قازىر ەلىمىزدىڭ كەيبىر ايماقتارىندا اۋىل اكىمدەرىنىڭ سايلاۋى ءوتىپ جاتىر عوي. سونداي سايلاۋلاردىڭ ءبىرى وڭتۇستىكتەگى جەتىساي جاقتا 2 ماۋسىمدا وتەدى ەكەن. سايلاۋ ەندى وتەدى دەمەسەڭىز، بۇل دودانىڭ دۋى ءال-ازىردەن الەۋمەتتىك جەلىلەر مەن «ۆاتساپ» چاتتارىن شارلاپ ءجۇر.

الگى اقپاراتتارعا قاراپ وتىرىپ، بەيىمبەتتىڭ «ۋا، كىمسىز؟ ىبىرايمىز» ولەڭى ەرىكسىز ەسكە ءتۇستى. ەندى ءسوزىمىز ورىندى بولۋى ءۇشىن اتالعان تۋىندىدان ءۇزىندى مىسال كەلتىرە كەتەيىك:

كەشە:

- ۋا، كىمسىز؟
- ىبىرايمىز.
- جايمىسىز؟
- جايمىز.
- ۋا، قايدان كەلەسىز؟
- سايلاۋدان كەلەمىز.
ەلگە ويران ساپ،
ويناۋدان كەلەمىز.

سۋرەت: جەتىساي اۋدانى اكىمىنىڭ اپپاراتى سايتىنىڭ سكرينى

وسىلايشا، «جەتىسايعا «جاڭا قازاقستاننىڭ» جاڭارۋى جەتپەگەن بە؟» دەگەن ويعا ەرىكسىز قالاسىز. بۇل نە بولدى ەكەن دەپ، الەۋجەلىنە اقتارىپ وتىرىپ، جەتىساي اۋدانى اكىمى اپپاراتىنىڭ رەسمي سايتىنداعا اۋماقتىق سايلاۋ كوميسسياسىنىڭ توراعاسى ق.تەمىربەكوۆتىڭ 2021 جىلى جازىلعان «اۋىلدىق وكرۋگ اكىمدەرىن سايلاۋ ءتارتىبى مەن ەرەجەسى» اتتى ماقالاسىنا جولىقتىق. ءيا، ايتارى جوق، سايلاۋ كوميسسياسى توراعاسىنىڭ جازعانىندا ەش كىنارات جوق. كەز كەلگەن جان تىركەلىپ، زاڭدى جولمەن اۋىل اكىمى بولا الادى. بىراق...

بىراق دەيتىنىمىز – ەلباسيزم كەزىندەگى «ەسكى قازاقستاننىڭ» شەكپەنىنەن شىققان اكىم-قارالار بۇقارا حالىقپەن ساناسپاي، ەلگە ويران ساپ، سايلاۋدى مىسىق پەن تىشقاننىڭ وينىنا اينالدىرىپ جىبەرگەندىگى. ءبىز تەك جەتىسايدا ورىن العان ءبىر مىسالدىڭ توڭىرەگىندە عانا وي تولعاپ وتىرىمىز.

سۋرەت: kaz.inform.kz سكرينى

ءبىز وسىعان دەيىن مەملەكەت باسشىسى قاسىم-جومارت توقاەۆتىڭ دا، مەملەكەتتىك كەڭەسشى ەرلان قاريننىڭ دە «اۋىل اكىمدەرىن سايلاۋعا قاتىستى» ايتقان جۇلگەلى سوزدەرى مەن پىكىرلەرىن بىلەمىز. ولار: «رۋشىلدىق پەن جەرشىلدىكتەن ارىلۋ كەرەك», - دەدى. «بىلىكتى ماماندار سايلانۋى ءتيىس»، - دەدى. وكىنىشتىسى - جەرگىلىكتى جەرلەردەگى جەرلەستىك پەن رۋشىلدىقتىڭ «سايلاۋ» بارسىندا ءورشي ءتۇسۋى قالىپتى وقيعاعا اينالىپ ۇلگەردى.

