وليمپيادانىڭ سوڭعى اپتاسى باستالدى. بۇل سپورت دوداسىنداعى قازاقستان وليمپياشىلارى كورسەتىپ جاتقان ناتيجە ايتەۋىر ءسال دە بولسىن كوڭىل كونشىتەرلىكتەي. ارينە، ءۇش جىل بۇرىنعى توكيوداعى 83-ورىنمەن سالىستىرعاندا عانا. ازىرگە جالپىكوماندالىق ەسەپتە 29-ورىندا كەلەمىز.

ناريمان قۇربانوۆ سپورتتىق گيمناستيكادان كۇمىس جۇلدەگە يە بولدى. بۇل – قازاق اتلەتىنىڭ سپورتتىڭ وسى تۇرىندەگى تۇڭعىش مەدالى! ناريمان تەك يرلانديالىق ريس ماككلەگانعا عانا ەسە جىبەردى. ءۇشىنشى ورىندا – ستيۆەن نەدوروزيك (اقش).

ەرلەر بوكسىنداعى اقىرعى ءۇمىتىمىز – 80 كەلى سالماق دارەجەسىندە سىنعا ءتۇسىپ جۇرگەن نۇربەك ورالباي دومينيكاندىق قارسىلاسى كريستيان حاۆەر پينالەستى جەڭىپ، فينالعا شىقتى. شەشۋشى باسەكەدەگى ونىڭ قارسىلاسى – ۋكراين بوكسشىسى ولەكساندر حيجنياك.

قىزدار بوكسىندا نازىم قىزايباي (50 كەلىگە دەيىنگى سالماق دارەجەسى) قارسىلاستارىنىڭ بارىنەن باسىم ءتۇسىپ كەلەدى. شيرەك فينالدا ول كولۋمبيالىق بوكسشى ينگريت ۆالەنسيانى ايقىن باسىمدىقپەن جەڭدى. نازىمنىڭ جارتىلاي فينالداعى قارسىلاسى – قىتاي قىزى، 2023 جىلى الەم چەمپيونى اتانعان ۋ يۋ.

جەڭىل اتلەتيكادا 3 000 مەترگە كەدەرگىلەرمەن جۇگىرۋدەن نورا دجەرۋتو 5-ورىن الىپ، فينالعا شىقتى. فينالدىق جارىس ەرتەڭ تۇندە، ياعني 6 تامىزدان 7-سىنە قاراعان ءتۇنى ساعات 00.10-دا باستالادى. كەنيادان كەلىپ، قازاقستان ازاماتتىعىن العان تاعى ءبىر جەلاياق دەيزي جەپكەمەي نەبارى 10-ورىن الىپ، فينالعا شىعا المادى. دەگەنمەن ول ءالى 10 000 مەتر قاشىقتىققا جۇگىرۋ جارىسىنا قاتىسادى.

سەنبى-جەكسەنبىدە وليمپيادادا بۇدان وزگە دە تالاي جاڭالىق بولدى.

1) قازىرگى تەننيس سپورتىنىڭ جارىق جۇلدىزى، وسى كۇنگە دەيىن الماعان جۇلدەسى جوق 37 جاستاعى اتى اڭىزعا اينالعان سەرب نوۆاك دجوكوۆيچ تۇڭعىش رەت وليمپيادا چەمپيونى اتاندى. ول وتە تارتىستى وتكەن فينالدا تەننيستىڭ جاڭا دا جاس سايىپقىرانى – يسپاندىق كارلوس الكاراستان ەكى سەتتە باسىم ءتۇستى (7:6, 7:6). ءسويتىپ، نوۆاك ءوزىنىڭ بالا كۇنگى ارمانىنا قول جەتكىزدى.

2) بوكستان قىزدار اراسىنداعى 66 كەلى سالماق دارەجەسىندەگى شيرەكفينالدىق جەكپە-جەك كۇللى الەمنىڭ نازارىن اۋداردى. باستى سەبەپ – جۇرتشىلىق ترانسگەندەر دەپ ەسەپتەگەن، الايدا كەيىن ينتەرسەكس (بويىندا ەرلەرگە ءتان گورمونى كوپ ايەل) ەكەنى ءمالىم بولعان الجيرلىك سپورتشى يمان حەليف توڭىرەگىندە تۋىنداعان داۋ. جارتى الەمدى شۋلاتقان جانجال يمان حەليفتىڭ جۇيكەسىنە اسا قاتتى اسەر ەتپەسە كەرەك، ول ۆەنگريالىق بوكسشى اننا لۋكا ءحاموريدى جەڭىپ، جارتىلاي فينالعا شىقتى. ەندىگى قارسىلاسى – تاي قىزى دجاندج سۋۆانناپحەنگ (جەكپە-جەك 6 تامىزدا وتەدى).

