باسى: كەشىگىپ تۋعان كەرەمەت

جالعاسى: ءى چەمپيونات. 1960. كەڭەس فۋتبولىنىڭ التىن ءداۋiرi

جالعاسى: ءىى چەمپيونات. 1964. «قىزىل فۋريانىڭ» تۇڭعىش تابىسى

جالعاسى: ءىىى چەمپيونات. 1968. تەرىس تۇسكەن «تەڭگە»

جالعاسى: IV چەمپيونات. 1972. المانشا ارمان-كوماندا

جالعاسى: V چەمپيونات. 1976. سەگىز ساعاتقا سوزىلعان تۋرنير

جالعاسى: ءVى چەمپيونات. 1980. نەمىستەردىڭ ەكىنشى التىنى

جالعاسى: ءVىى چەمپيونات. 1984. ميشەل پلاتيني فەستيۆالى

جالعاسى: ءVىىى چەمپيونات. 1988. «عاسىر گولى» جانە عالامات فۋتبول

1992 جىلعى ەۋروپا چەمپيوناتى بۇرىن-سوڭدى فۋتبول تاريحىندا بولماعان سەنساتسيامەن اياقتالدى

فرانتسۋزدار قايتا باس كوتەردى

بۇل چەمپيونات باستالماي جاتىپ-اق رەكورد جاساپ ۇلگەردى: ىرىكتەۋ ءتۋرنيرىنىڭ جەرەبەسى تارتىلار كۇنى، ياعني 1990 جىلدىڭ 2 اقپانىندا ۋەفا باسشىلىعىنىڭ الدىندا كەزەكتى قۇرلىق دوداسىنا قاتىسۋ تۋرالى 35 ەلدىڭ ءوتىنىشى جاتتى. مۇنىڭ ءبىر سەبەبى، سودان ءبىر جارىم جىل بۇرىن ەۋروپا فۋتبول قاۋىمداستىقتارى وداعى ءوز ساپىنا جاڭا ەكى مۇشە (فارەر ارالدارى مەن سان-مارينو) قابىلداعان بولاتىن. الايدا جارىس جالاۋى كوتەرىلمەي جاتىپ، قاتىسۋشىلاردىڭ قاتارى ءبىر كومانداعا ازايىپ قالدى: ەكى گەرمانيا بىرىكتى دە، بۇرىن «گەرمان دەموكراتيالىق رەسپۋبليكاسى» اتالىپ كەلگەن مەملەكەت تاريح ساحناسىنان ءبىرجولا جوعالدى. ءبىر قىزىعى، گدر قۇراماسى جەرەبە ناتيجەسىندە تۋرا گفر باستاعان توپقا تۇسكەن بولاتىن. سوندىقتان ىرىكتەۋ ويىندارىنىڭ كەستەسىنە كوپ وزگەرىس ەنگىزۋدىڭ قاجەتى بولعان جوق، تەك 5-توپتاعى كوماندالار سانى بىرەۋگە كەمىدى.

جالپى باستاپقى كەزەڭدە قاتىسۋشىلار ادەتتەگىدەي 7 توپقا ءبولىنىپ سىنعا ءتۇستى. توپ جەڭىمپازدارى قۇرلىقتىق دوپ دوداسىن تۇڭعىش وتكىزىپ وتىرعان شۆەتسيا كورولدىگى قۇراماسىمەن بىرگە اقتىق سىندا كۇش سىناسار ۇزدىك سەگىزدىكتى ءتۇزدى.

ىرىكتەۋ ءتۋرنيرى 1990 جىلدىڭ 30 مامىرىندا يسلانديا – البانيا (2:0) ماتچىمەن باستالدى. الايدا 1-توپتىڭ باستى قاھارمانى – ولار ەمەس، فرانتسۋزدار بولدى. قۇراما تىزگىنىن 1988 جىلدىڭ قاراشاسىندا ۇستاعان ميشەل پلاتيني يتالياداعى الەم چەمپيوناتىنا بەرىلەر قوس جولداما جولىنداعى تارتىستا يۋگوسلاۆتار مەن شوتلاندىقتاردىڭ تەگەۋرىنىنە توتەپ بەرە الماعانىمەن، ەۋرو دوداسىنىڭ ىرىكتەۋ ويىندارىنا ابدەن شىڭدالعان شىمىر ۇجىم ازىرلەپ ۇلگەرىپتى. ونىڭ شاكىرتتەرى توپتاعى 8 ويىننىڭ بارىندە دە جەڭىسكە جەتىپ (جالپى ەسەپپەن 20:6), قۇرلىقتىق رەكورد جاسادى!

