جاساندى زەردە مۇعالىمدى اۋىستىرا المايدى، بىراق كۇندەلىكتى جۇمىستىڭ ءبىر بولىگىن اتقارۋ ارقىلى مۇعالىمگە تۇسەتىن سالماقتى جەڭىلدەتەدى. قازاقستان ءۇشىن جاساندى زەردە – كەز كەلگەن بالانى ەڭ ۇزدىك وقۋ باعدارلامالارى جانە ماتەريالدارىمەن قامتاماسىز ەتۋ ارقىلى ءار ايماقتاعى جانە الەۋمەتتىك ساناتتاعى وقۋشىلاردىڭ ءبىلىم الۋ دەڭگەيىندەگى ايىرماشىلىقتى قىسقارتۋعا كومەكتەسەتىن مۇمكىندىكتەردىڭ ءبىرى. دەگەنمەن، جاساندى زەردەنى قولدانۋدا ەتيكا، قاۋىپسىزدىك جانە رۇقسات ەتىلگەن دۇنيەلەر تۇرعىسىنان قاجەت ەرەجەلەردى ەنگىزىپ، بالالارعا ۇيرەتۋ كەرەك.

پەداگوگتاردىڭ 2024 جىلعى رەسپۋبليكالىق تامىز ءسامميتى اياسىندا وتكەن «جاساندى زەردە داۋىرىندەگى كلاسسيكالىق ءبىلىم» پانەلدى سەسسياسىنا قاتىسقان ساراپشىلار وسىنداي پىكىردە. سەسسيانى Qalam Global كوپتۇعىرلى عىلىمي-تانىمدىق جوباسى ۇيىمداستىردى.

قاتىسۋشىلار ءبىرىنشى كەزەكتە بۇكىلالەمدىك ەكونوميكالىق فورۋم ماماندارىنىڭ جاساندى زەردە داۋىرىندەگى ءبىلىم تۋرالى زەرتتەۋىن تالقىلادى. زەرتتەۋدە جاساندى زەردەنىڭ جاقىن ارادا مۇعالىمنىڭ ورنىن باسا المايتىنى، الايدا ولاردىڭ كۇندەلىكتى جۇمىسىنىڭ 20-40%-ىن اۆتوماتتاندىرۋعا كومەكتەسە الاتىنى جايلى ايتىلعان بولاتىن.

سۋرەت Qalam Global ءباسپاسوز قىزمەتىنەن الىندى

جاساندى زەردە سالاسىنداعى مامان نيك ماكفلاي زەرتتەۋ قورىتىندىسىمەن كەلىسەدى. ول جاساندى زەردە مۇعالىمدى الماستىرمايتىنىن، تەك وعان كومەكشى بولا الاتىنىن اتاپ ءوتتى: «جاساندى زەردە ءوز بەتىمەن جۇمىس ىستەمەيدى. ول تەك مۇعالىمنىڭ قىزمەتىن تولىقتىرادى. بۇل قۇرالدىڭ كومەگىمەن وقۋشى مەن مۇعالىم اراسىنداعى بايلانىستى تەرەڭدەتە ءتۇسۋ مۇمكىن بولاتىن شىعار، سەبەبى جاساندى زەردە شىنىمەن كۇندەلىكتى قايتالاتىن جۇمىستى ءوز موينىنا الا الادى»، – دەيدى ساراپشى.

