رەسەي اسكەريلەرىنىڭ اراسىندا ۋكراينانىڭ دونەتسك وبلىسىنداعى ۋگلەدار قالاسىن قورشاپ، باسىپ العاننان كەيىن باس ارازدىق پايدا بولا باستادى، دەپ جازادى ارنايى قىزمەتتەرگە جاقىن رەسەيلىك تەلەگرام-ارنالار.

«اسكەريلەردىڭ ءبىر بولىگى (ولاردىڭ ىشىندە - بىرنەشە گەنەرال) ۋگلەداردى العاننان كەيىن ءبىزدىڭ دونەتسك وبلىسى اۋماعىنداعى شابۋىلىمىزدى ۋاقىتشا توقتاتۋ كەرەك دەپ سانايدى. ۋگلەداردا اسا زور ادام شىعىنى بولدى. بىزدە سوڭعى بىرنەشە كۇندە 500-دەن استام ادام قازا تاۋىپ، اۋىر جارالاندى. جويىلعان ونداعان تەحنيكا تۋرالى جاق اشپايمىز. اسكەرگە دەمالىس كەرەك، ايتپەسە جاڭا جەتىستىكتەرگە جەتۋ قيىن بولادى»، - دەدى باس شتابتاعى دەرەككوز.

باس شتابتاعى دەرەككوزدىڭ ايتۋىنشا، اسكەري توپ ۆلاديمير پۋتيننەن جاۋىنگەرلەرگە دەمالىس بەرىپ، شابۋىلدى ۋاقىتشا توقتاتۋدى سۇرايدى.

«ۋگلەدارعا ءبىز اسكەر جەمىنىڭ ارقاسىندا كىردىك. ءبىزدىڭ جانىن شۇبەرەككە تۇيگەندەردىڭ ءولى دەنەسىن كورگەندە - توبە شاشىڭ تىك تۇرىپ، كوپكە دەيىن ەسىڭدى جيىپ، وزىڭە ءوزىڭ كەلە الماي قالاسىڭ»، - دەيدى قالا ءۇشىن شايقاسقا قاتىسقان وفيتسەر.

بۇل ۇسىنىس رەسەي اسكەري باسشىلىعىنداعىلاردىڭ كەيبىرىنىڭ جىنىنا ءتيىپ، اشۋلاندىردى.

«ءالسىز ادامدار توقتاعىسى كەلە مە؟ ولار ساتقىندار! ولارعا امەريكالىقتار نەمەسە كيەۆ رەجيمى وسى سوزدەردى اۋىزعا العاندارى ءۇشىن اقشا تولەگەن-تولەمەگەنىن تەكسەرۋ كەرەك. ۆلاديمير ۆلاديميروۆيچتەن وسى ادامداردى جازالاۋدى سۇرايمىز»، - دەدى قورعانىس مينيسترلىگىندەگى دەرەككوز.

بۇعان مايداندا جۇرگەن اسكەريلەر:

«كابينەت گەنەرالدارى، ارينە، قىلىشتارىن وڭدى-سولدى سىلتەۋگە دايىن. وسىندا كەلىپ سوعىسسىن»، - دەپ جاۋاپ بەردى.

جۇزدەگەن ۋكرايندىق اسكەري تۇتقىنعا ءتۇستى

«رەسەيلىكتەر ۋگلەداردى قورشاپ العاننان كەيىن جۇزدەگەن قارۋلى كۇشتەر قورشاۋدا قالدى»، - دەپ جازادى The Telegraph.

2,5 جىل بويى ۋگلەدار ۋكراينانىڭ وڭتۇستىك دونباسستاعى قورعانىسىنىڭ نەگىزى بولدى. سويتكەن ۋگلەدار كەشە رەسەي باقىلاۋىنا ءوتتى.

The New York Times: «وسى قالانىڭ رەسەيلىك شابۋىلدى تەجەۋدەگى ءرولىن ەسكەرسەك، ۋگلەدارداعى جەڭىلىس ۋكراين اسكەريلەرى ءۇشىن ستراتەگيالىق دا، سيمۆولدىق دا سوققى بولادى،»، - دەپ جازادى.

ۋگلەداردان ايرىلۋ رەسەيلىكتەرگە ماڭىزدى لوگيستيكالىق توراپ بولىپ تابىلاتىن پوكروۆسك باعىتىنداعى شابۋىلداردى كۇشەيتۋگە مۇمكىندىك بەرەدى. بۇدان باسقا، بۇل وڭتۇستىك ۋكراينا ارقىلى قىرىمعا باراتىن رەسەيلىك جابدىقتاۋ جەلىلەرىنە قىسىمدى باسەڭدەتەدى، سونداي-اق رەسەيلىك اسكەرلەردىڭ ۋگلەداردىڭ سولتۇستىگى مەن باتىسىنا قاراي قورعالعان كەيبىر اۋداندار مەن اۋىلدارعا شابۋىل جاساۋىنا مۇمكىندىك بەرەدى.

Abai.kz