وكىنىشكە قاراي، 90-جىلداردىڭ باسىندا شىعىس ەۋروپانىڭ ءبىراز جەرىن شارپىعان ساياسي جانجالدار ءورتى بۇل توپتى دا اينالىپ وتكەن جوق: «البان جاعى ءبىزدىڭ قاۋىپسىزدىگىمىزدى قامتاماسىز ەتە المايدى» دەگەن ءۋاجدى ۇستانعان يسپانيا فۋتبول فەدەراتسياسى ءوز قۇراماسىن تيراناعا جىبەرۋدەن باس تارتىپ، تۋرنيرلىك تۇرعىدان ەشتەڭە شەشپەيتىن وسى ويىندى وتكىزبەي-اق قويۋ جونىندە ۋەفا-عا ءوتىنىش ءتۇسىردى. ءوتىنىش قاناعاتتاندىرىلىپ، قۇرلىق دوداسى تاريحىندا تۇڭعىش رەت ىرىكتەۋ جارىسىنىڭ باعدارلاماسى تولىعىمەن اياقتالمادى: بۇل كەزدە بالقان تۇبەگى ۇلتارالىق سوعىس جالىنىندا شىجعىرىلىپ جاتقان ەدى.

2-توپقا كۇش-قۋاتى جاعىنان دەڭگەيلەس كوماندالار توپتاسقاندىقتان (ارينە، سان-مارينونى قوسپاعاندا), جالعىز جولداما ءۇشىن كۇرەس سوڭعى تۋرعا دەيىن سوزىلدى. جارىستى ەرتەرەك اياقتاعان شوتلاندىقتار 1991 جىلدىڭ قارا كۇزىندە سوفيادا توقايلاسقان بولگاريا – رۋمىنيا ماتچىن ايرىقشا ىنتامەن تاماشالادى. ويتكەنى ولاردىڭ تاعدىرى جولدامادان الدەقاشان ءۇمىتى ۇزىلگەن بولگارلاردىڭ قولىندا تۇرعان-دى. الاڭ يەلەرى قوناقتاردان كەمىندە ءبىر ۇپاي جىرىپ الا السا، وندا بريتاندىقتاردى ءبىرىنشى ورىننان ەشكىم جىلجىتا الماس ەدى. ال رۋمىندارعا، كەرىسىنشە، تەك قانا جەڭىس قاجەت-ءتىن. ناتيجەدە كەسكىلەسكەن ويىن سول كۇيى 0:0 بوپ اياقتالدى، بولگار قاقپاشىسى بوريسلاۆ ميحايلوۆ گەورگە حادجي سوققان پەنالتيدى ۇستاپ... شوتلانديانىڭ قاھارمانىنا اينالدى!

3-توپتا ءوز ەلىندە وتكەن الەمدىك دوپ دوداسىندا التىن كۋبوكتى جەڭىپ الۋعا مۇمكىندىگى بولعان، بىراق اقىرىندا قولا جۇلدەنى قاناعات تۇتقان يتاليا قۇراماسى ىرىكتەۋ ساتىسىنداعى العاشقى ويىندارىن سۇرەڭسىزدەۋ وتكىزدى. مۇنى ءتيىمدى پايدالانعان كسرو كومانداسى سالعان جەردەن كوش باستادى دا، جارىس سوڭىنا دەيىن سول تۇعىردان تۇسپەدى. ءبىر جاعىنان، «سكۋادرا ادزۋررانى» بۇرىن ونشا كوزگە تۇسە بەرمەيتىن نورۆەگتەر سان سوقتىردى: ولار ادزەلو ءۆيچينيدىڭ جىگىتتەرىنەن ءۇش ۇپاي جىرىپ الدى (2:1, 1:1).

