بەيسەنباي داۋلەتۇلى. اعاتايىم-اي!
1-سۋرەت: فاريدا جولداسوۆا ەلباسى جانىندا ءان سالىپ تۇر. اقتاۋ، 2000 جىل.
2-سۋرەت: ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ 3-كۋرس ستۋدەنتى فاريدا جولداسوۆا. الماتى، 2013 جىل.
اكەسىنە تارتقان قىز
«اعاتايىم-اي، اعاتايىم-اي،
قارسى الار حالقىڭ قۇشاق جايىپ-اي.
ەرتەڭى ءۇشىن ەگەمەن ەلدىڭ،
بولىڭىز امان، اعاتايىم-اي!»
بۇدان ونشاقتى جىل بۇرىن وزىنە عانا ءتان داۋىس ىرعاعىمەن تەلەارنالاردا وسىلايشا ءان سالعان سۇيكىمدى قىز ەلدىڭ ەسىندە شىعار. ەلباسىنىڭ قولىنان ۇستاپ تۇرىپ ءان شىرقاعان سول ءبۇلدىرشىن فاريدا جولداسوۆا بولاتىن. ول ءاندى مەملەكەت باسشىسى نۇرسۇلتان نازارباەۆ 2000 جىلعى كەزەكتى جۇمىس ساپارىمەن ماڭعىستاۋ وبلىسىنا بارعاندا الدىنان ايتىپ شىققان ەدى. پرەزيدەنت ساپارىنا دايىندىق بارىسىندا ادەتتەگىشە تەڭىز جاعاسىنداعى ەلدىڭ بار جاقسىسىن جايىپ سالۋ ءۇشىن تىڭ جوبالار، توسىن تاقىرىپتار ىزدەستىرىلەدى عوي. مىنە، سول كەزدە «ەلباسىن فاريدا جولداسوۆا جاقىندا عانا شىققان «اعاتايىم-اي» انىمەن قارسى السا» دەگەن ۇسىنىس بولعان-دى.
1-سۋرەت: فاريدا جولداسوۆا ەلباسى جانىندا ءان سالىپ تۇر. اقتاۋ، 2000 جىل.
2-سۋرەت: ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ 3-كۋرس ستۋدەنتى فاريدا جولداسوۆا. الماتى، 2013 جىل.
اكەسىنە تارتقان قىز
«اعاتايىم-اي، اعاتايىم-اي،
قارسى الار حالقىڭ قۇشاق جايىپ-اي.
ەرتەڭى ءۇشىن ەگەمەن ەلدىڭ،
بولىڭىز امان، اعاتايىم-اي!»
بۇدان ونشاقتى جىل بۇرىن وزىنە عانا ءتان داۋىس ىرعاعىمەن تەلەارنالاردا وسىلايشا ءان سالعان سۇيكىمدى قىز ەلدىڭ ەسىندە شىعار. ەلباسىنىڭ قولىنان ۇستاپ تۇرىپ ءان شىرقاعان سول ءبۇلدىرشىن فاريدا جولداسوۆا بولاتىن. ول ءاندى مەملەكەت باسشىسى نۇرسۇلتان نازارباەۆ 2000 جىلعى كەزەكتى جۇمىس ساپارىمەن ماڭعىستاۋ وبلىسىنا بارعاندا الدىنان ايتىپ شىققان ەدى. پرەزيدەنت ساپارىنا دايىندىق بارىسىندا ادەتتەگىشە تەڭىز جاعاسىنداعى ەلدىڭ بار جاقسىسىن جايىپ سالۋ ءۇشىن تىڭ جوبالار، توسىن تاقىرىپتار ىزدەستىرىلەدى عوي. مىنە، سول كەزدە «ەلباسىن فاريدا جولداسوۆا جاقىندا عانا شىققان «اعاتايىم-اي» انىمەن قارسى السا» دەگەن ۇسىنىس بولعان-دى.
