كەشە ۋكراينا سىرتقى ىستەر مينيسترلىگى دابىل قاقتى، رەسمي مالىمدەمە جاسادى. «بەلارۋس بيلىگى شەكارا ماڭىنا اسكەر توپتاستىرىپ جاتىر»، - دەپ جاھان جۇرتىن قۇلاعدار ەتتى. بۇل تۋرالى Mezgil.kz اقپاراتتىق پورتالى جازدى. 

ۋكراينا ءسىم-ءى رەسمي مالىمدەمەدە نە دەدى؟ قاراڭىز:

ۋكراينا دابىل قاقتى: نە دەيدى؟

«ۋكراينانىڭ ارنايى قىزمەتى بەلارۋس اسكەرى جاتتىعۋ دەگەن جەلەۋمەن ۋكراينا شەكاراسىنا اسكەري كۇشىن توپتاستىرعانىن انىقتادى. اسكەري تەحنيكا، تانكتەر، ارتيللەريا، ينجەنەرلىك كولىكتەر جانە ت.ب. سولتۇستىك شەكارامىزعا جاقىن گومەل اۋدانىنا اكەلۋدە. سونىمەن بىرگە «ۆاگنەرلىكتەردىڭ» دە بارى انىقتالدى.

شەكارا سىزىعى ماڭىنداعى چەرنوبىل اەس-ىنە جاقىن تۇستا ۇلكەن اسكەردى توپتاستىرىپ، جاتتىعۋ وتكىزۋ ۋكراينانىڭ ۇلتتىق قاۋىپسىزدىگى مەن الەمنىڭ قاۋىپسىزدىگىنە قاتەر توندىرۋدە.

(سۋرەت: Reuters)

بەلارۋس رەسپۋبليكاسىنىڭ شەنەۋنىكتەرىن ماسكەۋدىڭ قىسىمىمەن ءوز ەلى ءۇشىن تراگەدياعا ۇلاسۋى مۇمكىن قاتەلىكتى جاساماۋعا شاقىرامىز. بەلارۋس تاراپىن مەملەكەتتىك شەكارامىزعا جاقىن تۇسقا اكەلگەن اسكەرىن اكەتۋگە شاقىرىپ وتىرمىز.

ۋكراينا ەشقاشان بەلارۋس حالقىنا قارسى قانداي دا ءبىر قاستىق ارەكەت جاساعان ەمەس، جاسامايدى دا. بەلارۋس تاراپىنان ءبىزدىڭ شەكارامىزدى بۇزىپ ءوتۋ ارەكەتى تىركەلسە، بۇۇ-نىڭ قورعانۋ قۇقىعىنا ساي ءبىزدىڭ ەلىمىز بارلىق قاجەتتى شارانى ىسكە اسىراتىنىن ەسكەرتەمىز.

ونداي ساتتە بەلارۋستاعى بارلىق توپتاسقان اسكەري كۇشتەر مەن نىساندار، اسكەردى جابدىقتاۋ ورتالىقتارى مەن قامتاماسىز ەتۋ مارشرۋتتارى ۋكراينا قارۋلى كۇشتەرىنىڭ زاڭدى نىساناسىنا اينالادى»، - دەدى ۋكراينا.

ۋكراينا تاراپى ۇسىنعان مالىمەتتەردەن ۇققانىمىز، بەلارۋس بيلىگى ۋكراينامەن شەكارالاس گومەل وبلىسىنىڭ اۋماعىنا اسكەري كۇشتەردى توپتاستىرعان. سونىڭ ىشىندە: تانكتەردى، ارتيللەريانى، «رسزو»، اشقق قۇرالدارىن جانە ينجەنەرلىك تەحنيكانى قوسا العاندا، ارنايى وپەراتسيالار كۇشتەرىن، قارۋ-جاراق پەن اسكەري تەحنيكانى شوعىرلاندىرعان.

(سۋرەت: president.gov.by)

لۋكاشەنو نەگە ءويتتى؟

بۇل دابىل 25 تامىز كەش باتا قاعىلدى. ال 24 تامىز كۇنى ۋكراينا تاۋەلسىزدىك كۇنىن اتاپ ءوتتى. 3 جىلعا تاياۋ ۋاقىت بويى وتاندى، تاۋەلسىز ۋكراينانى، وىنڭ حالقى مەن تەرريتورياسىن باسقىنشى رەسەي اسكەرىنەن دامىلسىز قورعاپ، جان اياماي كۇرەسىپ كەلە جاتقان ۋكراينا حالقىن العاشقىلاردىڭ ءبىرى بولىپ باسقا-باسقا ەمەس، بەلارۋس باسشىسى الەكساندر لۋكاشەنكو قۇتتىقتادى دەگەن اقپارات التى قۇرلىقتى شارلاپ كەتكەن ەدى.  شىنىمەن سولاي بولدى دا. بەلارۋس باسشىسى ارنايى جەدەلحات جولداپ، «ورتاق تاعدىر» ءھام «رەسەيمەن كەلىسسوزدەر» تۋرالى ءسوز قوزعاعان ەدى.