راس، مەملەكەت باسشىسى مەن مەملەكەتتىك حاتشىنى اتالعان سايلاۋلار ادىلەتتى ءوتۋى ءۇشىن باسى قاسىندا بولسىن دەپ ورىنسىز تالاپ ەتە المايسىڭ. جوعارىدان ايتىلعان پارمەن جەرگىلىكتى جەردە مۇلتىكسىز ورىندالۋعا ءتيىس. بىراق دامىعان الەم ەلدەرىندە مۇلتىكسىز ورىندالاتىن پارمەندەر، قازاققا كەلگەندە جۇرىسىنەن جاڭىلىپ كەتەدى.

ءستاليندى قانشا جەردەن جەك كورسەك تە، ونىڭ «كادرلار ءبارىن شەشەدى» دەگەن ءسوزىن «اماناتتىڭ» جەرگىلىكتى اتقا مىنەرلەرى ەستەرىنەن شىعارىپ العان سياقتى. ويتكەنى، ادىلەتتى سايلاۋدى قالايتىن جەرگىلىكتى تۇرعىندار «اماناتتىڭ» جامان اتىن شىعارعان اتقا مىنەرلەردىڭ كەسىرىنەن بارىنەن ءتۇڭىلىپ ۇلگەردى. تاپ وسىنداي ءتۇڭىلىپ ۇلگەرۋ جەتىسايدا ورىن العان ەكەن. سايلاۋعا بىرنەشە ادام تىركەلەدى. ءتىپتى ساياسي تاجىربيەسى وزگەلەردەن كوش كەرى اسابا جىگىت تە ءوزىن ۇمىتكەر رەتىندە تىركەيدى. بىراق جەرگىلىكتى حالىق قولقانى ەل اراسىندا بەلگىلى دە، بەدەلدى مەملەكەتتىك قىزمەتكەر مۇرات تولەنوۆكە سالادى.

ەلدىڭ ءۇمىت ارتۋىمەن سايلاۋعا ۇمىتكەر بولىپ تىركەلگەن مۇراتتىڭ كورەسىنى ءالى الدا ەكەن. ونى بىردەن اۋداندىق باسشى-قوسشىلار ىعىستىرىپ، قىسىمعا الىپ، دودادان شىعارادى. ءتۇرلى قىسىم كورسەتۋلەردىڭ تاۋسىلمايتىن تىزبەگى باستالىپ، اقىرى مۇرات ۇمىتكەرلىكتەن ءوز كانيداتۋراسىن الىپ تاستاۋعا ءماجبۇر بولدى. جەرگىلىكتى ارتىنا ىلەسكەن جۇرت ماسەلەنىڭ بايىبىنا بارماي، مۇراتتى كىناراتتادى. سونىمەن، ءادىل سايلاۋدى اڭساعان تاعى ءبىر ءوڭىردىڭ ءۇمىتى وسىلاي كەسىلىپ، جەرگىلىكتى اسابانىڭ سايلاۋعا قوسقان سايگۇلىگى شاپپاي بايگى الۋعا تاياۋ تۇر دەيدى.

ءبىزدىڭ ايتپاعىمىز بۇل ءبىر عانا تۇركىستان ايماعىندا عانا ەمەس، بۇكىل قازاق ەلىن جايلاعان «سايلاۋ بوسپاسى» مارافونعا اينالعان ۇردىسكە ۇلاسىپ وتىر. ءسوز سوڭى ەندى ءادىل سايلاۋعا كەدەرگى كەلتىرەتىندەر ءۇشىن:

بۇگىن:

- ۋا، كىمسىڭ؟
- ىبىرايمىن.
- جايمىسىڭ؟
- جايمىن.
- قايدان كەلەسىڭ؟
- سوتتان كەلەمىن.
سوتتان ەمەس-اۋ، وتتان كەلەمىنگە قاشان اينالاتىن ءبىر قۇدايدىڭ ءوزى بىلەتىن بولادى. وسى ءبىر قۇدايدىڭ ءوزى بىلەتىندىكتەن قالاي ارىلۋدىڭ جولىن حالىققا كىم كورسەتەدى ەكەن؟

ەسكەرتۋ: Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر تالاستىرۋعا قازاقستاننىڭ كەز كەلگەن ازاماتى قۇقىلى. ماقالادا ەسىم-سويى اتالاتىن جەكەلەگەن ازاماتتار مەن قوعامدىق ءۇيىمدار رەداكتسيامىزعا جاۋاپ بەرۋگە نيەتتى بولسا، ءبىز ولاردىڭ جاۋاپتارىن دا پورتالىمىزدا جاريالايتىن بولامىز...

Abai.kz