كيەلى ساحناعا بەس جاسىنان قادام باسقان فاريدا جولداسوۆا ء«انشى بالاپاننىڭ» لاۋرەاتى اتانعاننان كەيىن الماتى توڭىرەگىنە عانا ەمەس، تۇتاس ەلگە تانىلا باستاعان ەدى. بەلگىلى سازگەر قايرات ءجۇنىسوۆ «اعاتايىم-اي» دەپ اتالاتىن بۇل جاڭا ءانىن جازىپ شىعىپ، ەندى ورىنداۋشى ىزدەگەندە فاريدا ەسىنە ءتۇسىپ، ۇلىقپان جولداسوۆقا قولقا سالادى. ءمانى دە، مازمۇنى دا كەلىسكەن ءاپ-ادەمى ءاندى ۇسىنىپ تۇرعاندا، ودان نەگە باس تارتۋ كەرەك؟ سوزگە كەلمەستەن كەلىسكەن ۇلىقپان ادەتتەگىدەي قىزى العاش ورىنداعاندا مۇقيات تىڭداپ، كەم-كەتىگىن ەسكەرتۋدى ۇمىتپادى. سودان العاش قايرات ءجۇنىسوۆتىڭ كەشىندە ورىندالعان ءان لەزدە بارشانى باۋراپ، تىڭدارمانعا ەرەكشە اسەر قالدىرسا كەرەك. ارادا اي وتپەي-اق «اعاتايىم-اي» ءانى ماڭعىستاۋلىقتاردىڭ دا قۇلاعىنا جەتەدى. ءسويتىپ، «ماڭعىستاۋدىڭ عانا ەمەس، ءيسى قازاقتىڭ ماقتانىشى ءانشى-سازگەر ۇلىقپان جولداسوۆتىڭ قىزى فاريدا جولداسوۆا «اعاتايىم» انىمەن ەلباسىن قارسى السا، قانداي كەرەمەت؟!» دەگەندەردىڭ ۇسىنىسى شىنىندا دا ۇتىمدى شىقتى.
– ماڭعىستاۋ وبلىسىنىڭ سول كەزدەگى اكىمى ءلاززات قيىنوۆ اعامىز «كاسپي – دوستىق تەڭىزى» دەگەن فەستيۆالگە قاتىسۋعا ارنايى شاقىرتتى، – دەيدى فاريدانىڭ اناسى ءارى پروديۋسەرى ايعان ءجۇسىپوۆا. – الايدا بىزگە بايقاۋعا قوناق رەتىندە قاتىساتىنىمىز، قىزىمىزدىڭ ەلباسى الدىندا ءان شىرقايتىنى ەسكەرتىلدى. 1992 جىلعى 8 جەلتوقساندا تۋعان قىزىمىزدىڭ نەبارى 7-دەن اسقان كەزى. ءالى ءان ايتۋ شەبەرلىگى مەن ساحنانىڭ قىر-سىرىن مەڭگەرمەگەن بالا عوي. ۇلىقپان ەكەۋىمىز قاتتى ويلاندىق. قالاي ۋايىمدامايسىڭ، بويى ۇيرەنىپ قالعان كونتسەرت زالى بولسا ءبىر ءسارى، كەڭ الاڭدا ءارى جەكە-دارا پرەزيدەنتتىڭ قولىنان ۇستاپ ءان شىرقاۋ... جۇرەگىمىز اتشا تۋلاپ، كۇندىز كۇلكى، تۇندە ۇيقىدان قالىپ، فاريدانى دايىنداۋعا كىرىستىك. قانشا جەردەن كاسىبي ماماندار اينالىسىپ، اقىل-كەڭەستەرىن ۇيرەتىپ جاتسا دا، كەۋدەمىزدەن قوبالجۋ كەتپەي، ارقامىزدا اۋىر جۇك تۇرعانداي كۇي كەشتىك.
قۇت اكەلگەن قۋىرشاق
راسىندا دا ايتىلعان ۇسىنىس جولداسوۆتار اۋلەتىنە ەرەكشە جاۋاپكەرشىلىك ارتىپ قويدى. باسقا-باسقا، ماڭعىستاۋ وبلىسى حالىقتىڭ ىستىق ىقىلاسىنا بولەنگەن اكەسى ۇلىقپان جولداسوۆتىڭ كىندىك قانى تامعان، وسكەن جەرى عوي. بىلەتىن، تانيتىن قانشاما جۇرت، تۋىس-تۋعان بار. تۋعان جەردىڭ توپىراعىندا، تۋعان ەلدىڭ الدىندا ءوز ونەرىڭدى كورسەتۋدىڭ جاۋاپكەرشىلىگى ەكى ەسە اۋىر. قۇداي ساقتاسىن، ءمۇدىرىپ الدە ءسۇرىنىپ قالسا، ۇياتى ۇلىقپانعا كەلەدى. وسىنداي ويلار يەكتەپ، ءارتۇرلى كۇمان مەن قورقىنىش مازالاي بەرگەن سوڭ جولداسوۆتار جولعا جينالدى دا، بەلگىلەنگەن مەرزىمنەن ءبىر اپتا بۇرىن اقتاۋعا كەلىپ الدى.