4-توپتىڭ بەتاشار ويىنىنىڭ ناتيجەسى كوپتى كورگەن كانىگى مامانداردىڭ ءوزىن تاڭ قالدىردى: ۋەفا اياسىنداعى العاشقى ماتچىن شۆەدتىڭ لاندسكرۋنا قالاسىندا وتكىزگەن فارەر ارالدارىنىڭ قۇراماسى (ولاردىڭ ءوز ەلىندە لايىقتى ستاديون تابىلماپتى) سالعان جەردەن سەنساتسيا جاساپ، قۇرلىقتىڭ كارى كوكجالدارىنىڭ ءبىرى – اۆستريانى 1:0 ەسەبىمەن ۇتىپ كەتتى! اراعا سەگىز اي سالىپ، ايدالاداعى ارالدىڭ «ابوريگەندەرى» سىرت الاڭدا سولتۇستىك يرلانديامەن تەڭ ويناپ، الگى جەڭىستىڭ كەزدەيسوق ەمەستىگىن مەڭزەگەندەي بولدى. ايتسە دە، بۇل توپتاعى ءبىرىنشى ورىن ءۇشىن تالاس يۋگوسلاۆيا مەن دانيا اراسىندا ءوتتى. ءوزارا دەڭگەيلەس قارسىلاستار تارتىسىنىڭ تاعدىرىن ءبىر-اق ۇپاي شەشىپ، شۆەتسياعا جولدامانى يۋگوسلاۆتار جەڭىپ الدى.

5 جانە 7-توپتاردا گەرمانيا جانە انگليا قۇرامالارىنا لايىقتى قارسىلاس تابىلمادى. 6-توپتا دا سولاي ايدارىنان جەل ەسكەن گوللاندىقتاردىڭ ۇزدىك شابۋىلشىسى ماركو ۆان باستەن مالتا – گوللانديا (0:8) ماتچىندا 5 دوپ سوقتى! بۇل – ەۋروپا چەمپيوناتتارى تاريحىنداعى سىرت الاڭدا ويناعان كوماندا وكىلىنىڭ ەڭ ۇزدىك كورسەتكىشى ەدى.

ساياساتتىڭ سالقىنى

1992 جىلدىڭ 17 قاڭتارىندا فينالدىق ءتۋرنيردىڭ جەرەبەسى تارتىلاتىن بولدى. بۇل كەزدە شىعىس ەۋروپاداعى ساياسي وقيعالار شيەلەنىسى ۋەفا باسشىلىعىنىڭ باسىن قاتىرىپ جاتقان-دى. ۇلتارالىق جانجالعا بايلانىستى يۋگوسلاۆيانىڭ سوڭعى ىرىكتەۋ ويىندارىنا حورۆات فۋتبولشىلارى قاتىسقان جوق. بۇرىن ءبىرتۇتاس بولعان ەل ەندى بىرنەشە بولىككە بولىنە باستادى. تاپ وسىنداي پروتسەسس كەڭەس وداعىندا دا ءجۇرىپ جاتتى. 1991 جىلعى (سوڭعى) كسرو بىرىنشىلىگى وداقتان الدەقاشان شىعىپ كەتكەن گرۋزين («دينامو» تبيليسي) جانە ليتۆان («جالگيريس») كلۋبتارىنسىز وتكىزىلدى. ال ول اياقتالعان زامات بەلورۋستار مەن ۋكرايندار دا كەڭەستىك فۋتبول فەدەراتسياسىنان شىعاتىنىن مالىمدەدى. ياعني ءىح ەۋروپا چەمپيوناتى فينالدىق ءتۋرنيرىنىڭ جەرەبەسى تارتىلماي جاتىپ، يۋگوسلاۆيا جانە كسرو مەملەكەتتەرى ىدىراي باستادى. ۋەفا باسشىلىعى «اتالعان ەلدەردىڭ قۇرامالارىنىڭ ورنىنا ىرىكتەۋ سىنىندا ولاردان كەيىنگى ەكىنشى ورىنعا تابان تىرەگەن دانيا جانە يتاليا كوماندالارىن قوسۋ» تۋرالى وتىنىشتەردەن اياق الىپ جۇرە الماي قالدى.

