قازاقستاندا ءاربىر ءتورتىنشى ادامنىڭ مىندەتتى زەينەتاقى جارنالارى جوق. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ۇكىمەت ساعاتىندا ءمالىم ەتتى.

ء"بىزدىڭ مينيسترلىكتىڭ اي سايىنعى دەرەكقور مونيتورينگى ۇلتتىق جوبالار شەڭبەرىندە جۇمىسقا ورنالاستىرىلعان ءاربىر ءتورتىنشى ادامنىڭ مىندەتتى زەينەتاقى جارنالارى جوق ەكەنىن كورسەتىپ وتىر. بۇدان ءارى، پلاتفورمالىق جۇمىسپەن قامتۋدى كەڭەيتۋ ماسەلەسى. بۇل – ەكونوميكانى تسيفرلاندىرۋ ارقىلى پايدا بولعان الەمدىك ترەند", – دەدى مينيستر.

"2023 جىلى ناقتى زەينەتاقى اۋدارىمدارىنىڭ دەرەكتەرى بويىنشا ەسەپتەلگەن ەڭبەكاقى تولەۋ قورىنىڭ كولەمى 20 ترلن تەڭگەنى قۇرادى. ءوز كەزەگىندە، ۇلتتىق ستاتيستيكا بيۋروسىنىڭ باعالاۋى بويىنشا ەڭبەكاقى تولەۋ قورى ەكى ەسەگە جۋىق – 38 ترلن تەڭگە. ەڭبەكاقى قورى بويىنشا دەرەكتەردىڭ ەداۋىر الشاقتىعى ساۋدا، اۋىل شارۋاشىلىعى جانە جىلجىمايتىن مۇلىك سەكتورلارىندا بايقالادى", – دەدى سۆەتلانا جاقىپوۆا.

ءمينيستردىڭ مالىمەتىنشە، ەڭبەك نارىعىنىڭ نەگىزگى كورسەتكىشتەرىنىڭ ءبىرى – جۇمىس كۇشى. سوڭعى 5 جىلدا 420 مىڭ ادامعا وسكەن. ءبىر جاعىنان، بۇل جاعداي قازاقستان حالقىنىڭ جاس تۇرعىسىنان الەمدەگى ەڭ «جاس حالىقتاردىڭ» ءبىرى بولۋى سەبەبىنەن (237 مەملەكەت اراسىندا 106-ورىن) قالىپتاسىپ وتىر.

Abai.kz