قازاقستانداعى ۋاقىت بەلدەۋى ءبىر ساعات كەرى شەگىنۋىمەن حالىق اراسىندا سوڭعى ۋاقىتتارى ماسەلە تۋىندادى. ماسەلەن جۇمىستان قايتۋشىلار تىم قاراڭعىدا قايتتىق دەسە، ەندى ءبىر بولىگى تۇندە تاڭ اتىپ تۇرعانداي، ۇيىقتاۋعا قولايسىز دەپ، ت.ب شاعىمدانا باستادى.

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ۇكىمەتتە وتكەن بريفينگتە ەلىمىزدە بىرىڭعاي ۋاقىت بەلدەۋىنە كوشۋگە بايلانىستى جۇمىس ۋاقىتى وزگەرۋى مۇمكىن ەكەندىگىن مالىمدەدى.

"بىزگە كوپ حات كەلىپ جاتىر، ءبىز ولارعا جاۋاپ بەرەمىز. جۇمىس بەرۋشى مەن جۇمىسشىنىڭ اراسىندا كەلىسىمشارت بار، جۇمىس كەستەسىن ەكى جاق بىرگە جاسايدى. سوندىقتان قاراڭعىدا جۇمىس ىستەمەۋى ءۇشىن، جۇمىس بەرۋشىمەن كەلىسىپ، جۇمىس كەستەسىن قايتا قاراي الادى. نەگىزى بۇل كۇردەلى سۇراق ەمەس", – دەدى سۆەتلانا جاقىپوۆا.

سونىمەن قاتار مينيستر جەكە جانە بيۋدجەتتىك مەكەمەلەرگە ۇسىنىس بەرىلگەنىن ايتتى.

"ۇسىنىس بەردىك، ياعني، جۇمىس ءبىر ساعاتقا ەرتە باستالۋى مۇمكىن. نەگىزى كەلىسىمشارت ەكىجاقتى جاسالادى. ول ەڭبەك كودەكسىندە جازىلعان، زاڭعا سايكەس", – دەپ تولىقتىردى ۆەدومستۆو باسشىسى.

Abai.kz