سۋرەت Qalam Global ءباسپاسوز قىزمەتىنەن الىندى

Bilim Media Group كومپانياسىنىڭ نەگىزىن قالاۋشى جانە باس ديرەكتورى راۋان كەنجەحانۇلىنىڭ ايتۋىنشا، قازاقستاندا مەكتەپ باعدارلاماسى تولىقتاي تسيفرلاندىرىلعان. بۇل جاساندى زەردە سەكىلدى جاڭا تەحنولوگيالار مەن قۇرالداردى پايدالانۋ ماسەلەسىنە بارىنشا دايىن بولۋعا مۇمكىندىك بەرەدى ەكەن. «جاساندى زەردە ءبىز ءۇشىن ۇلكەن مۇمكىندىك دەگەن پىكىردەمىن. ءبىز ءبىلىم ساپاسىندا اسا ۇلكەن ايىرماشىلىق بار ايماقتا، مەملەكەتتە ءومىر سۇرەمىز. وقۋشىلاردىڭ از عانا بولىگى جوعارى دەڭگەيدەگى بىلىمگە قول جەتكىزە الادى. ونىڭ ينفراقۇرىلىمعا بايلانىستى بارىمىزگە بەلگىلى سەبەپتەرى بار، ماسەلەن، بالالار ەكى-ءۇش اۋىسىممەن وقيدى. مۇنداي قيىندىقتاردى اقشامەن شەشە الاتىن ۇلكەن مەملەكەتتەردە جاساندى زەردە ءجاي عانا قىزىقتى دۇنيە دەڭگەيىندە قالسا جانە الداعى ۋاقىتتا دا سولاي دامي بەرسە، ءبىز ءۇشىن جاساندى زەردە – جاعدايدى جىلدام تۇردە تۇبەگەيلى وزگەرتۋگە جانە وسى ايتىلعان ءبىلىم ساپاسىنداعى ايىرماشىلىقتى قىسقارتۋعا ارنالعان ۇلكەن مۇمكىندىك. بالانىڭ قايدا تۇراتىنىنا قاراماستان، ونى ساپالى كونتەنتپەن جانە كومەكشىمەن قامتاماسىز ەتۋ مۇمكىندىگى»، – دەپ اتاپ ءوتتى ول.

سۋرەت Qalam Global ءباسپاسوز قىزمەتىنەن الىندى

حيميا ماگيسترى الينا الىمباەۆا قازىردىڭ وزىندە كوپتەگەن مۇعالىم جاساندى زەردەنى سىنىپتاعى ءار بالا ءۇشىن جەكە ازىرلەنگەن تاپسىرمالار دايىنداۋدان باستاپ وقۋشىلاردىڭ جازباشا جۇمىستارىن تەكسەرۋگە دەيىنگى الۋان ءتۇرلى ماقساتتا پايدالانىپ جۇرگەنىن ايتادى. «ءبارى مۇعالىمنىڭ ويلانۋ قاسيەتى ترانسفورماتسياعا ۇشىراعاننان باستالۋعا ءتيىس. ءار مۇعالىم مۇنىڭ ەشقايدا جوعالمايتىنىن جانە، جالپى العاندا، ودان الىپ بارا جاتقان قاتەردىڭ جوق ەكەنىن تۇسىنگەن كەزدە جاساندى زەردەنى كۇندەلىكتى جۇمىسقا قىزىقتى تۇردە ەنگىزۋگە بولادى. ءبىز مۇندا جاساندى زەردە مۇعالىمنىڭ ورنىنا ساباق بەرەدى دەپ وتىرعان جوقپىز، جاساندى زەردە كۇندەلىكتى ىستەردى اتقارۋعا كومەكتەسەدى دەپ وتىرمىز. ساباقتى ءبىز وتكىزەمىز. ال جاساندى زەردەنى بالاعا كوبىرەك ۋاقىت ءبولۋ ماقساتىندا، جۇمىسىزدى جەڭىلدەتۋ ءۇشىن پايدالانامىز»، – دەيدى وقىتۋشى.

