الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءححىى وتىرىسىندا كەلەسى جىلى استانا قالاسىندا وتەتىن VIII سەزدىڭ نەگىزگى تاقىرىبى انىقتالدى.

«كەلەسى جىلى الەمدىك جانە ءداستۇرلى دىندەر كوشباسشىلارىنىڭ VIII سەزىن وتكىزەتىنىمىزدى ەستەرىڭىزگە سالۋعا رۇقسات ەتىڭىزدەر. وسىعان بايلانىستى سول سەزدىڭ ءبىز پلەنارلىق وتىرىستىڭ جانە ءتورت پانەلدىك سەسسياسىنىڭ تاقىرىبىن انىقتاۋىمىز كەرەك. الداعى سەگىزىنشى سەزدىڭ ورتالىق تاقىرىبى رەتىندە «دىندەر ديالوگى: كەلەشەك جولىنداعى سينەرگيا» دەگەن اتاۋ ۇسىنىلادى. قازىرگى زاماندا حالىقارالىق ۇيىمدار مەن ساياسي كوشباسشىلاردىڭ بەيبىتشىلىك پەن قاۋىپسىزدىكتى قامتاماسىز ەتۋ جولىنداعى مىندەتتەردى ءاردايىم مۇلتىكسىز ورىنداپ جاتپاعانىن كورىپ وتىرمىز. سوندىقتان قازىر ءدىننىڭ الەۋەتىن ديالوگتارعا ىقپال ەتىپ، مەملەكەتتەر مەن حالىقتار اراسىندا تۇسىنىستىك ورناتۋعا پايدالانۋ بۇرىن-سوڭدى بولماعان دەڭگەيدە وزەكتى بولىپ وتىر»، - دەدى حاتشىلىق باسشىسى – سەنات توراعاسى ماۋلەن اشىمباەۆ.

سونداي-اق ول جەرگىلىكتى ءدىن كوشباسشىلارىنىڭ كۇشى جىگەرىن الەمدەگى ىرگەلى پروبلەمالاردى شەشۋ جولىندا بىرىكتىرۋ كەرەكتىگىن ايتتى.

«پانەلدىك سەسسيالاردىڭ تاقىرىپتارى دا عالامنىڭ كۇن تارتىبىندە تۇرعان وزەكتى ماسەلەلەرگە ارنالادى. ولاردىڭ ىشىندە ادامزاتتى ۇيىستىرۋداعى جانە الەمدى ورنىقتى دامىتۋداعى ءدىننىڭ ءرولى، تسيفرلاندىرۋ داۋىرىندە رۋحاني قۇندىلىقتاردى ساقتاۋ، ەكسترەميزممەن كۇرەس سياقتى ماسەلەلەر بار»، - دەدى م. اشىمباەۆ.

حاتشىلىق مۇشەلەرى ۇسىنىلعان تاقىرىپتىڭ ءبارىن قولداپ داۋىس بەردى.

سونىمەن الەمدىك جانە ءداستۇرلى دىندەر كوشباسشىلارىنىڭ VIII سەزى 2025 جىلدىڭ 17-18 قىركۇيەگىندە وتەتىن بولدى. ال، حاتشىلىقتىڭ وتىرىسى 16 قىركۇيەككە بەلگىلەندى.

Abai.kz