بەيسەنباي داۋلەتۇلى. ءبيشى قىزدىڭ بيىگى
1-سۋرەت. كىشكەنتاي گۇلستان جاڭا جىلدىق شىرشا تويىنا كەلگەن پرەزيدەنتپەن بىرگە. قاراعاندى، 2000 جىل.
2-سۋرەت. قازاق ەكونوميكا، قارجى جانە حالىقارالىق ساۋدا ۋنيۆەرسيتەتىنىڭ ماگيسترانتى گۇلستان وماروۆا. استانا، 2014 جىل.
كوپتەن كۇتكەن كۇن
1-سۋرەت. كىشكەنتاي گۇلستان جاڭا جىلدىق شىرشا تويىنا كەلگەن پرەزيدەنتپەن بىرگە. قاراعاندى، 2000 جىل.
2-سۋرەت. قازاق ەكونوميكا، قارجى جانە حالىقارالىق ساۋدا ۋنيۆەرسيتەتىنىڭ ماگيسترانتى گۇلستان وماروۆا. استانا، 2014 جىل.
كوپتەن كۇتكەن كۇن
بي توبىنا بەس جاسىنان بارعان گۇلستان ارادا ءالى دە سول نازىك ونەردەن قول ۇزگەن جوق. ومىردەگى جەتىستىگىنىڭ بارلىعى دا بيمەن بايلانىستى بولىپ كەلەدى. اسىرەسە بي ارقىلى شىققان العاشقى بيىگىنىڭ ءجونى بولەك.
2000 جىلى قاراعاندىداعى م.جۇماباەۆ اتىنداعى №39 مەكتەپ-گيمنازياسىنىڭ 3-سىنىبىندا وقيتىن وقۋشى قىزعا جاڭا جىل قارساڭىندا ۇستازدارى ءارى قۋانىشتى، ءارى قوبالجىتاتىن جاڭالىق جەتكىزدى. قالادا وتەتىن شىرشا تويىنا پرەزيدەنت نۇرسۇلتان نازارباەۆ قاتىساتىن بولىپتى. ال گۇلستان وماروۆاعا سول مەرەكەدە جاڭا جىلدىڭ يەسى – جىلان كەيپىنە ەنىپ، مىڭ بۇرالعان قيمىلىمەن كورەرمەندى تاڭىرقاتۋ جۇكتەلىپ وتىر. ارينە، باس اينالدىرار باق مىڭداعان بالانىڭ اراسىنان وزىنە قونعانىنا ول بارىنشا قۋانىشتى ەدى. الايدا ءبيدى ءبىرشاما مەڭگەرگەنىمەن، ۇلكەن ساحنالارعا ءالى بوي ۇيرەتپەگەن كەزى. ونىڭ ۇستىنە ەلباسىنىڭ ءوزى كەلىپ تاماشالايتىنىن ويلاپ، وراسان جاۋاپكەرشىلىكتى سەزىندى.
گۇلستان كوپ ويلانباستان دايىندىققا كىرىستى. ءتورت جىلدان بەرى قابىلەتىن وياتىپ، شەبەرلىگىن شىڭداپ كەلگەن «شولپان» بي انسامبلىندەگى جەتەكشىلەرى بەلگىلەنگەن ءبىر اي ىشىندە بارىنە ۇلگەرۋ ءۇشىن كۇندىز-ءتۇنى تىنىم تاپقان جوق. كيىم تىكتىرۋمەن، ءان جازدىرتۋمەن، قيمىل-قوزعالىستى شيراتىپ، جاڭا ۇلگىلەرىن ۇيرەنۋمەن اۋرەلەنىپ جۇرگەندە كۇتكەن كۇن دە جەتتى.
21 جەلتوقسان كۇنى تاڭەرتەڭ قاراعاندىداعى «قيال الەمى» ورتالىعىنداعى پرەزيدەنتتىك شىرشاعا جينالعان بالالاردىڭ كۇلىمدەگەن كوزدەرىنەن ايرىقشا كەزدەسۋدى اسىعا كۇتكەنى اڭعارىلىپ تۇر. اسىرەسە اي بويى جانى جاي تاپپاعان كىشكەنتاي گۇلستاننىڭ كوڭىل-كۇيى تىپتەن بولەك.