سۋرەت Qalam Global ءباسپاسوز قىزمەتىنەن الىندى

قر وقۋ-اعارتۋ مينيسترلىگى قوعامدىق كەڭەسىنىڭ مۇشەسى ستانيسلاۆ كاۋروۆ جاساندى زەردەنى مۇعالىمدەردىڭ تۇرلىشە قابىلدايتىنىن ايتادى: «ءبىر جاعىنان، بۇل تەحنولوگيانى شىنىمەن قولدانىپ، جاساندى زەردەگە كۇندەلىكتى جۇمىسىنىڭ ءبىر بولىگىن تاپسىراتىن ارىپتەستەرىمدى كورىپ ءجۇرمىن. ەكىنشى جاعىنان، «جاساندى زەردە دەگەن جاقسى عوي، بىراق مەندە قۇرالدان تەك تاقتا مەن بور عانا بار» دەيتىن مۇعالىمدەر دە كەزدەسەدى. وسى بازالىق دەڭگەيدى جاۋىپ، شىنىمەن جاساندى زەردەگە دەگەن قىزىعۋشىلىقتى وياتاتىن، «بۇل نە؟»، «ونى شىنىمەن قالاي قولدانۋعا بولادى؟»، «جاساندى زەردە مەنىڭ مۇعالىمدىك قىزمەتىمدى قالاي جەڭىلدەتە الادى؟» دەگەن سۇراقتار قويۋعا يتەرمەلەيتىن كەلەسى دەڭگەيگە شىعۋ كەرەك».

جاساندى زەردە كومەگىمەن ءار وقۋشىنىڭ ەرەكشەلىگىن ەسكەرە وتىرىپ ساباق وتكىزۋ ماسەلەسىنە كەلگەندە ستانيسلاۆ كاۋروۆ جاڭا تەحنولوگيالارعا بەيىمدەلۋگە كەدەرگى بولىپ جاتاتىن ستاندارتتار مەن تالاپتار بار ەكەنىنە دە توقتالىپ كەتتى.

راۋان كەنجەحانۇلى بۇل سۇراقتىڭ تەك قازاقستاندا ەمەس، بۇكىل الەمدە كەزدەسەتىنىن ايتىپ ءوتتى: «رەتتەۋشى ورگان ءاردايىم كەشىگىپ جۇرەدى. بۇل زاڭدىلىق. باسقا سالالاردان دا كورىپ وتىرمىز. ماسەلەن، قارجى تەحنولوگيالارى باعىتىندا رەتتەۋشى نارىقتا پايدا بولعان دۇنيەلەردى كەيىن بارىپ زاڭداستىردى. EdTech-تە دە سول بولادى».

پانەلدى سەسسيا سپيكەرلەرى جاساندى زەردەنى ەتيكا اياسىندا جانە ورىندى قولدانۋ ماسەلەسىن دە تالقىلادى.

سۋرەت Qalam Global ءباسپاسوز قىزمەتىنەن الىندى

تاريحشى، Qalam.global جوباسىنىڭ باس رەداكتورى جار زاردىحاننىڭ ايتۋىنشا، باسقا سالالار سەكىلدى جاساندى زەردەنىڭ دە دامۋى بارىسىندا الدىمەن ۇلكەن كولەمدەگى اقپارات پايدا بولىپ، كەيىن ونىڭ ءبىر بولىگى كەرەكسىزدىگى سالدارىنان ىسىرىلىپ قالادى ەكەن. «تاريحشى رەتىندە ماعان جاساندى زەردەنىڭ قازىر ۇسىناتىن ۆيزۋال بەينەلەرى ۇنامايدى. XVI عاسىرداعى قازاقستاندى كورسەت دەسەڭ، ماسەلەن، پاگودانى سالىپ بەرۋى مۇمكىن. بۇل جاقسى ەمەس، ويتكەنى مۇنداي كونتەنت كوپكە جاريالانادى، اسىرەسە الەۋمەتتىك جەلىلەردە تارالادى، سالدارىنان قولدانۋشىلاردا قاتە پىكىر قالىپتاسادى. مىسالى، قازاق جاۋىنگەرى نەمەسە ونىڭ كيىمى قانداي بولدى دەگەن ماسەلەلەرگە قاتىستى. ارينە، جاساندى زەردە – وقىتىلاتىن جۇيە، ونىڭ ۇستىنە ونى جاساقتاۋ كەزىندە دە، قولدانۋ كەزىندە دە تۇزەتىپ وتىرا الامىز»، – دەيدى ول.

