استانادا اتوم ەلەكتر ستانتسياسىن سالۋ بويىنشا جاريا تالقى 20-شى تامىزدا وتەدى، - دەپ حابارلايدى Abai.kz.

بۇعان دەيىن جاريا تالقى قازاقستاننىڭ 19 قالاسىندا وتكەن. سول جاريا تالقىلار بارىسىندا قىزۋ پىكىر-تالاستار بولعان. اسىرەسە، الماتىدا وتكەن تالقى قوعام تالقىسىن تۋدىرعان.

ارينە، الماتى قازاقستان ساياساتىنىڭ «امپەرمەترى» دەسەك تە دۇرىس شىعار. ەل تاۋەلسىزدىگى ءۇشىن كۇرەستىڭ باسىندا تۇرعان الماتى وسىعان دەيىن سان ءتۇرلى ساياسي كەزەڭدەر مەن وقيعالاردى باستان وتكەرگەن. سوندىقتان الماتىمەن ساناسپاي، ارەكەت بولمايدى. بۇل انىق! ونىڭ ۇستىنە الماتىدا ادام كوپ. قازاقستاننىڭ وڭىرلەرىنەن جۇمىسشىلاپ كەلىپ، ءومىر ءسۇرىپ جاتقان نەمەسە ءبىلىم ىزدەپ كەلگەن جاستاردى قوسا ەسەپتەگەندە، 4 ميلليوننان اسا ادام بار. سايكەسىنشە، ساياساتكەرلەردىڭ دە شوق ورتاسى قالىپتاسقان جەر. الماتىدا سالا ماماندارى دا جەتەرلىك. قالاي دەسەك تە، اەس قۇرىلىسى تۋرالى رەفەرەندۋم سەكىلدى ەلىشىلىك ماڭىزدى ماسەلەدە الماتىنىڭ پىكىرى اجەپتاۋىر سالماققا يە!

بۇل ءبىر بولسا، ەكىنشى ماڭىزدى تالقى - ول ەلوردادا وتەتىن تالقى. ەلىمىزدىڭ ساياسي استاناسى. ەل تاعدىرىنداعى ماڭىزدى ءھام تاعدىرشەشتى شەشىمدەر قابىلداناتىن ورتا. سوندىقتان، استانادا وتەتىن تالقى نەگىزگى كۇشكە يە بولماق.

اەس بالقاش كولىنىڭ جاعاسىنداعى ۇلكەن اۋىلىندا سالىنۋى مۇمكىندىگى ايتىلىپ كەلەدى. اقپاراتقا قاراعاندا، اەس ارقايسىسىنىڭ قۋاتى 1200-1400 مۆت بولاتىن ەكى رەاكتوردان تۇرادى.

قازاقستان ۇكىمەتىنىڭ دەرەگىنشە، اتوم رەاكتورىن سالۋعا فرانتسيا، وڭتۇستىك كورەيا، قىتاي مەن رەسەي كومپانيالارىنىڭ ءبىرى تاڭدالۋى مۇمكىن.

بەلسەندىلەر اەس سالۋعا رەسەي كومپانياسى تاڭدالسا، بۇل قازاقستاننىڭ كورشى مەملەكەتكە ساياسي-ەكونوميكالىق تاۋەلدىلىگىن كۇشەيتەدى دەپ ەسەپتەيدى.

ولار اەس سالىناتىن بالقاش كولىنىڭ بولاشاعىنا دا الاڭدايدى. ەكولوگ مەلس ەلەۋسىزوۆ بۇعان دەيىن قازىر دامىعان ەلدەر جاسىل ەنەرگياعا كوشىپ، ەۋروپانىڭ بىرقاتار مەملەكەتتەرى اەس-تەن باس تارتىپ جاتقانىن ايتقان.

قازاقستاننىڭ بارلىق وڭىرىندە جاريا تالقى وتكەن سوڭ اەس سالۋ ماسەلەسى جالپىحالىقتىق رەفەرەندۋمعا شىعارىلادى. پرەزيدەنت قاسىم-جومارت توقاەۆ رەفەرەندۋم بيىل كۇزدە وتەتىنىن ايتقان. بىراق ازىرگە رەفەرەندۋم كۇنى بەلگىلەنگەن جوق.

Abai.kz