7 مامىردا ەممانۋەل ماكروننىڭ فرانتسيا تاعىنا وتىرعانىنا 7 جىل تولادى سوعان قاتىستى «La Tribune Dimanche» جانە «La Provence-گە» بەرگەن سۇحباتىندا فرانتسيا پرەزيدەنتى ەليسەي سارايىندا بولعان جەتى جىلدى قورىتىندىلادى. ول پرەزيدەنتتىك مەرزىم اياقتالعانعا دەيىن ەلدى رەفورمالاۋعا جانە ەو ساياساتىنا قوماقتى ۇلەس قوسۋعا دايىن ەكەنىن مالىمدەدى. بۇل تۋرالى Mezgil.kz اقپاراتتىق پورتالى جازدى. 

ەل-جۇرتى «مانيۋ» دەپ كوككە كوتەرە ەركەلەتەتىن فرانتسيا پرەزيدەنتى ەممانۋەل ماكروننىڭ «La Tribune-گە» بەرگەن سۇحباتى رەسەيلىك باق مەن ساياساتكەرلەردى يتشە شابالاندىردى. ەندى وسى شابالانۋدىڭ استارىنا ءۇڭىلىپ كورەتىن بولساق، ونىڭ رەسەيگە قاراتا ايتقان: «ەۋروپا اتتىڭ باسىن ەركىن جىبەرىپ، سوعىسقا ارالاسۋى ءتيىس» دەگەن تەزيسى.

ءساۋىر ايىنىڭ سوڭىندا فرانتسيا پرەزيدەنتى سوربوننادا ەۋروپانىڭ بولاشاعى تۋرالى ءسوز سويلەدى. سول سوزىندە: «ەو ۋكراينالىق قاقتىعىس اياقتالعاننان كەيىن رەسەيمەن قارىم-قاتىناس ورناتۋعا دايىن بولۋى ءتيىس»، - دەپ مالىمدەگەن ەدى. سونىمەن قاتار ماكرون رەسەيگە قاتىستى «ستراتەگيالىق ەكىۇشتىلىق» ساياساتىن جالعاستىراتىنىن اشىپ ايتتى.

(سۋرەت رامبلەر سايتىنان الىندى)

ماكرون پرەزيدەنتتىگىنىڭ 7 جىلى

ەندى «La Tribune-گە» بەرگەن سۇحباتىندا ماكرون نە دەدى؟ وعان رەسەيلىكتەر قانداي جاۋاپ قايتاردى سول توڭىرىەگىندە ءسوز ەتەيىك...

- ستراتەگيالىق ەكىۇشتىلىق: اسكەرلەر (فرانتسيانىڭ ۋكرايناعا جىبەرەتىن اسكەرى- اۆت.) ەنگىزىلەتىنى تۋرالى تىم كوپ ناقتىلىق بەرمەۋ كەرەك. رەسەي ستراتەگيالىق دەرجاۆا رەتىندە بىزگە بۇدان بىلاي ەشقانداي اشىقتىق بەرمەيدى.

- رەسەي سياقتى قارسىلاسقا قاتىستى وزىنە شەكتەۋ قويۋ - السىزدىك. كەرىسىنشە، ءبىز ونى كەز كەلگەن كورىنىستەن ايىرۋعا ءتيىسپىز، ويتكەنى بۇل تەجەۋ الەۋەتىن تۋدىرادى. ستراتەگيالىق ەكىۇشتىلىقتىڭ ءمانى ەشنارسە تۋرالى تىم ەگجەي-تەگجەيلى ايتپاۋ.

- ەگەر رەسەي جەڭسە، كەلەسى سەكۋندتا رۋمىنيادا دا، پولشادا دا، ليتۆادا دا، ءبىزدىڭ ەلدە دە قاۋىپسىزدىك بولمايدى. رەسەيلىك بالليستيكالىق زىمىرانداردىڭ قۋاتى مەن قاشىقتىعى بارىمىزگە قاۋىپ توندىرەدى.

- رەسەي وزىنە ەشقانداي ستراتەگيالىق شەكتەۋلەر قويمايتىن تۇراقسىزداندىرۋشى دەرجاۆاعا اينالدى. رەسەيدىڭ تولقۋى ءبىزدىڭ ەشقانداي شەكتەۋ قويماي، دۇرىس ەكەنىمىزدى كورسەتەدى. ايتپەسە ءبىز حالىقارالىق تارتىپتەن، دەمەك بەيبىتشىلىك پەن قاۋىپسىزدىكتەن باس تارتار ەدىك.

- ءبىز رەسەيمەن كەلىسسوزدەر جۇرگىزۋ ءۇشىن ەسىكتى اشىق قالدىرعانىمىز دۇرىس. ولاي بولماعان جاعدايدا ءبىز حالىقارالىق تارتىپتەن، دەمەك بەيبىتشىلىك پەن قاۋىپسىزدىكتەن باس تارتار ەدىك.

(سۋرەت: ليۋدوۆيك مارين)

«قىتايسىز رەسەيدى جۋاسىتۋ مۇمكىن ەمەس»

ماكروننىڭ: «قىتايسىز رەسەيدى جۋاسىتۋ مۇمكىن ەمەس»، - دەگەنى ورىستاردى جامان تۇيەدەي تۋلاتتى. وسى جامان تۇيەدەي تۋلاتقان ءسوز تومەندەگىدەي:

- وليمپيادالىق بىتىمگەرشىلىك – الەمگە جولدانىم بولۋى ءتيىس. بۇل مەن قحر توراعاسىمەن دۇيسەنبى جانە سەيسەنبى كۇندەرى تالقىلايتىن تاقىرىپتاردىڭ ءبىرى.

