مەن ءسىزدى اشىق اڭگىمەگە شاقىرامىن...
مەن ءسىزدى ءوزىڭىز بەلگىلەگەن دەبات الاڭىندا كۇتەم!
قازاقستان رەسپۋبليكاسىنىڭ
مەملەكەتتiك كەڭەسشىسى
ە.ت. قارين مىرزاعا!
قۇرمەتتى ەرلان تىنىمبايۇلى!
ۇنەمى اشىق ايتىپ تا، جازىپ تا كەلە جاتىرمىن، ءسىز باس بولىپ جوباسىن جاساعان كونستيتۋتسيالىق رەفورما قازاقستاندى تيمۋر قۇلىباەۆ پەن كارىم ءماسىموۆتىڭ ۋزۋرپاتسياسىنان الىپ شىعا المادى.
سونىڭ كەسىرىنەن، مەملەكەت قاراجاتى سول بۇرىنعىداي، ميللياردتاپ تونالۋدا. ءبىر عانا سالادا ەمەس، بارلىق سالادا جەمقورلىق ۇدەي تۇسپەسە، باسەڭدەگەن جوق!
تامارا دۇيسەنوۆا باس بولىپ بەس جىلعا دەپ جوباسى جاسالعان «كوشى-قون تۇجىرىمداماسى» قولدانىسقا ەنىپ، ەكى جىلعا جەتپەي جاتىپ، ءبىر ميللياردتان استام تەڭگە ۇرلانعاننان كەيىن، نە سۇرايسىڭ! مويىنداساڭىز دا، مويىنداماساڭىز دا، شىندىق – وسى!
ءوزىڭىز جاقسى بىلەسىز، پرەزيدەنتىمىز بيىلعى جولداۋىندا ارنايى كوميسسيانىڭ 2 ميلليون ءىرى قارا جانە 3 ميلليوننان استام ۋاق مال ساندا بار، ساناتتا جوق ەكەنىن انىقتاعانىن، ەگىن شارۋاشىلىعى سالاسىندا دا وسىنداي جايتتار بار ەكەنىن ايتا كەلىپ، «شىن مانىندە، مۇنىڭ ءبارى – مەملەكەتتەن سۋبسيديا الۋ ءۇشىن جاسالعان كوزبوياۋشىلىق. ونداي قىلمىستىق ارەكەتتەرگە توسقاۋىل قويۋ قاجەت»، - دەدى.
مىنە، ءسىز باس بولىپ جوباسىن جاساعان كونستيتۋتسيالىق رەفورمانىڭ ناتيجەسى!
ءيا، قاسىم-جومارت كەمەلۇلى: «ونداي قىلمىستىق ارەكەتتەرگە توسقاۋىل قويۋ قاجەت»، - دەدى.
ەندەشە، پرەزيدەنتتىڭ بۇل تاپسىرماسى ءسوسىز ورىندالۋى كەرەك!
مال مەن جەرگە بەرىلەتىن سۋبسيدياعا قاتىستى جەمقورلىقتى جويۋ جانە قولدى بولعان جەردى ۇكىمەتكە قايتارۋ تۋرالى ماسەلەگە بايلانىستى رۋسلان جەلدىباي مەن بەرىك ۋاليگە ارنايى حات جازىپ، قاسىم-جومارت كەمەلۇلى ايتقان توسقاۋىل جونىندە ءوزىمنىڭ جوبامدى ۇسىندىم.
سونىمەن بىرگە، بۇل ماسەلەنى ءبىر اي بويى باق-تا، اسىرەسە رەسپۋبليكالىق، وبلىستىق تەلەارنالاردا كەشەندى تۇردە اشىق تالقى جۇرگىزۋدى سۇرادىم.
مەنىڭ ۇسىنعان جوبام مىناۋ:
الدىمەن الەۋمەتتىك-كاسىپكەرلىك كورپوراتسيالاردىڭ (سپك) قىزمەتىن توقتاتىپ، ونىڭ «اكتسيونەرلىك قوعامدار تۋرالى»، «مەملەكەتتىك مۇلىك تۋرالى»، «اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» جانە قر باسقا زاڭدارىمەن بەكىتىلگەن قۇقىقتارى مەن مىندەتتەرىن ءار دارەجەدەگى اكىمدەرگە بەرە وتىرىپ، اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ، سونداي-اق اۋىلدان «اۋىلدىق كەڭەس» قۇرۋ!
