ورال تۇرعىندارىن ەۆاكۋاتسيالاۋ باستالدى. 

«بۇگىن ورال قالاسىندا ساعات 18:00-دەن كەيىن «سامال»، «ۆاگوننيك» تۇرعىن الابىن ەۆاكۋاتسيالاۋ باستالدى»، - دەلىنگەن حابارلامادا.

بلوگەر ۆاديم كولوديۋس درون ارقىلى تۇسىرگەن كادرلارىن كورسەتتى. بەينەجازبالاردان «سامالاداعى» كەيبىر ۇيلەردىڭ سۋ استىندا قالعانىن كورۋگە بولادى.

«ورال اپتالىعى» سايتى سۋدىڭ بوگەتكە جاقىنداعانىن جازىپ، دابىل قاعۋدا. سۋ قالالىق ساياباقتىڭ اۋماعىنا كىردى. «سامال» جانە د/ت ۆاگون، جيدەك، «زۆەزدوچكا» تۇرعىن الاپتارىنىڭ تۇرعىندارى ەۆاكۋاتسيالىق پۋنكتتەرگە كەتەدى.

«مەنىڭ قالام» باسىلىمى بۇعان دەيىن ورال وزەنىنىڭ جاعالاۋىنىڭ ءبىر بولىگى سۋ استىندا قالعانىن جازعان. تەك وتكەن تاۋلىكتە وزەندەگى سۋ ءبىر مەترگە كوتەرىلدى. گازەبو مەن ورىندىقتار سۋ استىندا قالدى. پليتالار مەن توسەنىشتەر — قۇلاپ كەتتى.

جالپى بقو-دا 4525 ادام ەۆاكۋاتسيالاندى، ونىڭ ىشىندە 1771 بالا. قاۋىپسىز ورىندارعا 1425-تەن استام ءىرى قارا مال، 2004 باس ۇساق مال جانە 33 باس جىلقى ايدالدى.

بارلىعى 764 مىڭ م3 استام ەرىگەن سۋ سورىلدى، 161 مىڭنان استام قاپ توسەلدى.

«شىڭعىرلاۋ»، «جاقسىباي»، «ولەنت»، «بۇلدىرتى» وزەندەرىندەگى سۋ دەڭگەيىنىڭ ارتۋى ناتيجەسىندە 4 اۋداننىڭ 9 اۋىلىنداعى تۇرعىن ۇيلەردى سۋ باسقان. بارلىعى 515 تۇرعىن ءۇي سۋ استىندا قالدى»، – دەپ حابارلادى وبلىستىق تجد.

قازىر جاعدايدى مەملەكەتتىك ورگان ءوز باقىلاۋىنا الىپ وتىر.

«ازاتتىق راديوسىنىڭ» جازۋىنشا، قازاقستاندا بيىل كوكتەمدە تاسقىن قاۋپى ءتونىپ، توتەنشە جاعداي رەجيمىن جاريالاعان العاشقى ايماق – باتىس قازاقستان وبلىسى. ورال قالاسى ماڭىنداعى اۋىلدار مەن ساياجاي الابىنىڭ حالقى قاۋىپتى ايماقتان كوشىرىلدى. ادامدار تەك قۇجاتتارى مەن ازىن-اۋلاق كيىمىن عانا الىپ ۇلگەرگەن. ال ۇيلەرى تۇگەلدەي دەرلىك سۋ استىندا قالدى. بىراق تاياۋ ارادا سۋ دەڭگەيى تاعى كوتەرىلۋى مۇمكىن. ويتكەنى رەسەي ورىنبور وبلىسىنداعى يريكلا (يرەكلە) سۋ قويماسىنان ارتىق سۋدى اعىزا باستاعان.

«باستاۋىن رەسەي فەدەراتسياسى اۋماعىنان الاتىن بەس ترانسشەكارالىق وزەن سۋىنىڭ دەڭگەيى كوتەرىلىپ كەلەدى. سونىڭ سالدارىنان «جاڭاقالا» مەن «قازتالوۆ» اۋدارىنداعى «قاراوزەن» مەن «سارىوزەندە» سۋ دەڭگەيى كوتەرىلەدى. «شاعان» مەن «دەركولگە» دە قاۋىپ ءتوندى. جايىق وزەنىنىڭ دەڭگەيى كوتەرىلدى»، - دەپ جازىلعان بقو اكىمدىگىنىڭ حابارلاماسىندا.

Abai.kz.