ادامزات بالاسىنا  ەرتەدەن تانىس سىبايلاس جەمقورلىق – زامانمەن بىرگە ءوسىپ-وركەندەپ، نەبىر تەگەۋرىندى قارسىلىقتارعا توتەپ بەرىپ، قايدا مول قاراجات، پايدا بولسا، سول جەرگە تامىر جايىپ، بۇگىنگە دەيىن جويىلماي وتىرعان قاۋىپتى كەسەلدىڭ ءبىرى. باسقا دامۋشى ەلدەر سياقتى، ءبىزدىڭ جاس مەملەكەتىمىزدى دە جەگى قۇرتتاي بۇل كەسەل اينالىپ وتكەن جوق.

مەملەكەت باسشىسى ق.ك. توقاەۆ سىبايلاس جەمقورلىقپەن ىمىراسىز كۇرەسۋ مەملەكەتتىك ساياساتتاعى نەگىزگى باسىمدىلىقتاردىڭ ءبىرى ەكەنىن اتاپ وتكەن بولاتىن.  زاڭ ۇستەمدىگىن ورناتىپ، ناعىز قۇقىقتىق مەملەكەت قۇرۋ ءۇشىن، ەڭ الدىمەن، جەمقورلىقتىڭ تامىرىنا بالتا شابۋ قاجەت.

ۇلتتىق قاۋىپسىزدىك پەن قوعامدىق تۇراقتىلىققا تونگەن قاتەر رەتىندە سىبايلاس جەمقورلىققا قارسى كۇرەس جونىندەگى جالپىۇلتتىق كەشەندى باعدارلامانى دايەكتى تۇردە جۇزەگە اسىرىپ، سىبايلاس جەمقورلىق تۋرالى  قوعامنىڭ بارلىق مۇشەلەرىنە، جەمقورلىقپەن كۇرەس جالپى بارشا حالىقتىڭ بورىشى ەكەنىن ناسيحاتتاۋ مىندەتىمىز. «سىبايلاس جەمقورلىققا قارسى كۇرەس تۋرالى» زاڭ قابىلدانعاننان بەرى توعىز جىلدىڭ ىشىندە، سىبايلاس جەمقورلىققا قارسى ءىس-ارەكەتتەر دايەكتىلىكپەن جۇزەگە اسىرىلۋدا.