ءبىر اپتا ۋاقىت تۇتاسىمەن الاڭداعى دايىندىققا كەتتى. تىنىم تاپپاعان رەجيسسەرلار مەن پروتوكول قىزمەتكەرلەرى قالاي ءجۇرىپ-تۇرۋ كەرەكتىگىن ۇيرەتۋمەن تاڭدى اتىرىپ، كۇندى باتىرىپ جاتتى. كۇتكەن 6 قىركۇيەك تە كەلدى. اقتاۋدىڭ ورتالىعىندا بوي كوتەرگەن «ماڭگىلىك الاۋ» ەسكەرتكىشىنە بەلگىلەنگەن ۋاقىتتا بۇرىلعان پرەزيدەنت كورتەجى الدىن-الا مەجەلەگەن تۇسقا ەمەس، مۇلدە باسقا جەرگە بارىپ توقتادى. ەلباسى كولىكتەن ءتۇسىپ، قاۋمالاي تۇرعان قالىڭ ەلدىڭ اراسىمەن «ماڭگىلىك الاۋعا» قاراي ءجۇردى. قانداي قيىن ءسات – اپتا بويى اقىل ايتقان ادامداردىڭ بارلىعى كوزدەن عايىپ بولىپ، ەسكەرتكىش جانىندا 7 جاستاعى فاريدا قولىنا ميكروفونىن ۇستاپ جالعىز قالدى!.. كەزدەسۋگە جاۋاپتى لاۋازىم يەلەرى ونسىز دا تىپىرشىپ تۇرعان شىعار، ال اكەسى ۇلىقپان مەن اناسى ايعاننىڭ جۇرەكتەرى اتقاقتاپ، تىپتەن دەگبىرى قالمادى. ەندى قايتسىن، مەكتەپ تابالدىرىعىن كەشە عانا اتتاعان قىزدارى نۇرسۇلتان اتاسىن كۇندەلىكتى تەلەديداردان كورىپ، سۋرەتتەرىن قاراعانىمەن قالىڭ توپتىڭ ورتاسىنان تاني الماي، مۇلدە باسقا كىسىنىڭ قولىنان ۇستاسا شە؟
– جوق، ماعان قاراي بۇرىلعان ءبىر توپ كىسىنىڭ اراسىنان كوك ءتۇستى كوستيۋم كيگەن نۇرسۇلتان ءابىشۇلىن جازباي تانىدىم دا، ءانىمدى باستاپ قارسى ءجۇردىم، – دەيدى بالعىن شاقتاعى ەرەكشە ءسات ساناسىندا ساقتالىپ قالعان فاريدا قىز. – ول كەزدە بالامىز عوي، ازداعان تولقۋىمدى مىڭداعان ماڭعىستاۋلىقتاردىڭ دۋىلداتا سوققان شاپالاعى تارقاتىپ جىبەرگەندەي. «جانىڭىزدى قيىپ بەرەسىز، قازاقتىڭ بايتاق جەرى ءۇشىن» دەپ كەلەتىن «اعاتايىم-اي» ءانىن بىلەسىز عوي، ءسوزى مەن ءانى ۇيقاسىپ، قۇلاققا جاعىمدى، جۇرەككە جىلى تيەدى. وسى جولداردى ايتىپ، تۋرا جانىنا بارعانىمدا مەيىرىمدى كوزبەن كۇلىمسىرەي قاراعان ەلباسىدان الدەبىر جىلى تولقىننىڭ لەبى جەتكەندەي سەزىندىم. «ماڭگىلىك الاۋدىڭ» باسپالداعىندا ءانىمدى اياقتاپ، ءيىلىپ يشارات جاساۋ ءۇشىن پرەزيدەنتكە قاراعاندا اسا قۋانىشتى جۇزبەن قول سوققانىن كورىپ، ايرىقشا شاتتاندىم. قولىمنان ۇستاعان قالپى رازىلىق سەزىممەن العىسىن ايتىپ، اق باتاسىن بەردى. ال سىيلىق رەتىندە ەرەكشە قۋىرشاق ۇسىنىلعاندا توبەم كوككە جەتكەندەي قۋاندىم. جان تولقىنىسىنان تۋىنداعان اسەردى جوعالتپاي، «قۋىرشاعىم» دەگەن ءاندى دە كوپ ۇزاتپاستان شىعاردىم. مىنە، سودان كەيىن ونەردەگى ءورىسىم اشىلىپ جۇرە بەرگەندەي بولدى.
