ولجاس بەكتەنوۆ پەتروپاۆل قالاسىنداعى بىرلىك ىقشام اۋدانىندا جاڭادان بوي كوتەرگەن ءۇيدى ارالاپ، جاڭا باسپاناعا كىرگەن تۇرعىندارمەن اڭگىمەلەستى، دەپ حابارلادى پرەمەر-ءمينيستردىڭ ءباسپاسوز قىزمەتى.

"سولتۇستىك قازاقستان وبلىسى قالاداعى سۋ باسقان ىقشام اۋداندارداعى ۇيلەردىڭ قۇرىلىسىن العاشقىلاردىڭ ءبىرى بولىپ اياقتادى. ءبىزدىڭ باستى مىندەتىمىز – زارداپ شەككەندەردىڭ بارلىعىن سۋىق تۇسكەنگە دەيىن ۇيلەرىنە كوشىرۋ", – دەدى ولجاس بەكتەنوۆ.

وڭىردە بارلىعى 700 ءۇي مەن 90 ورىندىق بالاباقشا سالىنىپ جاتىر. جاقىندا عانا وتباسىلارعا قونىستانۋ ءۇشىن 53 ءۇيدىڭ كىلتى بەرىلدى.

“ماۋسىم ايىنىڭ سوڭىنا دەيىن تاعى 47 ءۇي بەرۋ جوسپارلانسا، 600 ءۇيدىڭ قۇرىلىسى بيىلعى تامىز ايىنىڭ سوڭىنا دەيىن اياقتالادى. بىرلىك ىقشام اۋدانى قاجەت ينجەنەرلىك كوممۋنيكاتسيالارمەن قامتاماسىز ەتىلگەن، توپىراقتى جولدار سالىنىپ، سەرۋەندەۋگە جانە دەمالۋعا ارنالعان ايماقتاردى اباتتاندىرۋ جۇرگىزىلىپ جاتىر. سالىنىپ جاتقان قۇراستىرمالى-قالقاندى ۇيلەردىڭ ساپاسى مەن تەحنولوگياسىنا ەرەكشە نازار اۋدارىلدى. قازىرگى تاڭدا 100-دەن استام ۋچاسكەدە ىرگەتاس قالانىپ، كونسترۋكتسيالار قۇراستىرىلا باستادى، سونىمەن قاتار سۋمەن جابدىقتاۋ جۇمىستارى جۇرگىزىلىپ جاتىر”، – دەلىنگەن حابارلامادا.

Abai.kz