جەرەبە تارتىلاردان بىرنەشە كۇن بۇرىن «تمد (تاۋەلسىز مەملەكەتتەر دوستاستىعى) فۋتبول فەدەراتسيالارىنىڭ قاۋىمداستىعى» بولىپ قايتا قۇرىلعان كسرو فۋتبول فەدەراتسياسىنىڭ باسقوسۋى ءوتتى. ونىڭ قۇرامىنا بالتىق رەسپۋبليكالارى، گرۋزيا جانە ۋكراينا كىرگەن جوق. دەگەنمەن ءوزارا كەلىسسوز ناتيجەسىندە الداعى قۇرلىق چەمپيوناتىنا بىرىگىپ قاتىسۋ تۋرالى ۋكراين فەدەراتسياسىمەن شارت جاسالدى. ءسويتىپ، تمد قۇراماسى (وداق مۇلدەم ىدىراعان سوڭ، كوماندانى وسىلاي اتاۋ ۇيعارىلدى) Euro-92-گە قاتىساتىن بولدى. شۆەدتىڭ گەتەبورگ قالاسىندا تاستالعان جەرەبەگە سايكەس «ا» توبىنا شۆەتسيا، فرانتسيا، يۋگوسلاۆيا، انگليا كوماندالارى ەنسە، «ۆ» توبىنا گوللانديا، شوتلانديا، تمد جانە گەرمانيا كوماندالارى توپتاستى.

دەگەنمەن ساياساتتىڭ فۋتبولعا ارالاسۋى مۇنىمەن بىتكەن جوق. 1992 جىلدىڭ 30 مامىرىندا بۇۇ قاۋىپسىزدىك كەڭەسى يۋگوسلاۆياعا قارسى سانكتسيا جاريالادى. مۇنى الەمدەگى كەز كەلگەن ۇيىم قولداۋعا ءتيىستى بولعاندىقتان، 31 مامىر كۇنى ۋەفا نيۋپورتتا (ۋەلس) وتكەن ءوزىنىڭ كەزەكتەن تىس باسقوسۋىندا يۋگوسلاۆيا قۇراماسىن ەۋروپا چەمپيوناتىنىڭ فينالدىق تۋرنيرىنەن الىپ تاستاۋ جانە ونى 4-ىرىكتەۋ توبىندا ەكىنشى ورىن العان دانيا كومانداسىمەن الماستىرۋ تۋرالى شەشىم قابىلدادى. ءسويتىپ، ءوز تاريحىندا تۇڭعىش رەت ۋەفا ساياسي ۇيىمداردىڭ تالابىن ورىنداۋعا ءماجبۇر بولدى. قۇرامىندا دەيان ساۆيچەۆيچ، روبەرت پروسينەچكي، زۆونيمير بوبان، داركو پانچەۆ سىندى تاماشا فۋتبولشىلار بار كۇشتى ۇجىم ساياساتتىڭ قۇربانىنا اينالدى.

بۇل – دات فۋتبولشىلارى ءۇشىن دە كۇتپەگەن وقيعا ەدى. «تەز جينالىڭدار، يۋگوسلاۆتاردىڭ ورنىنا قۇرلىق چەمپيوناتىنا قاتىساسىڭدار!» دەگەن حابار كەلگەن كەزدە، دانيا قۇراماسىنىڭ باس باپكەرى ريحارد مەللەر-نيلسەن... ءۇيىنىڭ ەسىك-تەرەزەسىن بوياپ جاتقان ەكەن» دەگەن سەكىلدى ءازىل-شىنى ارالاس قاۋەسەت تە قارشا بورادى. «بۇل ەلدىڭ ويىنشىلارى الداعى تۋرنيرگە قاتىساتىنى تۋرالى تەڭىز جاعالاۋىندا كۇنگە قىزدىرىنىپ، دەمالىپ جاتقاندا ەستىپتى» دەگەن دە اڭگىمەلەر ايتىلدى. الايدا شىن مانىندە دانيا قۇراماسىنىڭ باسشىلارى دا، فۋتبولشىلار دا شۆەد جاسىل الاڭدارىندا يۋگوسلاۆيانىڭ ورنىن باسۋى ابدەن ىقتيمال ەكەنىنەن حاباردار بولاتىن. قانشا دەگەنمەن، كۇن سايىن قۇبىلىپ جاتقان جاڭالىقتاردان ولار ساياسي احۋالدىڭ ءوربۋى سوعان بەت العانىن اڭعارماي قالماعان-دى.

