باس پروكۋراتۋرادا ەقىۇ باعدارلامالار ءوفيسىنىڭ كومەگىمەن «ازاماتتىق تاركىلەۋ اكتيۆتەردى قايتارۋدىڭ نەگىزگى تەتىگى رەتىندە: قولدانۋ پەرسپەكتيۆالارى مەن الەمدىك تاجىريبە» اتتى تاقىرىبىندا حالىقارالىق عىلىمي-پراكتيكالىق كونفەرەنتسيا ءوتتى.

قازاقستان رەسپۋبليكاسىنىڭ باس پروكۋرورى بەرىك اسىلوۆ، سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي جانە استانا قالاسىنداعى ەقىۇ باعدارلامالار ءوفيسىنىڭ باسشىسى ەلشى فولكەر فروبارت قاتىسۋشىلاردى قارسى الىپ، تاقىرىپتىڭ وزەكتىلىگىن اتاپ ءوتىپ، كونفەرەنتسيا تاجىريبە مەن ءبىلىم الماسۋدىڭ ماڭىزدى الاڭىنا اينالاتىنىنا سەنىم ءبىلدىردى.

باس پروكۋرور بەرىك اسىلوۆتىڭ سوزىمەن ايتقاندا: «ازاماتتىق تاركىلەۋ قۇرالىن قولدانۋ پراكتيكاسى مەن ءتۇرلى ەلدەردىڭ زاڭدارىنىڭ ءوز ەرەكشەلىكتەرى بار، دەگەنمەن ولاردىڭ ماقساتى ءبىر – ول مەملەكەتتىڭ مۇددەسىن قامتاماسىز ەتۋ».

ءىس-شاراعا ەقىۇ جانە بۇۇ ەقب، حالىقارالىق زاڭگەرلەر قاۋىمداستىعى (ۇلىبريتانيا), بازەلدىڭ باسقارۋ ينستيتۋتىنىڭ (شۆەيتساريا) وكىلدەرى، بولگاريا، يسپانيا جانە پورتۋگاليادان كەلگەن جەتەكشى شەتەلدىك ساراپشىلار، سوت تورەلىگى، قۇقىق قورعاۋ جانە قارجى مونيتورينگى اكادەميالارىنىڭ باسشىلارى مەن عالىمدارى، سونداي-اق بەيىندى مەملەكەتتىك ورگانداردىڭ قىزمەتكەرلەرى قاتىستى.

سپيكەرلەر شەتەلدىك تاجىريبەسىن ەسكەرە وتىرىپ، ازاماتتىق تاركىلەۋدى قولدانۋدىڭ وزەكتى ماسەلەلەرىن، سونداي-اق اكتيۆتەردى قايتارۋ تۋرالى زاڭنىڭ نەگىزگى ەرەجەلەرىن، ونىڭ ىشىندە پايدا بولۋى تۇسىنىكسىز بايلىق تۋرالى تالاپ قويۋ ءتارتىبىن رەتتەيتىن ماسەلەلەردى سيپاتتادى.

حالىقارالىق ساراپشىلار بۇكىل الەمدە قولدانىلاتىن سىبايلاس جەمقورلىقپەن كۇرەسۋگە باعىتتالعان ازاماتتىق تاركىلەۋ ءراسىمىنىڭ تيىمدىلىگى جايلى ۇستانىمىن ءبىلدىردى.

كونفەرەنتسيا اياسىندا قازاقستان رەسپۋبليكاسى باس پروكۋرورىنىڭ استاناداعى ەقىۇ باعدارلامالار ءوفيسىنىڭ باسشىسىمەن ەكىجاقتى كەزدەسۋى ءوتتى.

تاراپتار قازىرگى زامانعى سىن-قاتەرلەرگە، ونىڭ ىشىندە تەرروريزم مەن ادام ساۋداسىنا، كيبەر جانە ەسىرتكى قىلمىسىنا قارسى ءىس-قيمىل، سونداي-اق سىبايلاس جەمقورلىققا قارسى كۇرەس جونىندەگى باستامالاردى ىسكە اسىرۋدا ودان ءارى ىنتىماقتاستىقتى نىعايتۋعا دايىن ەكەندىكتەرىن ءبىلدىردى.

Abai.kz