بۇگىندە الماتى قالاسى بويىنشا مەملەكەتتىك كىرىستەر دەپارتامەنتىندە وسى باعىتتاعى شارالار مەن كوكەيتەستى ماسەلەلەردى شەشۋدە زاڭدىلىقتى جەتىلدىرۋ جۇمىستارى تۇراقتى تۇردە جۇرگىزىلىپ كەلەدى. اتاپ ايتقاندا، الماتى قالاسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى، ادەپ جونىندەگى ۋاكىل – زاڭعار اسقارۇلى شىندالي جەرگىلىكتى تۇرعىندارمەن، كاسىپكەرلەرمەن دەپارتامەنتتە ءار اپتا سايىن جەكە قابىلداۋ جۇرگىزىپ وتىرادى. وسى تۇستا، وسىنداي بىرقاتار قابىلدانعان كەشەندى شارالار ناتيجەسىندە سىبايلاس جەمقورلىق كورنىستەرىنىڭ ازايۋى بايقالادى. ودان بولەك، زاڭعار اسقارۇلى الماتى قالاسى بويىنشا مەملەكەتتىك كىرىستەر باسقارمالارىنا جانە شاھارىمىزداعى كەدەن بەكەتتەرىنە ءىس ساپارمەن شىعىپ،  اۋداندىق كىرىستەر باسقارمالارى مەن كەدەن بەكەتتەرىنىڭ قىزمەتكەرلەرىمەن كەزدەسىپ وتىرادى. ءار توقسان سايىن وتكىزىلىپ وتىراتىن جيىندا، سىبايلاس جەمقورلىقتىڭ ءجيى بوي كورسەتەتىن، ەڭ قاۋىپتى ءتۇرى – پاراقورلىق تۋرالى تاقىرىپتار ءجيى كوتەرىلىپ وتىرادى. ءبىرىنشى كەزەكتە پارا بەرۋدىڭ سەبەپتەرى، پارا الۋدىڭ جاعدايلارى،  تۇپ-تامىرىن جويۋ ءۇشىن قوعام بولىپ بەلسەندىلىك تانىتۋ تۋرالدى ماسەلەسى كەڭ قاراستىرىلادى. «مەملەكەتتىك كىرىستەر قىزمەتكەرلەرىنە پارا بەرۋ دە، پارا الۋ دا پايدالى بولمايتىنداي، ۇلكەن قىلمىس رەتىندە سانالاتىنداي جاعداي، قوعامدىق سانا قالىپتاسۋى قاجەت. ارينە، سىبايلاس جەمقورلىق سىلىپ تاستايتىن سىرتقى جارا ەمەس، بۇل تامىرىن تەرەڭگە جايعان، وزگە ساۋ ورگاندارىن شىرماپ، تىنىس-تىرشىلىگىن تارىلتاتىن، ءسويتىپ ولاردىڭ تولىققاندى قىزمەت ەتۋىنە قاتەر توندىرەتىن قاۋىپتى كەسەل. ونى ەمدەمەس بۇرىن اۋرۋدىڭ پايدا بولۋ، دامۋ، تارالۋ جولدارىن ءبىلىپ، دەرتتىڭ قوزۋىنا قولايلى جاعداي تۋىنا جول بەرمەۋ كەرەك. ول ءۇشىن بۇل اۋرۋعا قوعام بولىپ قارسى تۇرۋىمىز قاجەت. ياعني بۇقارا كوپشىلىك تاراپىنان سىبايلاس جەمقورلىق كورىنىستەرىنە قولدان كەلگەنشە توسقاۋىل قويىلىپ، قولىندا بيلىگى بار ازاماتتار وسى جولدا وزگەلەرگە ۇلگى بولۋى ءتيىس. سوندا عانا حالىق سەنىمىنىڭ ۇدەسىنەن شىعاتىنىمىز ءسوزسىز. سىبايلاس جەمقورلىق قىلمىستاردىڭ بەلگىسىمەن ءىس قوزعاۋدىڭ ءبىر نەگىزى – ازاماتتاردىڭ ارىزى. ءاربىر ازامات ءوزىنىڭ كونستيتۋتسيالىق قۇقىعىن قورعاۋعا مىندەتتى، قانداي دا بولماسىن «قولى دا، جولى دا ۇزىن» ادامدار ازاماتتاردىڭ قۇقىعىن تاپتاپ، زاڭسىز ارەكەتتەرگە باراتىن بولسا، ادىلدىكتى ورناتۋشى قۇقىق قورعاۋ ورگاندارى. «تۋرا بيدە تۋعان جوق، تۋعاندى بيدە يمان جوق» دەپ قارا قىلدى قاق جارىپ، تۋراسىن ايتىپ، ادىلدىككە جۇگىنگەن قايمانا حالىقتىڭ ۇرپاعى بۇگىنگىدەي ءوز الدىنا ەل بولىپ، ەڭسەسى بيىك 50 مەمەلەكەتتىڭ قاتارىنا جەتۋدى كوزدەپ وتىرعان شاقتا سول ادامي قالىپ، پاراسات بيىگىنەن كورىنۋگە ءتيىسپىز» - دەيدى الماتى قالاسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى، ادەپ جونىندەگى ۋاكىلى – زاڭعار شىندالي.

بۇگىندە الماتى قالاسى بويىنشا مەملەكەتتىك كىرىستەر دەپارتامەنتىندە 2023 جىلى قاڭتار-جەلتوقسان ارالىعىنداعى كەزەڭدە ادەپ نورمالارىن بۇزعانى ءۇشىن 4 قىزمەتكەر تارتىپتىك جاۋاپكەرشىلىككە تارتىلدى، مەملەكەتتىك قىزمەتتىڭ بەدەلىن تۇسىرگەنى ءۇشىن 3 قىزمەتكەر تارتىپتىك جاۋاپكەرشىلىككە تارتىلدى.

حالىققا قىزمەت ەتەتىن ادامداردىڭ ادالدىعى جانە ادىلدىگى، ءوز جۇمىسىنا دەگەن جاۋاپكەرشىلىگى، قوعام مەن ازاماتتاردىڭ سەنىمىن تۋعىزۋى – ءاربىر مەملەكەتتىك قىزمەتكەردىڭ مىندەتى. دەمەك، ادامدار اراسىندا وسى قىزمەتشى تۋرالى دۇرىس پىكىر، وڭ كوزقاراس، وعان دەگەن ايقىن سەنىمدىلىك قالىپتاسۋى قاجەت. مۇنداي سەنىم مەن قۇرمەتكە جەتۋ وڭاي ەمەس.

الماتى قالاسى بويىنشا مەملەكەتتىك كىرىستەر دەپارتامەنتى

Abai.kz