3 ماۋسىمعا تمد كومانداسىمەن جولداستىق كەزدەسۋ الدىن الا بەلگىلەنىپ قويعان ەدى. دات جاتتىقتىرۋشىسى وسى ويىنعا بار مىقتىسىن جيناۋعا تىرىستى. دەگەنمەن ول ماقساتى تولىعىمەن ورىندالعان جوق: ەل فۋتبولىنىڭ جارىق جۇلدىزى ميكاەل لاۋدرۋپ چەمپيوناتقا قاتىسۋدان باس تارتتى.

جانكۇيەر بىتكەن دانياعا عاشىق بولدى

1992 جىلعى چەمپيوناتتىڭ فينالدىق ءتۋرنيرى، جانكۇيەرلىك كوزقاراسپەن العاندا، الدىڭعى جارىستارعا قاراعاندا ءسال تارتىمسىزداۋ ءوتتى. دەگەنمەن «ۆ» توبىنداعى گوللانديا قۇراماسىنىڭ باسىمدىعى ايقىن سەزىلدى. ولار شوتلانديانى دا، گەرمانيانى دا ۇتىپ، تەك تمد كومانداسىمەن عانا تەڭ ءتۇستى (تورەشى ۆان باستەننىڭ تازا گولىن ەسەپتەمەي قويدى). ەشقانداي ءانۇرانسىز، تۋسىز، سول سەبەپتى كوپ ساتتەردە جىگەرسىز دە ويناعان اناتولي بىشوۆەتستىڭ شاكىرتتەرى سوعان قاراماستان ءۇشىنشى تۋردا بارىنەن ءۇمىتى ۇزىلگەن شوتلاندىقتاردى كەز كەلگەن ەسەپپەن ۇتسا بولدى، جارتىلاي فينالعا شىعا الار ەدى. بىراق شەشۋشى ساتتە ولار تاباندىلىق تانىتا المادى (0:3). كەيىن وسى ماسقارا جەڭىلىس تۋرالى ورىس باسپاسوزىندە ءارتۇرلى اڭگىمەلەر ايتىلدى. سولاردىڭ ءبىرى – «ويىنعا بريتاندىقتار شالا ماس كۇيىندە شىعىپتى» دەگەن قاۋەسەت. «سپورت-ەكسپرەسس» گازەتىنە بەرگەن سۇحباتىندا اتالعان ويىننىڭ ەكىنشى تايمىندا سەرگەي الەينيكوۆتى الماستىرعان جارتىلاي قورعاۋشى دميتري كۋزنەتسوۆ «شوتلاندىقتاردىڭ اۋزىنان اراق ءيىسى مۇڭكىپ تۇردى» دەپ، الگى اڭگىمەنى ودان سايىن اسىرەلەپ جىبەرىپتى. الايدا وسى ماتچقا باستان-اياق قاتىسقان كوماندا كاپيتانى الەكسەي ميحايليچەنكو بۇل قاۋەسەتتى: «90 مينۋت بويى مەن بايقاماعان ىشىمدىك ءيىسىن ءبىر تايم عانا ويناعان دميتري قالاي سەزگەن؟ جالپى «كىلەڭ ماستاردان قۇرالعان كوماندادان ماسقارا بوپ جەڭىلدىك» دەگەندە، ونىڭ نە ايتقىسى كەلەدى؟ ارادا تالاي جىل وتكەندە، ءويتىپ جوق جەردەن «جاڭالىق» اشۋدىڭ نە كەرەگى بار؟» – دەپ، مۇلدە تەرىسكە شىعاردى.

