مارقۇمنىڭ تۋىستارىنىڭ ايتۋىنشا، جانجال ءجاسوسپىرىمنىڭ وتباسىنا تيەسىلى دۇكەندە باستالعان. ساتىپ الۋشى سىرا الىپ، اقشا تولەمەگەن. ەكى ارادا تۋىنداعان كيكىلجەڭنەن كەيىن ساتىپ الۋشى ءبىر توپ ادامدى شاقىرىپ، ءجاسوسپىرىمدى سوققىعا جىققان.

ءجاسوسپىرىمنىڭ اكەسى قر باس پروكۋرورى بەرىك اسىلوۆقا ۇندەۋ جاساپ، تەرگەۋ مەن سوتتىڭ اشىق بولۋىن تالاپ ەتتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس  ەرەكشە باقىلاۋدا ەكەنىن رەسمي تۇردە حابارلادى. سونداي-اق پروكۋراتۋرا مالىمەتىنە سايكەس، قىلمىس جاسادى دەگەن كۇدىك بويىنشا جەتى كۇدىكتى ۇستالىپ، 2 اي مەرزىمگە قاماۋعا الىندى.

– وسى جىلدىڭ 4 قازانىندا تالعار قالاسىندا توبەلەس بولىپ، قالانىڭ 16 جاستاعى تۇرعىنى پىشاق جاراقاتىنان قايتىس بولىپ، ەكى ازامات اۋىر دەنە جاراقاتىن الدى. مارقۇمنىڭ وتباسى مەن جاقىندارىنا كوڭىل ايتامىز. ءبىز بارلىق جاعدايلاردى انىقتاۋعا جانە كىنالىلەردى جاۋاپكەرشىلىككە تارتۋعا باعىتتالعان وبەكتيۆتى تەرگەۋگە كەپىلدىك بەرەمىز. بارلىق ازاماتتى وسى قىلمىسقا قاتىسى بار ادامداردى جاۋاپكەرشىلىكتەن الىپ تاستاۋعا ەشقانداي ارەكەت جاسالمايتىنىنا سەندىرگىمىز كەلەدى. تەرگەۋگە كومەكتەسەتىن كەز كەلگەن اقپاراتى بار ءار ادامدى پروكۋراتۋرا نەمەسە ىشكى ىستەر ورگاندارىنا جۇگىنۋگە شاقىرامىز، - دەپ حابارلادى پروكۋراتۋرادان.