«الگى «جىلان قىز» قايدا؟»
– باسقالارعا قاراعاندا مەنىڭ قاتتى الاڭداعانىم ءالى كۇنگە ەسىمنەن كەتپەيدى. نۇرسۇلتان اعانى بارلىعىمىز شۋىلداي قارسى الدىق. اسا قادىرلى قوناق ارنايى ورىنعا وتىرعان سوڭ ساحنالانعان كورىنىس تە باستالىپ كەتتى. دايىندالعان قويىلىمدارعا سايكەس جىلان كيىمىن كيگەن مەنى ەرتەگى كەيىپكەرلەرى ەرتوستىك مەن الپامىس كوتەرىپ اكەلدى دە، اياز اتا مەن قارشا قىزعا تاپسىردى. جاڭا عاسىردىڭ سيمۆولىن قۇرمەتپەن قارسى العان ولار جىلى لەبىزدەرىن ءبىلدىرىپ جاتتى. سودان كەيىن مەن ءانىمدى ايتىپ، بي بيلەدىم. دۋمانعا ۇلاسقان كونتسەرتىمىزدىڭ سوڭىندا ەلباسىنىڭ ەرەكشە ريزالىقپەن قول سوققانىن بايقادىم. كەزەك تورت تاراتۋعا كەلگەندە نۇرسۇلتان ءابىشۇلى ونى ءوز قولىمەن كەستى دە: «الگى جىلان قىز قايدا؟ جىلان قىزدى شاقىرىڭدار، تورتتى ءبىرىنشى سول جەسىن»، – دەدى داۋىستاپ. نۇرسۇلتان اعانىڭ شاقىرعانىن ەستي سالا جۇگىرىپ باردىم. قولىمدى الىپ، راحمەتىن ايتقان پرەزيدەنت اكەمنىڭ اتىن، قايدا وقيتىنىمدى سۇرادى. تورتتى بەرىپ تۇرىپ، ونەردە دە، ومىردە دە بيىككە جەتۋىمە تىلەكتەستىگىن ايتقاندا توبەم كوككە جەتكەندەي قۋاندىم. باسقا بالالاردان بولەك سۋرەتكە دە تۇستىك. جۇرەكتەرى جارىلارداي قۋانعان اكە-شەشەم قانات پەن گۇلنار نۇرسۇلتان ابىشۇلىمەن تۇسكەن سۋرەتىمدى ونشاقتى دانا ەتىپ شىعارىپ، ءۇيىمىزدىڭ بارلىق بولمەسىنە ءىلىپ قويدى.
گۇلستاننىڭ ونەردەگى جولى وسىلاي اشىلىپ جۇرە بەردى. وبلىستىق، رەسپۋبليكالىق، حالىقارالىق بايقاۋلارعا باق سىناۋعا بارعان سايىن ەلباسىدان ەستىگەن تىلەگى قۇلاعىندا تۇرعانداي سەزىنەتىن. ءسويتىپ، سىناققا تۇسكەن سايىن بارىن سالىپ، قازاقتىڭ ۇلتتىق ءبيىن بار ناقىشىمەن جارقىراتا كورسەتۋگە ۇمتىلاتىن.
شىڭعا شىققان «شولپان»
قۇرامىندا گۇلستان وماروۆا دا بار «شولپان» بي توبىنىڭ سوڭعى ونشاقتى جىلدا باعىندىرعان بيىكتەرى وراسان. ەڭ العاش №39 ورتا مەكتەپ بازاسىندا قازاق بالالار بي ءانسامبلى رەتىندە قۇرىلعان «شولپاننىڭ» ۇلتتىق مادەنيەتتىڭ ۇزدىك ۇلگىسىن ەلگە، شەتەلدەرگە تانىتپاق يگى نيەتى جۇزەگە استى. ۇلت كوشباسشىسىمەن بىرگە قارسى العان جاڭا عاسىر بۇل ۇجىمنىڭ جۇلدىزىن بيىكتەن جارقىراتتى.
2001 جىلى بولگاريانىڭ وبزور قالاسىنداعى «حوروۆود درۋجبى» حالىقارالىق كونكۋرسىنا بارعان شىعارماشىلىق توپ 2-ورىن يەلەنىپ، كادىمگىدەي ارقالانىپ قايتتى. ەل ىشىندە اجەپتەۋىر تانىلىپ قالعان «شولپاندىقتار» ءۇشىن بۇل حالىقارالىق دەڭگەيدەگى العاشقى ولجا ەدى. كەم-كەتىگىن تەز ارادا تۇزەگەن توپ 2003 جىلى لاتۆيانىڭ يۋرمالا قالاسىنداعى «Rainbow Stars» حالىقارالىق فەستيۆالىندە ونەر كورسەتكەندە ءتانتى بولعان قازىلار القاسى باس جۇلدەنى تالاسسىز بەردى. ول ول ما، 2006 جىلى يسپانيانىڭ مايوركا ارالىندا ۇيىمداستىرىلعان ءVى «جاستىق» حالىقارالىق كونكۋرسىندا بىرنەشە جانر بويىنشا سايىسقا تۇسكەن ۇجىم بىردەن 2 باس جۇلدەنى ەنشىلەگەندە بي ونەرىنىڭ بيىك شىڭىنا شىعىپ، تىلسىمىن مەڭگەرگەن يسپاندىقتاردىڭ ءوزى تاڭدانىستارىن جاسىرا المادى. ەندىگى جەردە قازاقتىڭ «شولپانى» حالىقارالىق ارەنادا بايگەدەن دامەلىلەردىڭ باستى قارسىلاسىنا اينالدى. اراعا ەكى جىل سالىپ، 2008 جىلى فرانتسيانىڭ پورتبايل قالاسىندا وتكەن حالىقارالىق «حرۋستالنايا ليرا» فەستيۆال-كونكۋرسىندا 1-ورىن جانە «كورەرمەن كوزايىمى» جۇلدەسىن ەنشىلەپ، تالعامپاز فرانتسۋزداردىڭ ءوزى تاڭداي قاقتىردى.