جالپى العاندا، قىزىقسىزداۋ ءوتىپ جاتقان چەمپيوناتتىڭ بىركەلكى سارىنىن بۇزىپ، توسىن لەپ اكەلگەن دانيا فۋتبولشىلارى بولدى. 80-جىلداردىڭ ورتاسىندا «دات ءديناميتى» اتانىپ، الەم جانكۇيەرلەرىنىڭ جۇرەگىن جاۋلاسا دا، ءىرى جەڭىسكە قول جەتكىزە الماعان كوماندا وسى جولى سول ولقىلىقتىڭ ورنىن تولتىردى. «ا» توبىنداعى العاشقى ەكى ويىندا تۋرنيرگە اسا دايىندىقسىز كەلگەندەي كورىنگەن ولار، ارينە، ەشتەڭە تىندىرا المادى. اعىلشىندارمەن اۋپىرىمدەپ تەڭ ءتۇستى (0:0), شۆەدتەردەن ۇتىلدى (0:1).

ءبىر جاقسىسى، سوڭعى تۋر الدىندا توپتاعى ءتورت كوماندا دا كەلەسى كەزەڭگە شىعۋدان كۇدەرىن ۇزگەن جوق-تى. دات فۋتبولشىلارى شەشۋشى ويىندا ىرىكتەۋ سىنىن ءجۇز پايىزدىق كورسەتكىشپەن اياقتاعان فرانتسيا قۇراماسىمەن كەزدەستى. جان-پەر پاپەن مەن ەريك كانتونا باستاعان «ۇشجولاقتىلار» ءۇشىن تەڭ ويىن دا جەتكىلىكتى ەدى. مەللەر-نيلسەننىڭ شاكىرتتەرىنە «مىندەتتى تۇردە جارتىلاي فينالعا شىق» دەگەن ەشكىم بولعان جوق، سوندا دا ولار تىرىسىپ باقتى. ەسەپ 1:1 بوپ تۇرعان ساتتە، كۇتپەگەن جەردەن فرانتسۋز قورعاۋشىسى قاتەلەستى دە، جارتىلاي قورعاۋشى لارس ەلسترۋپ وڭ قاپتالدان تاستالعان دوپتى قاقپاعا ءجاي دومالاتا سالدى. ءسويتىپ، دانيا جارتىلاي فينالعا شىقتى!

جەڭىس دوبىن سوققان ەلسترۋپ نەگىزىندە قوسالقى قۇرامدا وتىرعان ويىنشى ەدى. نەگىزگى قۇرامدا كيم ۆيلفورت ويناپ جۇرگەن. وكىنىشكە قاراي، ونىڭ قان راگىنا شالدىققان كىشكەنتاي قىزى تىپتەن السىرەپ بارا جاتقان سوڭ، ءۇشىنشى تۋر الدىندا فۋتبولشى كوپەنگاگەنگە ۇشىپ كەتكەن بولاتىن. ونىڭ ورنىندا ويناعان حەنريك لارسەن فرانتسۋزدارمەن كەزدەسۋدە ەسەپ اشتى، ال وسىعان دەيىن تەك الاڭ جيەگىن كۇزەتىپ وتىرعان ەلسترۋپ ماتچ تاعدىرىن شەشتى. قىزى اسا ءتاۋىر بولا قويماسا دا، كوپ ۇزاماي ۆيلفورت شۆەتسياعا قايتىپ كەلدى، ءسويتىپ، جارتىلاي فينالدا ول دا، لارسەن دە 90 مينۋت وينادى (كەيىنگىسى گوللاندىقتاردىڭ قاقپاسىنا ەكى گول سوقتى). 2:2 ەسەبىمەن تەڭ اياقتالعان ويىننان سوڭعى پەنالتي سەرياسىندا ۆان باستەن قاتەلەستى دە، ويلاماعان جەردەن دانيا فينالعا جولداما الدى.

