توتەنشە جاعدايلار جونىندەگى جەدەل شتاب، ءوڭىر باسشىسىنىڭ قۇلسارى تۇرعىندارىمەن كەزدەسىپ، ولاردىڭ ۇسىنىس-تالاپتارىن تىڭداپ، سۋ تاسقىنىنان زارداپ شەككەندەرگە كەلتىرىلگەن زالالدى وتەۋ ءتارتىبىن تۇسىندىرگەنىن حابارلادى.

 وبلىس اكىمى سەرىك شاپكەنوۆ قۇلسارى قالاسى بويىنشا زارداپ شەككەندەردىڭ ارنايى نىسانالى شوتتارىنا شامامەن 200-240 مىڭ تەڭگە تولەنەتىنىن حابارلادى.

اكىمنىڭ ايتۋىنشا، سۋ تاسقىنى كەزىندە زارداپ شەككەن قۇلسارى قالاسىنىڭ تۇرعىندارى اقشالاي وتەماقىلاردى – جاڭا تۇرعىن ءۇي ساتىپ الۋعا، تۇرعىن ءۇي سالۋعا نەمەسە جوندەۋ-قالپىنا كەلتىرۋ جۇمىستارىنا جۇمساۋعا ءتيىس.

 "قازىر ءبىرىنشى كەزەكتە سۋ تاسقىنىنان زارداپ شەككەندەر باعالاۋ قورىتىندىسىمەن جانە مۇلىكتى تەحنيكالىق ساراپتاۋ قورىتىندىلارىمەن تانىسىپ، اقشالاي قاراجاتتى تولەۋگە ءوز كەلىسىمىن بەرۋى ءتيىس. تولەم ەكى اپتا ىشىندە جۇرگىزىلەدى", – دەدى سەرىك شاپكەنوۆ جينالعاندارعا. 

Abai.kz