ءدال وسى جىلى ايتۋلى ۇجىمعا پرەزيدەنتىمىز جاس كۇنىندە وقىعان، ۋكراينانىڭ دنەپرودزەرجينسك قالاسىندا دا ونەرىن كورسەتۋدىڭ ءساتى ءتۇستى. قاراعاندى وبلىسىنىڭ ۋكرايناداعى مادەنيەت كۇندەرىنىڭ اياسىندا دنەپروپەتروۆسك، دنەپرودزەرجينسك شاھارلارىن دۋمانعا كەنەلتكەن ۇلتتىق توپتىڭ ۇناعانى سونشا، ۋكرايندىقتار دا ۇزاققا دەيىن قوشەمەتىن ءبىلدىرىپ، قيماي قوشتاسىپتى.
جەڭىستەر مەن جۇلدەلەر
اراعا بىرنەشە جىل سالىپ ەۋروپانىڭ تورىنەن جارق ەتىپ كورىنىپ، شەتەلدىكتەردى تاڭعالدىرۋ «شولپاننىڭ» داستۇرىنە اينالعانداي. 2010 جىلى يتاليانىڭ ريميني قالاسىنا «ۆيۆات، يتاليا!» حالىقارالىق كونكۋرسىنا بارعان شىعارماشىلىق توپ تاعى دا 1-ورىن الدى. ادەمىلىك پەن سۇلۋلىقتى ۇشتاستىرىپ، تالانت پەن تاپقىرلىقتى توعىستىرىپ، بي قۇپياسىن ەركىن مەڭگەرگەن «شولپان» وسىدان سوڭ ەۋروپالىقتاردىڭ ەسىندە ەرەكشە ساقتالعانى كۇمانسىز.
2011 جىلى تاشكەنتتەگى زاماناۋي حورەوگرافيا مەن سپورتتىق پلاستيكا حالىقارالىق باسەكەسىندە جۇلدەلى ورىندى جەڭىپ العان توپ 2012 جىلى ماسكەۋدەگى «سولنتسە ۆ دەتسكيح لادوشكاح» حالىقارالىق فەستيۆالىندە دە باس جۇلدە الاتىن داستۇرىنەن جاڭىلعان جوق. تۋرا وسى كەزەڭدە بۇدان التى جىل بۇرىن بارىپ تاڭداي قاقتىرىپ كەتكەن يسپانيادان قايىرا شاقىرتۋ تۇسكەن. لورەت دە مار قالاسىنداعى «OPUS – 2012» حالىقارالىق كونكۋرسىندا گران-پري مەن 1-ورىن تاعى قازاقتىڭ «شولپان» بي-انسامبلىنە بۇيىرعاندا وشپەس ونەر مەن كەتپەس باققا باس شايقاماعان ادام كەمدە-كەم.
بىلتىر عانا بەلارۋسيانىڭ گومەل قالاسىنداعى «سوجسكى كاراگود» حالىقارالىق فەستيۆالىندە 1-ورىن الىپ، الەمدىك ونەردەگى ءوز ورنىن ەشكىمگە بەرمەيتىنىن تاعى دا دالەلدەگەن «شولپاننىڭ» وسى جەڭىستەرى مەن جەتىستىكتەرىنىڭ بارلىعىندا ءبىزدىڭ كەيىپكەرىمىزدىڭ – بي توبىنىڭ 17 جىل بويعى تالانتتى ءبيشىسى گۇلستان وماروۆانىڭ سىڭىرگەن ەڭبەگى ەرەن. ال ەۋروپانى ەلىكتىرگەن اۋەن مەن بي قازاق مادەنيەتىنىڭ قۇنارىن بىلدىرسە كەرەك.