«جاڭا تەحنولوگيالاردى ەتيكا اياسىنا ورنىمەن قولدانۋ، ءىس-ارەكەت ەرەجەلەرى، قاۋىپسىزدىك ەرەجەلەرى ءار ءپان اياسىندا وقىتىلۋى كەرەك. بۇل ماسەلە ءبىرىنشى كەزەكتە رەتتەۋشى ورگانعا قاراستى جانە قازىر بۇل تاقىرىپتا تالقىلاۋلار كەڭىنەن ءجۇرىپ جاتىر»، – دەپ ايتىپ ءوتتى راۋان كەنجەحانۇلى.

ستانيسلاۆ كاۋروۆ مۇنداي ەرەجەلەردى بالالار تابيعي دۇنيە رەتىندە قابىلداۋى كەرەك ەكەنىن اتاپ ءوتتى: «ساباقتا نە ىستەۋگە بولاتىنى، نە ىستەۋگە بولمايتىنى جايلى كوپتەگەن اكت قابىلداي الامىز، بىراق وقۋشى ۇيىنە بارعاندا ول ەرەجەلەردى ساقتايتىنىن-ساقتامايتىنىن بىلە المايمىز. ارينە، بەلگىلى ءبىر ەرەجەلەر كەرەك، بىراق ولار قالىپتى ءىس رەتىندە قابىلدانۋعا ءتيىس، سەبەبى ءبىزدىڭ بالالار بۇل قۇرالدى تابيعي دۇنيە دەپ تانيدى».

بۇدان بولەك پانەلدى سەسسيا اياسىندا Qalam.global جوباسى ۇيىمداستىرعان رەسپۋبليكالىق ÖZIMIZ اۋىزشا اڭگىمەلەر بايقاۋى ءبىرىنشى ماۋسىمىنىڭ قورىتىندىسى جاريالاندى.

سۋرەت Qalam Global ءباسپاسوز قىزمەتىنەن الىندى

ءبىرىنشى ورىن مەن 1,5 ملن تەڭگەنىڭ سەرتيفيكاتى استانالىق مانسۇر ءسابيتۇلىنا ءبىر وتباسىنىڭ تاريحى تۋرالى جۇمىسى ءۇشىن بەرىلدى.

ەكىنشى ورىن (1 ملن تەڭگە) تاراز قالاسىندا تۇراتىن انار جۇماحان مەن تولعاناي بەكجاپاردىڭ «قاراساي شاتقالىنىڭ تاريحى» تۋرالى جۇمىسىنا تاعايىندالدى.

ءۇشىنشى ورىندى (500 مىڭ تەڭگە) ليانا توۆسۋلتانوۆا (قۇسمۇرىن، قوستاناي وبلىسى) «دەپورتاتسيا كەزىندە وتباسىمنىڭ تاريحى» ەڭبەگى ءۇشىن الدى.

سونىمەن قاتار ءۇش قاتىسۋشىعا Qalam.global رەداكتسياسى اتىنان ارنايى جۇلدە تاپسىرىلدى جانە تاعى ءۇش قاتىسۋشى وقىرماندار كوزايىمى جۇلدەسىنە يە بولدى.

انىقتامالىق اقپارات:

Qalam Global – الەم تاريحى مەن مادەنيەتىنە قازاقستان مەن ورتالىق ازيا ەلدەرىنىڭ كوزىمەن قارايتىن مۋلتيمەديالىق جاڭا جوبا. جوباعا قازاقستان، اقش، كانادا، ۇلىبريتانيا جانە رەسەيدەن كەلگەن حالىقارالىق زەرتتەۋشىلەر توبى قاتىسادى. Qalam جوباسى قازاق، ورىس جانە اعىلشىن تىلدەرىندە جارىق كورەدى.

ديماش زيادين

Abai.kz