن تالقىلادى. سونداي-اق ينۆەستيتسيالىق جوبالاردى ىسكە اسىرۋ جۇمىستارى دا قاراستىرىلدى.

ميللياردقا قاشان جەتەمىز؟

2020 جىلى استانا-باكۋ اراسىنداعى تاۋار اينالىمى 100 ميلليون دوللار ەدى. 2023 جىلى 500 ميلليونعا جەتتى. 2026 جىلعا دەيىن ميلليارد دوللار اسۋىن باعىندىرۋعا ابدەن بولادى.

اليەۆ قازاقتارعا ريزا. قاراباق سوعىسىنان كەيىن ءبىز فيزۋلي قالاسىندا قۇرمانعازى اتىنداعى بالالار شىعارماشىلىعى ورتالىعىن سالىپ بەردىك. قازىر ول جەرگىلىكتى حالىق جاقسى پايدالانىپ جۇرگەن نىسان بولدى.

بتد + اقتاۋ: ەندى قارا تەڭىزدەگى داۋىلدان قورىقپايمىز با؟

وسى ساپار اياسىنداعى مىقتى كەلىسىم ءبىزدىڭ قازمۇنايگاز مەن ءازىربايجان قازمۇنايگازى - SOCAR اراسىنداعى قۇجات ەدى. تاراپتار اقتاۋ – باكۋ – تبيليسي – جەيحان باعىتى بويىنشا تاسىمالداناتىن قازاقستان مۇنايىنىڭ كولەمىن جىلىنا 2,2 ميلليون تونناعا ۇلعايتپاق. باكۋ ءبىز ءۇشىن تاسىمالداۋ ءتاريفىن تومەندەتەدى جانە "باكۋ – سۋپسا" مۇناي قۇبىرىندا قوسىمشا ورىن بەرەدى. ودان بولەك SOCAR-دى بىزدەگى گەولوگيالىق بارلاۋعا شاقىردىق. گاز، نە مۇناي تاۋىپ بەرسە، ولارعا دا جاقسى شارتتار بولادى. ال ءبىز ازىربايجانداعى مۇناي وڭدەۋ زاۋىتتارىنا ەسىك اشىپ وتىرمىز. وسىلايشا كاسپيدىڭ ارعى جاعىندا رۋمىنياداعى زاۋىتتان بولەك قوسىمشا وڭدەۋ قۋاتتارىنا قول جەتكىزەمىز.

باكۋ 2024 ساپارى وتە جايلى ءوتتى. ناتيجەلەرى اۋقىمدى. ونىڭ جەمىسىن 2025 جىلدارى كورە باستايمىز.

ايبار ولجاەۆتىڭ جەلىدەگى جازباسى

Abai.kz