ول ءۇش قۇزىرەتتى تاراتىپ ايتسام:
ءبىرىنشى، اۋىلدىق وكرۋگ اكىمى ءوزى جەتەكشىلىك ەتەتىن اۋىلدىڭ جەرىن ءوزى باسقارۋ;
ەكىنشى، اۋداندىق، وبلىستىق جانە رەسپۋبليكالىق بيۋدجەتتەن بولىنەتىن قاراجاتتى اۋىلدىق وكرۋگ اكىمى، اۋىلدىق كەڭەستىڭ كەلىسىمىن الا وتىرىپ، ءوزى يگەرۋ;
ءۇشىنشى، اۋىل تۇرعىندارىنا بەرىلەتىن سۋبسيديالاردىڭ، گرانتتاردىڭ جانە قايتارىمسىز نەسيەلەر مەن تومەن ءوسىمدى نەسيەلەردىڭ كىمدەرگە بەرىلەتىنىن اۋىلدىق وكرۋگ اكىمى الدىن-الا بەلگىلەپ، سول اۋىلدىق كەڭەستىڭ كەلىسىمىن الا وتىرىپ، وكىمەتكە ۇسىنۋ. ءسويتىپ، مەملەكەتتەن بولىنگەن كومەك قاراجاتتاردىڭ يەسىنە بىردەن جەتۋىن قاماتاماسىز ەتۋ.
ءتىپتى كەرەك بولسا، اۋدان مەن وبلىستى رەسپۋبليكالىق بيۋدجەتتەن ايىرىپ، اۋىلدى تىكەلەي رەسپۋبليكالىق بيۋدجەتپەن قامتاماسىز ەتۋ ءتارتىبىن جولعا قويۋ.
بۇل جوباممەن ولجاس بەكتەنوۆ ەكەۋىڭىز بىلتىردان بەرى ەتەنە تانىسسىزدار. وسى جوبانى قولدانىسقا ەنگىزۋدى سۇراپ، سىزدەرگە جەتپىس بەتكە جاقىن حات جازدىم. ۇلكەن وكىنىشكە وراي، سىزدەر ونى قابىلدامادىڭىزدار!
نە وزدەرىڭىز ءتيىمدى جوبا ۇسىنىپ، قولدانىسقا ەنگىگەن جوقسىزدار!!
سوندىقتان، سىزگە بەرىك ءۋالي مەن رۋسلان جەلدىبايدىڭ جاۋابىن كۇتىپ وتىرماي-اق، مال مەن جەرگە بەرىلەتىن سۋبسيدياعا قاتىستى جەمقورلىققا قانداي توسقاۋىل قويۋ جانە قولدى بولعان جەردى ۇكىمەتكە قالاي قايتارۋ تۋرالى ماسەلەنى تالقىلاۋدى ءسىز ەكەۋىمىز ۋاقىت وتكىزبەي باستاي بەرەيىك دەگەن ۇسىنىس جاساعالى وتىرمىن.
قۇرمەتتى ەرلان تىنىمبايۇلى!
مەن ءسىزدى اشىق دەباتقا شاقىرامىن!
دەبات وتكىزەتىن كانالدى ءسىز تاڭداڭىز!
ماعان دەبات تەك تىكەلەي ەفير ارقىلى وتسە بولعانى.
قۇرمەتتى ەرلان تىنىمبايۇلى!
تاعى قايتالاپ ايتايىن، وتكەن بەس جىلدىق تاجىريبە انىق كورسەتتى، پرەزيدەنت قانشا تاپسىرما بەرگەنىمەن، قۇزىرلى ورگاندار، مينيسترلەر مەن اكىمدەر جەمقورلىقتىڭ بۇل ەكى سالاسىنا ەشقانداي توسقاۋىل قويا المايتىنى بەلگىلى بولدى.
ۇستالىپ، قاماۋعا الىنعاندار – شورتاندار ەمەس، كىلەڭ مايشاباقتار. قىسقاسى، بۇل – ءوزارا سىبايلاسىپ، جىمداسىپ كەتكەن جۇيە بولىپ تۇر...
وسى بەتى كەتە بەرەتىن بولسا، مەملەكەت قارجىسىنىڭ ميللياردتتاپ تونالعانى – تونالعان!
جەمقورلىقتىڭ بۇل ەكى سالاسىنا توسقاۋىل قويۋ ماسەلەسىن شەشۋدىڭ ەكى جولى بار.
ءبىرىنشى جولى، ءوزىڭىز باس بولىپ جوباسىن جاساۋ ارقىلى پارلامەنت قابىرعاسىندا شەشۋ;
ەكىنشى جولى، حالىق ارقىلى شەشۋ.
ەلىمىزدە جەمقورلىق شەگىنەن اسىپ كەتتى، حالىقتىڭ شىدامى تاۋسىلىپ بارادى.
«ەلدەگى ماسەلەلەر كوشەدە ەمەس، پارلامەنتتە شەشىلۋى كەرەك!»، - دەپ، پرەزيدەنتىمىز قاسىم-جومارت توقاەۆ باياعىدا ايتتى عوي.
ەندەشە، ءسىز بەن ءبىز بىرلەسىپ، قاسىم-جومارت اعامىزدىڭ وسى تاپسىرماسىنىڭ ابىرويمەن ورىندالۋىنا بارىمىزدى سالىپ كومەكتەسەيىك!
مەن ءسىزدى ءوزىڭىز بەلگىلەگەن دەبات الاڭىندا كۇتەم!
قۇرمەتپەن،
اۋىت مۇقيبەك،
«ەرەن ەڭبەگى ءۇشىن» مەدالىنىڭ،
«قۇرمەت» وردەنىنىڭ يەگەرى
Abai.kz