ءاندى ايگىلەگەن بەينەبايان
كۇزدىڭ سوڭعى كۇندەرىنىڭ بىرىندە ءانشىنىڭ اناسى ايعانعا حابارلاسقان پرەزيدەنت تەلەراديوكەشەنىنىڭ قىزمەتكەرلەرى سول ايگىلى كەزدەسۋدەگى كەرەمەت كادرلاردى قوسىپ، «اعاتايىم-اي» انىنە بەينەبايان ءتۇسىرىپ بەرەتىندىكتەرىن ايتقاندا، جولداسوۆتار ءبىر جەلپىنىپ قالدى. ءيا، 7 جاسىندا ەلباسى جانىندا جەكە-دارا ءان شىرقاپ، اق باتاسىن العان كىم بار؟! ەندى سول تاريحي ءساتتى بەينەبايانعا اينالدىرىپ بەرەمىز دەپ وتىرسا، قالاي قۋانباسسىڭ! الايدا رەجيسسەردىڭ ويىنشا كادرلار «جۇتىنىپ» تۇرۋ ءۇشىن ءتۇسىرىلىمدى اعاشتار بۇرشىك جارىپ، دالا گۇلمەن كومكەرىلگەن كوكتەمدە جۇرگىزۋ كەرەك ەكەن. فاريدا سودان كۇن سايىن دالاعا شىعىپ، اعاشتاردى ۇستاپ كورىپ، كوكتەمدى تاعاتسىزدانا كۇتەتىن بولدى. قىرسىققاندا الاتاۋدىڭ اق شىڭدارىندا شىلدەگە دەيىن جاتاتىن قار سەكىلدى الماتىنىڭ كوشەلەرىندەگى اق ۇلپا دا سول جىلى كوكتەمنىڭ ورتاسىنا دەيىن ەرىمەي قويعانى. ءتوزىمدى تاۋىسىپ جەتكەن كوكتەممەن بىرگە استانادان ارنايى شىعارماشىلىق توپ تا اقىرى كەلدى-اۋ... ءسويتىپ، فاريدانىڭ ەلباسى جانىندا «اعاتايىم-اي» دەپ شىرقاعان اتاقتى ءانى بەينەبايان ارقىلى 2001 جىلدىڭ 6 شىلدەسىندە «حابار» ارناسىنان العاش رەت كورەرمەنگە جول تارتقاندا، جولداسوۆتار جان-جاقتان سوعىلعان قوڭىراۋلارعا جاۋاپ بەرۋگە ۇلگەرمەي جاتتى....
ەلباسى سىيلاعان قۋىرشاعىن قۇشاقتاپ ۇيىقتايتىن فاريدانىڭ جۇلدىزدى ءساتى وسىلاي باستالدى. سول «قۋىرشاعىم» انىنە بەينەبايان ءتۇسىرۋ ءۇشىن تاشكەنتكە بارعاندا وزبەك ارىپتەستەرى پرەزيدەنتتىڭ الدىندا جەكە-دارا ءان سالعان قىزعا اسا قۇرمەتپەن قاراپ، ەرەكشە ءىلتيپات بىلدىرگەن-ءتىن. ۇلىقپاننىڭ الماتىداعى ستۋدياسىنا ءجيى سوعاتىن شەتەلدىك انشىلەر دە تاريحي ءساتتى تاماشالاي قالسا، تاڭدانىستان باس شايقايتىن. ەلدىڭ ءار اتىرابىن ارالاپ كونتسەرت قويۋ، ءان جازدىرتۋ، بەينەبايان ءتۇسىرۋ، ەڭ باستىسى، كۇندەلىكتى ساباقتان قالماۋ سىندى قىم-قۋات شارۋامەن جۇرگەندە تالانتتى قىز 13-كە تولدى. ءبۇلدىرشىن داۋىس وزگەرىپ، بالالىقپەن قوشتاساتىن دا ءسات جاقىندادى. ءوزارا كەڭەسىپ، ونەردەگى دوستارىمەن اقىلداسقان جولداسوۆتار وتباسى اقىرىندا الماتىدا فاريدانىڭ تۇڭعىش كونتسەرتىن بەرۋگە بەكىنەدى.