بەلارۋس اقپاراتتارى: 23 تامىزداعى جاعداي بويىنشا، ەلدىڭ وڭتۇستىك باعىتىندا 1 مىڭنان اسا اسكەر شوعىرلانعانىن، سوڭعى ۋاقىتتا گومەل وبلىسىنا بىرنەشە تىكۇشاق پەن شابۋىلداۋشى ۇشاقتار، سونداي-اق «بتر»، تانكىلەر مەن «س-300پس» ززك بار بىرقاتار بولىمشەلەر جىبەرىلگەنىن جازادى.

ۋكراينا اقپاراتتارى: بەلارۋس تارابى ۋكراينامەن شەكارا تۇبىنە 20-دان استام اسكەري بريگادا جەتكىزگەنىن جازادى. كەي دەرەكتەردە، بەلارۋس ءوز ارمياسىنىڭ 3/1 بولىگىن ۋكراينا شەكاراسىنا اكەلگەنى ايتىلادى.

بۇعان دەيىن بەلارۋس باسشىسى الەكساندر لۋكاشەنكو بەلارۋس شەكاراسىندا ۋكراينا قارۋلى كۇشتەرىنىڭ «ارانداتۋشىلىعى» تۋرالى جاھانعا جار سالعانىدا ءمالىم. 18 تامىزدا لۋكاشەنكو بەلارۋس اسكەرىنىڭ ۇشتەن ءبىر بولىگىن ۋكراينا شەكاراسىنا قاراي اپارۋ تۋرالى بۇيرىق بەرگەن. سول بۇيرىقتىڭ ورىندالعانى تۋرالى دەرەكتەر 25 تامىزدا جارىققا شىعىپ وتىر.

(سۋرەت: Telegraf)

سوعىس: ءبىرىنشى نىسان – موزىر مۇناي وڭدەۋ زاۋىتى

الەمدىك اقپارات بەتتەرىندە «بەلارۋس سوعىسقا ارالاسا ما»، «سوعىس بولا قالعان جاعدايدا، مايدان شەبىندەگى احۋال نە بولماق» دەگەن سۇراقتار قىزۋ تالقىلانا باستادى.

لۋكاشەنكو ۋكرايامەن شەكاراعا 20 بريگادا اسكەردى جونەلتكەنى بەلگىلى. ساراپشىلاردىڭ پىكىرىنشە، ۋكراينا دروندىق قارۋ-جاراقپەن جاقسى جاراقتانعان جانە ۋكراينادا بەلاۋرس اسكەرى ورنالاسقان قاشىقتىققا سوققى بەرۋگە قابىلەتتى سوققىلاۋشى دروندار مودەلدەردىڭ ۇلكەن ءتىزىمى بار. ونىڭ ۇستىنە كۋرسك وبلىسىنداعى ۇرىستارعا بايلانىستى قازىر رەسەي مەن بەلارۋس اراسىندا پويىزدار ۋاقىتشا توقتاعانى دا ۋكراينا پايداسىنا شەشىلەر فاكتور بولىپ تۇر.

«ەكى ەلدىڭ اراسىنداعى سوعىسقا الەكەدەي جالانىپ، كىرىسپەس بۇرىن ءوز ەلىڭدى ويلا» دەگەن كيەۆتىڭ اقىلى لۋكاشەنكونى ساباسىنا تۇسىرە قويار ما؟ الدە ول ءوز ەلىندە ورنالاسقان «ۆاگنەر» جاك-ءتىڭ قالعان-قۇتقان تامتىعىنا سەنىپ، سوعىسقا كىرىسپەك پە؟

بۇل ماسەلەگە قاتىستى ساراپشىلار پىكىرى ەكىۇشتى. ءبىر توبى: «شەكاراداعى جاعدايدىڭ وسىلايشا شيەلەنىسۋى اسكەري ەمەس، اقپاراتتىق جانە ساياسي ماقساتتاردى كوزدەيدى»، - دەسە، ەكىنشىلەرى: «بەلارۋس اسكەرىن ۋكراينا شەكاراسىنان 50 شاقىرىم قاشىقتىققا اكەلگەن. رەسەي بيلىگى دە ۋكرايناعا تولىققاندى سوعىس باستاماس  بۇرىن، اسكەري جاتتىعۋ دەگەن جەلەۋمەن ءوز اسكەرىن ۋكراينا شەكاراسىنا اكەلگەن ەدى. لۋكاشەنكو كرەمل قىسىمىمەن جاڭا فرونت اشۋى ابدەن مۇمكىن»، - دەيدى.

ساراپشىلار اراسىندا: «لۋكاشەنكو اگرەسسور رەتىندە تراگەديالىق كەيىپكەرگە اينالدى، ويتكەنى بۇل ونىڭ ساياسي ءولىمى بولىپ تابىلادى»، «بەلارۋس اسكەرىنىڭ جاۋىنگەرلىك دايىندىعى تەك وقۋ-جاتتىعۋلاردا سىننان وتكەن»، «ۆاگنەرشىلەر» بەلورۋستىق كۇش قۇرىلىمدارىندا نۇسقاۋشى رەتىندە ىرگە تەپتى، بىراق ولاردىڭ سانى مۇلدە از» جانە «بەلارۋستىڭ بىرقاتار ستراتەگيالىق كاسىپورىندارى ۋكراين ارتيللەرياسىنا قول جەتىمدى جەردە ورنالاسقان»، دەگەن پىكىرلەر دە ايتىلىپ جاتىر.

Abai.kz