ماسكەۋ مەن كيەۆ قازاقستاننىڭ ەاەس-تەگى يمپورت پوشليناسى ماسەلەسىن بيىل تاعى دا كوميسسياعا شىعارۋعا دەگەن نيەتىن جاقتىرماي وتىر. بۇل تۋرالى DALA INSIDE جازدى.

2022 جىلى بۇل تاقىرىپتى استانا دۇرىس كوتەرە الماعان بولاتىن. ەندى ءبىزدىڭ تاراپ ەسەپتەۋدىڭ جاڭا مەتوديكاسىن دايىنداپ، وسى مەتوديكانى ەۋرازيالىق ەكونوميكالىق كوميسسيادا بەكىتىپ الماق.

«جاڭا مەتوديكا قابىلدانسا، قازاقستان ۇلەسى ءبىرشاما وسەدى. سوندىقتان رەسەي مەن بەلارۋس تاراپى جاڭا مەتوديكانى قابىلداتپاۋعا تىرىسارى انىق. ءبىزدىڭ دەلەگاتسيانىڭ كەلىسسوزدەردەگى دايىندىعى مەن مىسى سول كەزدە بەلگىلى بولادى»، - دەيدى، DALA INSIDE دەرەككوزى.

جاڭا مەتوديكامەن قازاقستاننىڭ ساۋدا جانە ينتەگراتسيا مينيسترلىگى اينالىسۋدا. قازىرگى ۇلەس بويىنشا ەۋرازيالىق ەكونوميكالىق ايماققا يمپورتتالاتىن تاۋارلاردان جينالاتىن باج تۇسىمدەرىنەن قازاقستان – 6,955%، قىرعىزستان – 1,9%، ارمەنيا – 1,22%، بەلارۋس – 4,86%، رەسەي – 85,065% الىپ وتىر. بىراق ول بىرنەشە جىل بۇرىنعى كارتينانى ەسەپكە الىپ قابىلدانعان ەدى. قازىر جاعداي وزگەردى جانە بۇل ۇلەس پروپورتسيالارى قازاقستان ءۇشىن مۇلدە ءتيىمسىز.

ەۋرازيالىق ەكونوميكالىق كوميسسيا ءتارتىبى بويىنشا سوڭعى ەكى جىل ستاتيستيكاسى قارالادى. 2020 جىلى قازاقستاننىڭ سىرتقى ساۋدا اينالىمى 86,4 ميلليارد اقش دوللار دەڭگەيىندە تۇرسا، 2022 جىلدان باستاپ ديناميكاسى كۇرت ءوستى. 2023 جىلدىڭ قورىتىندىسى بويىنشا ساۋدا اينالىمى 140 ميلليارد دوللارعا جەتتى، ياعني، بىردەن 40 پايىزعا ارتقان. ونىڭ ىشىندە كەدەندىك باج سالىعى تولەنگەن يمپورت 61 ميلليارد دوللاردى كورسەتتى.

قازاقستانعا كەلەتىن يمپورت ءبىر جىلدا 20 پايىزعا ارتقان. ال رەسەيدە وسى كەزەڭدە سىرتقى ساۋدا اينالىمى 16 پايىزعا قىسقارعان.

Abai.kz