كوڭىلدەرىن كۇپتى ەتىپ، ءبىراز قوبالجىتقان سول ساتتەردى فاريدا بىلايشا ەسكە الادى:
– كەيدە اكەمە ەركەلەپ، «نەگە ءسىز عانا كونتسەرت بەرەسىز، جەكە كونتسەرتىمدى مەن قاشان وتكىزەمىن؟» دەپ مازالايتىنمىن. ونىڭ ۇستىنە ءبىرىنشى مۇشەلگە اياق باسقاندىقتان جاس ەرەكشەلىگىنە بايلانىستى داۋسىمنىڭ دا وزگەرگەنىن سەزدىم. اتا-انامنىڭ دا «ەرتەڭ ءان ايتا الماي قالسا قايتەمىز» دەگەن ۋايىمى بايقالادى. اقىلداسا كەلە، مۇشەل جاسقا تولعانىم بار، ءارى بالالىقپەن قوشتاسۋ رەتىندە «بالا تىلەگى» دەگەن اتاۋمەن كونتسەرت وتكىزۋگە كەلىستىك. بىراق بارلىعىمىزدىڭ بويىمىزدا ءبىر قورقىنىش بار. جالعا العان ءۇش مىڭ ورىندىق رەسپۋبليكا سارايىنا ەشكىم كەلمەي، زال بوس قالسا قايتەمىز؟ الايدا، 2006 جىلعى 6 ساۋىرگە جوسپارلانعان كونتسەرتتى باستاۋ ءۇشىن ساحناعا شىققانىمدا ينە شانشار ورىن قالماعانىن كورىپ، كادىمگىدەي ارقالانىپ كەتتىم دە، ەكى جارىم ساعات بويىنا توقتاماستان ءان شىرقادىم.
تۋىپ-وسكەن الماتى حالقىنىڭ نيەتىنە راحمەت، ونەردەگى كىپ-كىشكەنتاي قىزىن ايالاپ، بارىنشا قولداۋ ءبىلدىردى. اكەسى ۇلىقپان، باۋىرى بولات، اناسى ايعان، قىسقاسى، بۇكىل ءومىرىن ونەرگە ارناپ كەلە جاتقان وتباسىنىڭ تىلەگىن ءتاڭىرى دە قابىل العان سەكىلدى. اكەسىنىڭ شىعارماشىلىق دوستارى، اتاقتى انشىلەر دە قول ۇشىن سوزدى. وسىعان ارقالانعان جولداسوۆتار ەندى استانادا باق سىناپ كورۋگە بەل بۋادى.
