بۇگىن قر ورتالىق  سايلاۋ كوميسسياسى اۋماقتىق رەفەرەندۋم كوميسسيالارىنىڭ حاتتامالارى نەگىزىندە 2024 جىلعى 6 قازاندا وتكەن رەسپۋبليكالىق رەفەرەندۋمنىڭ تۇپكىلىكتى قورىتىندىسىن جاريالادى.

كەشە 7 قازاندا رەفەرەندۋم كوميسسياسىنىڭ بريفينگىندە رەفەرەندۋمنىڭ الدىن الا ناتيجەسى جاريا ەتىلگەن ەدى.

«رەفەرەندۋمعا قاتىسۋ قۇقىعى بار قر ازاماتتارىنىڭ جالپى سانى – 12 ملن 284 487 ادامدى قۇرادى. ولاردىڭ 63,66 پايىزى نەمەسە 7 820 204 داۋىس بەرۋگە قاتىستى. وسىلايشا رەفەرەندۋمعا قاتىسۋ قۇقىعى بار ازاماتتاردىڭ جارتىسىنان كوبى داۋىس بەرۋگە قاتىستى. وسىلايشا، رەسپۋبليكالىق رەفەرەندۋم تۋرالى كونستيتۋتسيالىق زاڭ نورمالارىنا سايكەس، رەفەرەندۋم وتكىزىلدى دەپ سانالادى»، - دەدى ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ.

سۋرەت قر وسك سايتىنان الىندى.

داۋىس بەرۋگە قاتىسقان ازاماتتاردىڭ 71,12 پايىزى نەمەسە 5 561 937 ادام قازاقستاندا اتوم ەلەكتر ستانتسياسىن سالۋ ماسەلەسىن قولدادى.

ال قارسى داۋىس بەرگەندەر سانى – 2 045 271 ادامدى قۇرادى.

«جارامسىز دەپ تانىلعان بيۋللەتەندەر سانى – 130 267. جاۋاپتاردىڭ ەكى نۇسقاسى دا تاڭدالعان، ياعني جارامدى دەپ تانىلعان، بىراق داۋىس ساناۋ كەزىندە ەسەپكە الىنبايتىن بيۋللەتەندەر سانى – 82 729 بيۋللەتەندى قۇرادى. وسىلايشا، قازاقستاندا اەس سالۋ تۋرالى رەفەرەندۋمدا قويىلعان ماسەلە بويىنشا شەشىم قابىلداندى دەپ سانالادى»، - دەدى ن. ءابدىروۆ.

ەلدى الاڭداتىپ وتىرعان سۇراقتىڭ ءبىرى اەس قۇرىلىسىن قاي مەملەكەت سالادى؟

بۇل سۇراققا پرەزيدەنت قاسىم -جومارت توقاەۆ: «بۇل بىردەن جاۋابىن بەرەتىن وڭاي سۇراق ەمەس. ۇكىمەت تالداۋ جۇمىسىمەن شۇعىلدانىپ، ءتيىستى كەلىسسوزدەر جۇرگىزۋگە ءتيىس. مەنىڭ جەكە كوزقاراسىم بويىنشا، قازاقستاندا وتە وزىق تەحنولوگياعا يە كومپانيالاردان تۇراتىن حالىقارالىق كونسورتسيۋم جۇمىس ىستەۋى قاجەت. ودان ارى قاراي ءومىر كورسەتەدى»، – دەپ جاۋاپ بەرگەن ەدى.

ساراپشىلاردىڭ ايتۋىنشا، اەس قۇرىلىسىن سالۋعا رەسەي، قىتاي، فرانتسيا، وڭتۇستىك كورەيا مەملەكەتتەرى ءوتىنىش ءبىلدىرىپ وتىر. ال كۇنى كەشە اقش قازاقستانعا اەس سالۋعا نيەتتى ەكەنىن ءبىلدىردى.

Abai.kz