بۇعان دەيىن دات كومانداسىن ونشا مەنسىنبەي كەلگەن جۇرتشىلىق شەشۋشى كەزدەسۋدە سولاردىڭ تىلەۋىن تىلەدى. وسىدان ەكى جىل بۇرىن الەم چەمپيونى اتانعان نەمىستەردىڭ تاعى دا جەڭگەنىن ەشكىم قالاعان جوق. «تەمىردى قىزعان كەزىندە سوق» دەگەن ماتەل دات تىلىندە دە بار بولسا كەرەك، مەللەر-نيلسەننىڭ جىگىتتەرى فينالدا وتە تاماشا وينادى. ولاردىڭ مۇمكىندىگىنە ءسال كۇمانمەن قاراعان سوڭعى جانكۇيەردىڭ ءوزى يەن يەنسەننىڭ عالامات گولىنان سوڭ، ءبىرجولا دانيا جاعىنا شىقتى دەسەك، ارتىق بولماس. گەرمانيا قۇراماسى قانشا شابۋىلداسا دا، جىگەرلەنە قيمىلداعان قارسىلاسىنىڭ قورعانىسىن بۇزا المادى. 78-مينۋتتا نەمىستەردىڭ سوڭعى ءۇمىتى ءۇزىلدى: ۆيلفورت ايىپ الاڭىنىڭ سىرتىندا تۇرىپ، سول اياقپەن سولق ەتكىزدى – دوپ باعانانى «ءدىر-ر» ەتكىزىپ، قاقپا سىزىعىن بويلاي دومالاپ باردى دا، تورعا كۇمپ بەردى (بۇل – ەۋرو فينالدىق سىندارىنداعى 200-گول ەدى).

دانيا ەۋروپا چەمپيونى اتاندى!

...اكەسى چەمپيوناتتىڭ سوڭعى گولىن سوققان كۇننەن تۋرا ءبىر اي وتكەندە، ۆيلفورتتىڭ قىزى قايتىس بولدى.

ءىح ەۋروپا چەمپيوناتى

(1992 جىل، شۆەتسيا)

فينالدىق تۋرنيردە 15 ماتچ وتكىزىلىپ، 32 دوپ سوعىلدى ء(بىر ويىندا ورتا ەسەپپەن – 2,13). مەرگەن فۋتبولشىلار: برولين (شۆەتسيا), بەرگكامپ (گوللانديا), ريدلە (گەرمانيا), لارسەن (دانيا) – 3 دوپتان.

 «ا» توبى

شۆەتسيا – فرانتسيا – 1:1, دانيا – انگليا – 0:0, فرانتسيا – انگليا – 0:0, شۆەتسيا – دانيا – 1:0, شۆەتسيا – انگليا – 2:1, فرانتسيا – دانيا – 1:2.

1. شۆەتسيا 3 4:2    5
2. دانيا 3 2:2    3
3. فرانتسيا 3 2:3    2
4. انگليا 3 1:2    2

«ۆ» توبى

گوللانديا – شوتلانديا – 1:0, تمد – گەرمانيا – 1:1, شوتلانديا – گەرمانيا – 0:2, گوللانديا – تمد – 0:0, گوللانديا – گەرمانيا – 3:1, شوتلانديا – تمد – 3:0.

1. گوللانديا 3 4:1    5
2. گەرمانيا 3 4:4    3
3. شوتلانديا 3 3:3    2
4. تمد 3 1:4    2

جارتىلاي فينال

شۆەتسيا – گەرمانيا – 2:3, گوللانديا – دانيا – 2:2 (پەنالتيدەن 4:5)

فينال

دانيا – گەرمانيا – 2:0

26 ماۋسىم. گەتەبورگ. «ۋللەۆي» ستاديونى. 37 800. تورەشى گاللەر (شۆەيتساريا).

دانيا: شمەيحەل، سيۆەباك (كريستيانسەن، 66), ل.ولسەن، ك.نيلسەن، كريستوفتە، پەحنيك، يەنسەن، لارسەن، ۆيلفورت، ب.لاۋدرۋپ، پوۋلسەن.

گەرمانيا: يللگنەر، رويتەر، كولەر، حەلمەر، بۋحۆالد، برەمە، ەففەنبەرگ (توم، 80), زاممەر (دولل، 46), حەسسلەر، كلينسمانن، ريدلە.

گولدار: يەنسەن، 18 (1:0), ۆيلفورت، 78 (2:0).

ەسكەرتۋ العاندار: رويتەر، حەسسلەر، ەففەنبەرگ، كلينسمانن، دولل، پەحنيك.

ساكەن سىبانباي

Abai.kz