قاسىم-جومارت توقاەۆ يران پرەزيدەنتى يبراحيم ءرايسيدىڭ قايتىس بولۋىنا بايلانىستى كوڭىل ايتۋ جەدەلحاتىن جولدادى.

مەملەكەت باسشىسى يران يسلام رەسپۋبليكاسىنىڭ پرەزيدەنتى يبراحيم رايسي مەن ۇكىمەتتىك دەلەگاتسيا مۇشەلەرىنىڭ شىعىس ازەربايجان پروۆينتسياسىندا تىكۇشاق اپاتى سالدارىنان قايتىس بولۋىنا بايلانىستى قازاقستان حالقىنىڭ جانە جەكە ءوزىنىڭ اتىنان وسى ەلدىڭ جوعارى ليدەرى ءالي حامەنەي مەن ءبىرىنشى ۆيتسە-پرەزيدەنتى موحامماد موحبەرگە جانە بارشا يران حالقىنا كوڭىل ايتتى.

– تىكۇشاق اپاتى سالدارىنان يران يسلام رەسپۋبليكاسىنىڭ پرەزيدەنتى يبراحيم رايسي مەن ونىڭ سەنىمدى سەرىكتەرىنىڭ قايتىس بولعانى تۋرالى سۋىت حاباردى تەرەڭ كۇيزەلىسپەن قابىل الدىم. يبراحيم رايسي – يران مەملەكەتى مەن حالقىنىڭ ءال-اۋقاتىن ارتتىرۋعا، مۇددەسىنىڭ مۇقالماۋىنا، ايماقتاعى تۇراقتىلىقتى ساقتاۋعا ءوز ءومىرىن رياسىز ارناعان كورنەكتى مەملەكەت قايراتكەرى.

ونىڭ قولعا العان باستامالارى مەن جەتىستىكتەرى حالىقارالىق قاۋىمداستىق تاراپىنان جوعارى باعالانعانى بارشاعا ءمالىم. قازاقستاندىقتار يبراحيم ءرايسيدى پاراساتتى باسشى، حالىقارالىق دەڭگەيدەگى بەدەلدى ساياساتكەر، ەكىجاقتى ىنتىماقتاستىقتى نىعايتۋعا زور ەڭبەك سىڭىرگەن تۇلعا رەتىندە ءاردايىم ەسىندە ساقتايدى. مارقۇمداردىڭ جاتقان جەرى جايلى، توپىراعى تورقا بولسىن، – دەپ جازىلعان جەدەلحاتتا.

Abai.kz