ءماجىلىس توراعاسى ەرلان قوشانوۆ جالپى وتىرىستا ۇلتتىق قۇرىلتايدا ايتىلعان ماسەلەلەر بويىنشا پارلامەنتتىك تىڭداۋ وتكىزىلەتىنىن مالىمدەدى.

– مەملەكەت باسشىسى ەلىمىزدىڭ رۋحاني-يدەولوگيالىق، حالىقتىڭ تۇرمىسىن جاقسارتۋعا باعىتتالعان الەۋمەتتىك-ەكونوميكالىق باعدارلارىن ايقىنداپ بەردى. پرەزيدەنتتىڭ كوتەرگەن كەلەلى ماسەلەلەرى مەن سويلەگەن ءسوزىن باعدارلامالىق قۇجات رەتىندە قابىلداۋعا بولادى.  قاسىم-جومارت كەمەلۇلى وزەكتى پروبلەمالارعا توقتالىپ، ولاردى شەشۋدىڭ ستراتەگيالىق جانە شۇعىل تاسىلدەرىن اتاپ كورسەتتى. سونىڭ ىشىندە دەپۋتاتتارعا بىرقاتار مىندەت جۇكتەدى. ءبىز ەندى سولاردى ورىنداۋعا جەدەل كىرىسۋىمىز كەرەك، – دەدى ەرلان قوشانوۆ.

ءماجىلىس سپيكەرى گەربتىڭ بەينەسىنە بايلانىستى جاستار، قوعام بەلسەندىلەرى تاراپىنان كوتەرىلگەن ۇسىنىسقا پرەزيدەنتىمىز قۇرىلتايدا ءوز پىكىرىن ءبىلدىرىپ، ورتاق، بايىپتى شەشىمگە كەلۋگە شاقىرعانىن ايتتى. جالپى جۇرتشىلىقپەن بىرگە، مەملەكەتتىك سيمۆوليكانى زەرتتەپ جۇرگەن گەرالديكا سالاسىنىڭ كاسىپقوي ماماندارىنىڭ ۇسىنىستارى جەتە تالقىلانۋى قاجەتتىگىنە نازار اۋداردى.

– ءبىزدىڭ گەرب سان عاسىرلىق تاريحىمىزدى تاڭبالايتىن، مەملەكەتىمىزدىڭ ايبىنىن اسىراتىن، حالقىمىزدىڭ اسقاق رۋحىن ايشىقتايتىن نەگىزگى سيمۆول بولۋى كەرەك. ەڭ باستىسى، ەلىمىزدىڭ بولاشاققا ۇمتىلىسىن بەينەلەيتىن بىرەگەي اتريبۋتيكاسىنا اينالۋى ءتيىس. بۇل، ارينە، قوعام مەن ارناۋلى كوميسسيانىڭ قۇزىرەتىندەگى ماسەلە، – دەدى ە.قوشانوۆ.

پالاتا توراعاسى پرەزيدەنت دەپۋتاتتاردىڭ باستاماسىمەن ازىرلەنگەن لۋدومانياعا قارسى كۇرەس جونىندەگى زاڭ جوباسىن وسى سەسسيانىڭ سوڭىنا دەيىن قابىلداۋدى تاپسىرعانىن اتاپ ءوتتى. ەسىرتكىنى ءوندىرۋ مەن تاراتۋ، ۆانداليزم جانە ت.ب. پروبلەمالاردىڭ شەشىمى زاڭنامالىق دەڭگەيدە رەتتەۋدى تالاپ ەتەدى.

سونىمەن قاتار ارحەولوگيا، مەملەكەتتىك رامىزدەر مەن مەملەكەتتىك ناگرادالار سالاسىنداعى زاڭنامانى دا جەتىلدىرۋ قاجەت.

– ۇلتتىق قۇرىلتايدا كوتەرىلگەن ماڭىزدى ماسەلەلەر جونىندە پارلامەنتتىك تىڭداۋ وتكىزۋىمىز قاجەت دەپ سانايمىن. سەبەبى كەلەلى جيىندا ايتىلعان ناقتى ۇسىنىستاردى ورىنداۋ بويىنشا ماقسات-مىندەتتەرىمىزدى بىرگە ايقىنداۋىمىز كەرەك، – دەپ قورىتىندىلادى ءسوزىن ە.قوشانوۆ.

Abai.kz