3) ءجۇزۋ سپورتىنداعى ەڭ ايگىلى ايەل سپورتشىنىڭ ءبىرى – امەريكالىق كەتي لەدەكي 9-شى رەت وليمپيادا چەمپيونى اتاندى. 800 مەتر قاشىقتىققا ءجۇزۋ سايىسىندا ۇزدىك شىققان ول ءوز وتانداسى دجەنني تومپسوننىڭ (8 رەت وليمپيالىق چەمپيون بولعان) رەكوردىن جاڭارتتى. وسى جەڭىسىنىڭ الدىندا عانا كەتي تاعى ءبىر سايىستا – 1 500 مەترگە ءجۇزىپ جارىسۋدان دا التىن العان بولاتىن. ءسويتىپ، ك.لەدەكي ءوز قورجىنىنداعى وليمپيالىق مەدال سانى (14) جونىنەن ايەلدەر اراسىندا ءۇشىنشى ورىنعا شىقتى، ال تەك التىندى ەسەپتەسەك (9) ورىس گيمناستى لاريسا لاتىنينامەن تەڭەستى. ايەلدەر اراسىندا جالپى مەدال سانى بويىنشا الدا تەك لاتىنينا (9+5+4=18) مەن نورۆەگ شاڭعىشىسى ماريت بورگەن (8+4+3=15) عانا تۇر.

4) سپورتتىق گيمناستيكا جۇلدىزى سيمونا بايلز (اقش) كەشە ءوزىنىڭ وسى پاريج ويىندارىنداعى ءۇشىنشى التىن مەدالىن الدى. بۇل – ونىڭ جالپى وليمپيادا تاريحىنداعى جەتىنشى التىنى. سيمونا مۇنىمەن دە شەكتەلەتىن ءتۇرى جوق، الدا بورەنە ۇستىندەگى جاتتىعۋلار مەن ەركىن جاتتىعۋلار سايىسى كۇتىپ تۇر. ەگەر سيمونا بايلز بۇل ەكەۋىندە دە جەڭىسكە جەتسە، لاتىنينا مەن لەدەكيدى بيىل-اق قۋىپ جەتۋى مۇمكىن.

5) دزيۋدودان فرانتسيا قۇراماسى كوماندالىق جارىستا وسى سپورت ءتۇرىن ويلاپ تاپقان جاپونيانىڭ سپورتشىلارىن جەڭىپ، التىننان القا تاقتى. 26 شىلدە كۇنى وسى سپورت مەرەكەسىنىڭ اشىلۋ سالتاناتىندا وليمپيادا الاۋىن جاققان تەددي رينەر پاريج تاتاميلەرىندەگى ەكىنشى التىن مەدالىن يەلەندى. جالپى العاندا رينەر – بەس دۇركىن وليمپيادا چەمپيونى!

6) دۇنيە جۇزىندەگى ەڭ جىلدام ايەل – جۋلەن الفرەد بولىپ شىقتى. 100 مەتردى 10.72 سەكۋندتا جەلدەي ەسىپ وتكەن جەلااياق – وڭتۇستىك امەريكانىڭ تەرىسكەي تۇسىنداعى كاريب تەڭىزىندە ورنالاسقان ويماقتاي عانا سەنت-ليۋسيا اتتى ارال-مەملەكەتتىڭ وكىلى. جۋلەننىڭ جەڭىسى – نەبارى 180 مىڭ عانا حالقى بار وسى ەلدىڭ تۇڭعىش وليمپيالىق مەدالى!

7) فرانتسۋز جۇزگىشى لەون مارشان 200 مەترگە ءجۇزىپ جارىسۋدان التىن مەدال الدى. بۇل – ءجۇزۋ سپورتىنىڭ جاڭا جۇلدىزى اتانعان تالانتتى اتلەتتىڭ پاريج وليمپياداسىنداعى ءتورتىنشى التىنى! بۇعان دەيىن ءبىر وليمپيادادا ءتورت رەت التىننان القا تاققان ءبىر-اق سپورتشى بار ەدى، ول – داڭقتى امەريكالىق جۇزگىش مايكل فەلپس (2008). لەون مارشان ءوزىنىڭ وسى سپورت ءتۇرىنىڭ ناعىز مايتالمانى ەكەنىن دالەلدەدى: براسس، باتتەرفلياي ادىستەرىمەن جۇزۋدە دە، 400 مەترگە، 200 مەترگە كومپلەكس تۇرىندە جۇزۋدەن دە ول الدىنا قارا سالعان جوق. پاريج تۇرعىندارى ءوز وتانداستارىسىنىڭ تابىسىن تويلاپ جاتىر.

8) پاريجدەگى فۋتبول ءتۋرنيرى دە ءوز مارەسىنە جاقىنداپ كەلەدى. بۇگىن جارتىلاي فينال كەزەڭى وتەدى – ماروككو مەن يسپانيا (استانا ۋاقىتىمەن 21.00-دە), فرانتسيا مەن ەگيپەت (00.00) كەزدەسەدى.

ساكەن سىبانباي

Abai.kz