سەناتور دارحان قىدىرالى ەلىمىزدەگى جاستار اراسىنداعى زورلىق-زومبىلىق پەن قىلمىستىڭ ءوسىپ كەلە جاتقانى تۋرالى دەپۋتاتتىق ساۋال جولدادى، دەپ جازدى BAQ.KZ.

دەپۋتاتتىڭ ايتۋىنشا، بيىلعى توعىز ايدىڭ كورسەتكىشى بويىنشا كامەلەتكە تولماعاندار اراسىنداعى قىلمىس سولتۇستىك قازاقستان، پاۆلودار، ۇلىتاۋ، اقتوبە، اتىراۋ، ماڭعىستاۋ وبلىستارى مەن استانا، الماتى، شىمكەنت قالالارىندا ارتا تۇسكەن. سەناتور ەلىمىزدە ورىن العان زورلىق-زومبىلىقتى، اقتاۋداعى جاستار توبەلەسى مەن اقتوبەدەگى ءجاسوسپىرىمدى اياۋسىز ولتىرگەنىن جانە قوعامدىق الاڭداۋشىلىق تۋعىزاتىن باسقا دا وقيعالاردى مىسالعا كەلتىردى. جاستار اراسىنداعى پروبلەمالار بىزدە عانا ەمەس، جالپى الەم جۇرتشىلىعىنىڭ الاڭداۋشىلىعىن تۋعىزىپ وتىر. سوندىقتان دامىعان ەلدەردە جاستار، جاڭا ۇرپاق تۋرالى اۋقىمدى زەرتتەۋلەر جۇرگىزىلەدى. ەلىمىزدە بۇل تاقىرىپ عالىمدار نازارىنان تىس قالۋدا.

ماسس-مەدياداعى باسىم كۇش كۋلتى، تانىمال سەريالدار مەن باسقا دا فورمالار ارقىلى اگرەسسيانىڭ ناسيحاتتالۋى قاتىگەزدىكتى ورشىتە تۇسەتىنى ايان. الەۋمەتتىك جەلىلەر ارقىلى كەڭ تارالعان ويىندار جاستاردىڭ تانىمى مەن تالعامىن قالىپتاستىرادى. سونىمەن قاتار اتا-انانىڭ مەيرىمىن سەزىنبەۋ، وتباسىداعى ءتۇرلى كيكىلجىڭ مەن تراۆما، ءبىلىم وشاقتارى مەن تاربيە ورىندارىندا جاستارعا سوتسياليزاتسيا مودەلىن ۇسىنا الماۋ سياقتى سەبەپتەردى دە جوققا شىعارا المايمىز. تالىمگەردىڭ ايلىعى تومەن، سىنىپ جەتەكشىلىگىنە تولەنەتىن اقى از. ورتاشا 10 مەكتەپكە 1 يسپەكتوردان عانا كەلەدى، - دەدى سەناتور.

Abai.kz