ىشكى ىستەر مينيسترلىگى جاستار اراسىنداعى بوپسالاۋ فاكتىلەرىن انىقتاپ، ولاردىڭ الدىن الۋدى ەرەكشە باقىلاۋدا ۇستايدى. وسى جىلى پوليتسيا قىزمەتكەرلەرى بوپسالاۋدىڭ 400-دەن استام دەرەگىن تىركەدى، ونىڭ 39-ى مەكتەپتەر مەن كوللەدجدەردە جاسالعان.

وقۋ ورىندارىندا 60 مىڭعا جۋىق پروفيلاكتيكالىق ءىس-شارا وتكىزىلدى، وندا بوپسالاۋ، بۋللينگ جانە زورلىق-زومبىلىق كورسەتۋمەن بايلانىستى ماسەلەلەر تالقىلاندى. مەكتەپتەر مەن كوللەدجدەردە ءانونيمدى ساۋالنامالار جۇرگىزىلىپ، وقۋشىلار اراسىندا بوپسالاۋدىڭ 50-دەن استام ىقتيمال فاكتىسى انىقتالدى. بارلىق جاعداي تەكسەرىلەتىن بولادى. مۇنداي فاكتىلەردى ۋاقىتىلى انىقتاپ، جولىن كەسۋ جاسوسپىرىمدەر قىلمىسىنىڭ الدىن الۋعا ىقپال ەتەدى. جىل باسىنان بەرى بوپسالاۋمەن اينالىساتىن 23 جاستار توبىنىڭ ارەكەتىنە توسقاۋىل قويىلدى. ماسەلەن، قىركۇيەك ايىندا اقتوبە قالاسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى كوللەدجدىڭ كامەلەتكە تولماعان ستۋدەنتىن ۇستادى. ول 15 جاستاعى جاسوسپىرىمنەن 50 مىڭ تەڭگە كولەمىندە اقشا بوپسالاعان. كۇدىكتى قۇرىقتالىپ، سوتقا دەيىنگى تەرگەۋ باستالدى.

«جامبىل وبلىسىندا ءجاسوسپىرىم جەكە دەرەكتەردى تاراتامىن دەپ قورقىتۋ ارقىلى ءوز قاتارلاستارىنان اقشا بوپسالاعان. وسىنداي 8 فاكت تىركەلىپ، قىلمىستىق ءىس سوتقا جىبەرىلدى. پەتروپاۆل قالاسىندا پوليتسيا قىزمەتكەرلەرى جاستار توبىنىڭ مۇشەلەرىن ۇستادى. ولار زورلىق-زومبىلىق پەن قورقىتۋ ارقىلى جابىرلەنۋشىلەردى قارىز راسىمدەۋگە ماجبۇرلەپ، كەيىننەن ونى قولما-قول اقشاعا اينالدىرىپ وتىرعان. كۇدىكتىلەر قاماۋعا الىندى. ەستەرىڭىزگە سالا كەتەيىك، قىلمىستىڭ بۇل ءتۇرى ءۇشىن 14 جاستان باستاپ قىلمىستىق جاۋاپكەرشىلىك قاراستىرىلعان. كامەلەتكە تولماعاندار اراسىنداعى قىلمىستىڭ الدىن الۋ ماسەلەسى ۇنەمى باقىلاۋدا»، - دەلىنگەن حابارلامادا.

Abai.kz