ەلورداداعى ەكى كونتسەرت
– كونگرەسس-حولعا كەلسەك، ىڭعايلى كۇندەردىڭ ءبىرى دە بوس ەمەس، اللا پۋگاچەۆا، ۆالەري لەونتەۆ، ۆالەنتينا تولكۋنوۆا، ءجاميلا سەركەباەۆا سىندى اتاقتى ونەرپازدار الىپ قويعان. امالسىزدان دۇيسەنبىنى – 2007 جىلدىڭ 16 ءساۋىرىن سۇرادىق. بەردى. ۋاقىت جاقىنداعان سايىن دەگبىرىمىز كەتتى. سەبەبى، الماتى – ونەر ورتاسى، فاريدانىڭ تىڭدارمانى دا، تىلەۋلەسى دە مول بولعاندىقتان، شىعارماشىلىق كەش جوعارى دەڭگەيدە ءوتتى. ال شەنەۋنىكتەر قالاسى سانالاتىن ەلوردا ءبىزدىڭ كىشكەنتاي قىزىمىزدى قالاي قابىلدايدى؟ كەشىمىزگە ەشكىم كەلمەي، ازىن-اۋلاق قاراجاتىمىز جالداۋ اقىسىنا دا جەتپەي قالماي ما؟ تاعات تاپپاي، استانا قالالىق اكىمدىگىنىڭ مادەنيەت باسقارماسىنا زالدى جالداۋ اقىسىنا كومەكتەسۋىن سۇراپ باردىم. كەزىندە ۇلىقپاننىڭ كەشىن وتكىزگەندە اكىمدىكتىڭ وسى جاعىنان كومەكتەسكەنى بار ەدى. جاۋاپتى باسشى قىسقا اڭگىمەدەن سوڭ تەلەفوندى الدى دا، كونگرەسس-حولعا قوڭىراۋ شالدى. ۇزاق سويلەسپەستەن تۇتقانى قويىپ، ء«سىز قالاي كومەك سۇرايسىز، بيلەتتەرىڭىز تۇگەلدەي ءوتىپ كەتكەن عوي» دەپ، كۇلىمسىرەپ تۇر، – دەيدى قىزىنىڭ استاناداعى العاشقى كونتسەرتىن ۇيىمداستىرۋ جۇمىستارىن ەسكە العان اناسى.
ءتىپتى كاسساعا بيلەت سۇراۋشىلار ءجيى-ءجيى حابارلاسقان سوڭ تۋرا سول كۇنى ەكىنشى كونتسەرت بەرۋ جونىندە شەشىم قابىلدانادى. ءسويتىپ، ەكى كونتسەرتكە دە بالالارمەن قاتار، ۇلكەندەر دە مولىنان كەلىپ، زال لىق تولادى. ال اتا-اناسى فاريدانىڭ وسىنشا تىڭدارمان جيناي الاتىنداي بيىككە جەتۋىن كەزىندە ەلباسى بەرگەن باتانىڭ قابىل بولعانى دەپ تۇسىنەدى.
ەلورداداعى كونتسەرتتەن كەيىن فاريدا ساحناعا شىعۋدى ساپ تىيدى. بەس جىل بويى كورىنبەدى. جارقىراپ جانعان جۇلدىز شىرقاۋ بيىككە جەتكەن ساتىندە جىلت ەتىپ جوعالىپ كەتسە، ىزدەگەن كورەرمەننىڭ جەل سوزبەن سان قيىرعا جورتاتىندىعى بەسەنەدەن بەلگىلى جايت قوي. مۇنى دا جۇرت سولاي ىزدەدى.
بۇگىندە فاريدا جولداسوۆا الماتىدا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ 3-كۋرسىندا وقيدى. ماماندىعى – ەسترادا ۆوكالى. اراداعى ۇزىلىستەن سوڭ ساحنادا كاسىبي ءانشى رەتىندە كورىنۋدى ويلاعان ول رەپەرتۋارىن جاڭارتىپ، جاڭا اندەرمەن كورىنە باستادى. جاقىندا «ساز الەمى» تەلەجوباسىنا قاتىسىپ، قازىلار القاسى تاراپىنان ەڭ جوعارى ۇپاي جينادى. ءسىرا، سوعان قاراعاندا ونەر الەمىنە باسقان ەكىنشى قادامى دا ءساتتى جالعاساتىن سەكىلدى. ونەر الەمىندەگى قانشاما تالانتتىڭ ءومىر بويىنا ارمانداپ، بىرەۋى جەتىپ، بەسەۋى جەتە المايتىن اتاق پەن قۇرمەتتى بەس جاسىنان كورگەن وعان بالعىن بالالىق شاق ەرتەگىدەي ەلەستەيدى. اسىرەسە ءۇيىنىڭ تورىندە تۇرعان قۋىرشاققا قاراعان سايىن سول ءبىر جىلدارداعى ەلباسىمەن عاجايىپ كەزدەسۋدىڭ كوز الدىنا كەلە قالاتىندىعى بار. ارتىنشا ءتىل ۇشىنا ورالاتىن سول ءبىر ءاندى ىشتەي قايتالاۋدان جالىققان ەمەس...
ەرتەڭى ءۇشىن ەگەمەن ەلدىڭ،
بولىڭىز امان، اعاتايىم-اي!