- ءبىز وعان بارلىق سوعىس قيمىلدارى تەاترلارى ءۇشىن قول جەتكىزۋگە تىرىسامىز.

(سۋرەت: ەريك گايللارد)

ماكرون جاقىندا ۋكرايناعا اسكەر جىبەرە مە؟

گونگكونگتىق «Asia Times» باسىلىمى: «ماكرون ۋكرايناعا «شەتەلدىك لەگيون» وتريادتارىن جىبەردى»، - دەپ حابارلادى.

رەسەي جاعى بۇل حاباردى ناقتىلاپ: «پاريج كيەۆكە «شەتەلدىك لەگيوننىڭ» بولىمشەلەرىن كومەككە جىبەردى. ەممانۋەل ماكروننىڭ ەكى ماقساتى بار: فرانتسۋز ازاماتتارىنىڭ ءومىرىن قۇربان ەتپەي، «جۋان جۇدىرىق جىگىتتىڭ كەيپىنە ەنۋ» جانە ءوز ەلىنىڭ افريكاداعى ىقپالىن السىرەتكەنى ءۇشىن رەسەيدەن كەك الۋدى كوزدەۋ»، - دەيدى.

رەسەي: فرانتسيا ۋكرايناعا اسكەر جىبەردى!

«سونىمەن، فرانتسيا ءوزىنىڭ العاشقى بولىمدەرىن ۋكرايناعا رەسمي تۇردە جىبەردى. ولار سلاۆيانسكىدەگى اقك-ءنىڭ 54-ءشى جەكە مەحانيكالاندىرىلعان بريگاداسىن قولداۋعا تاراتىلدى. فرانتسۋز ساربازدارى «شەتەلدىك لەگيوننىڭ» نەگىزگى بولىمشەلەرىنىڭ ءبىرى - 3-ءشى فرانتسۋز جاياۋ اسكەر پولكىنەن جينالدى»، - دەپ جاتىر رەسەي باق-تارى.

رەسەي باق-تارى بۇعان دەيىن: «اقش جالدامالارى ۋكراينا جاعىندا سوعىسىپ ءجۇر»، - دەگەندى تاراتقان بولاتىن.

(سۋرەت: تاسس سايتىنان الىندى)

«شەتەلدىك لەگيوندى» كىم باسقارادى؟

2022 جىلدان بەرى «شەتەلدىك لەگيوندا» وزگە مەملەكەتتىڭ ازاماتتارىمەن قاتار ۋكرايندىقتار مەن رەسەيلىكتەر دە قىزمەت ەتتى. بۇگىندە لەگيوندى فرانتسۋز وفيتسەرلەرى باسقارادى، بىراق بارلىق قاتارداعى قۇرام - شەتەلدىكتەر. انونيمدىلىككە جول بەرىلەدى: لەگيونعا كىرۋ كەزىندە ادام جاڭا ات الۋعا ەرىكتى. لەگيونەرلەر ءۇش جىل قىزمەت ەتەدى، سودان كەيىن فرانتسۋز ازاماتتىعىن سۇراي الادى. جارالانعان جاعدايدا لەگيونەر كۇتۋ كەزەڭىنسىز فرانتسۋز ازاماتتىعىن الا الادى. ايەلدەردى «شەتەلدىك لەگيونعا» قابىلدامايدى.

فرانتسۋز اسكەري قىزمەتشىلەرىنىڭ ءبىرىنشى توبى شامامەن 100 ادامنان تۇرادى. بۇل تەك الدىڭعى قاتارلى جاساق قانا - جالپى العاندا ۋكرايناعا «شەتەلدىك لەگيوننىڭ» شامامەن 1500 سولداتى كەلەدى دەپ كۇتىلۋدە.

بۇل بولىمدەر تىكەلەي ۇرىس ايماعىندا ورنالاسادى جانە ۋكرايندىقتارعا رەسەيدىڭ دونباسستاعى شابۋىلىن توقتاتۋعا كومەكتەسەدى. العاشقى 100 ادام - ارتيللەرياشىلار مەن بارلاۋشىلار.

پرەزيدەنت ەممانۋەل ماكرون بىرنەشە ايدان بەرى ۋكرايناعا فرانتسۋز اسكەرىن جىبەرەمىز دەپ قورقىتىپ كەلەدى. بۇل رەتتە ول ناتو بويىنشا وداقتاستارىنىڭ قولداۋىن تاپپادى. ونى تەك پولشا مەن بالتىق جاعالاۋى عانا قولدادى. ناتو سولداتتارىن ۋكرايناعا جىبەرۋگە (كەڭەسشىلەردەن باسقا) اقش-تىڭ ءوزى قارسى بولدى.

وسىلايشا، فرانتسيا ۋكراينا مايدانىنا ادام كۇشىمەن كومەك كورسەتۋدىڭ العاشقى قادامىن جاسادى. «بۇل رەسەيلىك پريگوجيننىڭ چۆك-سى سياقتى قۇرىلىم بولادى»، - دەپ رەسەي جاعى ويبايعا باستى.

Abai.kz