بۇل – «شولپان» بي ءانسامبلىنىڭ تەك حالىقارالىق دەڭگەيدەگى تابىسى. قۇرىلعانىنا 20 جىل تولعان بي توبى ەل ىشىندەگىسىمەن قوسا ەسەپتەگەندە 19 رەت گران-پري، 24 رەت 1-ورىن يەلەنگەن ەكەن. ارينە، مۇنداي ۇلكەن ۇجىمدا جەڭىس ورتاق ەكەنى بەلگىلى. بۇل ورايدا «شولپان» بي-ءانسامبلىنىڭ نەگىزىن قالاپ، گۇلستاندى بەس جاسىنان ۇيىرمەگە جەتەلەپ اكەلگەن اناسىنىڭ – ايگىلى توپتىڭ كوركەمدىك جەتەكشىسى جانە بالەتمەيستەرى، قر ءبىلىم بەرۋ سالاسىنىڭ قۇرمەتتى قىزمەتكەرى گۇلنار وماروۆانىڭ ەڭبەگىن ەرەكشە اتاپ ايتۋعا ءتيىسپىز.
ورنەگى وزگەشە ونەر
– 1993 جىلى قاراعاندىدا قۇرىلعان «شولپان» تىنىمسىز ەڭبەكتىڭ ارقاسىندا وسىنداي دارەجەگە جەتتى، – دەيدى گۇلنار مەڭدىبايقىزى. – قازىر بۇل ۇجىمدا 350-دەن استام تالاپكەر بي ۇيرەنىپ ءجۇر. قازاق حالقىنىڭ مادەنيەتى مەن بيىنە باۋليتىن توپتا شاكىرتتەردى كلاسسيكالىق، ەسترادالىق، زاماناۋي حورەوگرافيالىق باعىتتاردا شىڭداپ جاتىرمىز. قاراعاندىداعى ەشبىر شارا ءبىزدىڭ ونەرپازداردىڭ قاتىسۋىنسىز وتپەيدى. بۇدان بولەك استانانىڭ ونجىلدىق مەرەيتويىندا، ەلورداداعى قىسقى ازيا ويىندارىنىڭ اشىلۋىندا «شولپاننىڭ» بيشىلەرى وزگەلەرگە ۇقسامايتىن ورنەگىمەن ەلدىڭ سۇيىسپەنشىلىگىنە بولەندى. ەلباسىنىڭ دا الدىندا بىرنەشە رەت ونەر كورسەتتىك. قىزىم گۇلستاننىڭ بي ونەرىنە جان-تانىمەن قۇلاي بەرىلۋىنە پرەزيدەنتپەن بولعان كەزدەسۋ قاتتى اسەر ەتتى. ءوز ونەرىنىڭ ارقاسىندا ەلباسىمەن جۇزدەسكەن ول تالانتىن تىنىمسىز ەڭبەكپەن ۇشتاستىرۋ ارقىلى ومىردە ماقساتقا جەتۋگە بولاتىنىن ۇعىندى. سودان باستاپ شەبەرلىگىن شىڭداۋعا قۇلشىنا كىرىسكەن ونىڭ جۇلدىزى «شولپانمەن» بىرگە جارقىراپ جاندى.
2009 جىلى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە تۋريزم مەنەدجەرى ماماندىعى بويىنشا وقۋعا تۇسكەن بالعىن قىز كوپ ۇزاماي ءوز تۇستارى اراسىندا دارالانا باستادى. الدىمەن قىز سىنى بايگەسىنە قاتىسىپ، «ۋنيۆەرسيتەت ارۋى» اتاندى. وقۋ ورنىنىڭ باس جۇلدەگەرى رەتىندە رەسپۋبليكالىق ارۋلار بايگەسىنە جولداما الدى. بۇل سايىس تەك كەلبەتتى ءارى ونەرپاز بولۋدى عانا ەمەس، اقىل مەن پاراساتتى، تانىم مەن تاپقىرلىقتى تالاپ ەتەتىنى بەلگىلى. ءوڭ-كەلبەتى كەلىستى، وي-ءورىسى جوعارى بويجەتكەندەردىڭ باسەكەسىندە ءبىزدىڭ كەيىپكەرىمىز «قازاقستاندىق ۆيتسە-ميسس» اتاعىن جەڭىپ الدى. بۇگىندە گۇلستان وماروۆا قازاق ەكونوميكا، قارجى جانە حالىقارالىق ساۋدا ۋنيۆەرسيتەتىنىڭ ماگيستراتۋراسىندا وقيدى. ەلباسىمەن كەزدەسۋ ءومىرىن وزگەشە ارناعا بۇرعان ارۋ قىزدىڭ شىعار بيىگى ءالى الدا.
Abai.kz
