تامارا دۇيسەنوۆانىڭ باستاماسىمەن «قازاقستان رەسپۋبليكاسى كوشى-قون ساياساتىنىڭ 2023 – 2027 جىلدارعا ارنالعان تۇجىرىمداماسىنا» ەنگەن «اتا جولى» كارتاسىنىڭ اتى بار، زاتى جوق جوبا ەكەنى تۋرالى ايتىپ، جازىپ كەلە جاتقانىمىزعا ءبىراز ۋاقىت بولدى.

ءيا، «اتا جولى» كارتاسى – كىلەڭ ساۋاتسىزدار جاساعان اتى بار، زاتى جوق، شيكى جوبا!

اتالعان كارتانى العان ەتنيكالىق قازاقتاردىڭ زاڭدى قۇقىقتارى مەن مىندەتتەرى جوق! ەشبىر زاڭمەن بەكىتىلمەگەن!

قۇقىقتارى مەن مىندەتتەرى زاڭمەن بەكىتىلمەگەن ەتنيكالىق قازاقتار ول كارتانى العانىمەن، ايتىڭىزشى، نە ىستەي الادى؟!

سوعان قاراماستان، «وتانداستار قورى» وتكىزگەن شەتەلدەگى قازاقتاردىڭ ەكى رەتكى «كىشى قۇرىلتايىنا» جانە استانادا وتكەن «وتانداستار فورۋمىنا»  پرەزيدەنتىمىز قاسىم-جومارت كەمەلۇلى كەڭەسشىسى مالىك وتارباەۆ ارقىلى ءۇش مارتە «قۇتتىقتاۋ حاتىن» جولداپ، ءۇش مارتە: «قازاقستان ازاماتتىعى مەن قانداس مارتەبەسىن الۋ ءتارتىبى جەڭىلدەتىلدى. شەتەلدەگى قازاق كاسىپكەرلەرى ءۇشىن ارنايى «اتا جولى» كارتاسى ەنگىزىلدى...», - دەدى.

پرەزيدەنتكە مۇلدە جالعان مالىمەت بەرىپ، شىلعي وتىرىك ايتقىزىپ وتىر!

ءبىرىنشى، «حالىقتىڭ كوشى-قونى تۋرالى» زاڭىنداعى اتى شۋلى 20-باپتىڭ 5) تارماعى ارقىلى ۇكىمەت ايقىنداعان سەگىز وبلىستان وزگە توعىز وبلىس پەن الماتى، استانا، شىمكەنت – ءۇش قالاعا ءوز بەتىمەن كوشىپ كەلىپ قونىستانعىسى كەلەتىن ەتنيكالىق قازاقتارعا «قانداس» مارتەبەسىن بەرىلمەيتىن ەتىپ تاستادى;

ەكىنشى، بۇرىن بەس جۇمىس كۇنى ىشىندە بەرىلىپ كەلگەن «قانداس» مارتەبەسىن وتىز بەس كۇندە بەرىلەتىن ەتىپ، جاڭا ءتارتىپ ەنگىزدى.

ءسويتىپ، ەڭبەك جانە حالىقتى الەۋمەتتىك قورعاۋ مينيسترلىگى، پرەزيدەنت اكىمشىلىگى، پارلامەنتتىڭ قوس پالاتاسى ءدال بۇگىنگە دەيىن پرەزيدەنتىمىز قاسىم-جومارت توقاەۆتى الداپ، شەتتەگى قانداستارىمىزعا وتىرىكشى ەتىپ كورسەتىپ كەلدى.

سوعان قارسى، مىنە، ەكى جىل بولدى، ءبىز تىنباي اياۋسىز كۇرەس جۇرگىزىپ كەلەمىز!

تىعىلارعا تەسىكتەرى قالماعان بولسا كەرەك، بۇگىن سەنات توقاەۆتى «اتا جولى» كارتاسى بويىنشا الداپ كەلگەنىن اقىرى مويىندادى.

«ايتىڭدارشى، «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى قاي زاڭنىڭ نەشىنشى بابىمەن بەكىتىلگەن؟!», - دەپ سۇراۋ سالىپ، مۇمكىن، بەسىنشى، الدە ونىنشى مارتە سەنات توراعاسى ماۋلەن اشىمباەۆتىڭ اتىنا جازعان حاتىمىزعا سەنات دەپۋتاتى، سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى ساتۆالديەۆ اليشەر گاپيرجانوۆيچ جاۋاپ بەرىپ: «اۋىت مۇقيبەك، ءسىزدىڭ «اتا جولى» كارتاسىنا قاتىستى حاتىڭىزدى قاراستىرىپ، قولدانىستاعى زاڭ نورمالارىندا «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى بەكىتىلمەگەنىن حابارلايمىز»، - دەپتى.

وسىعان دەيىن ءبىزدىڭ جوعارىدا ايتقان «ايتىڭدارشى، «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى قاي زاڭنىڭ نەشىنشى بابىمەن بەكىتىلگەن؟!», - دەگەن سۇراعىمىزعا ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى احمادي سارباسوۆ پەن ۆيتسە-ءمينيسترى اسقاربەك ەرتاەۆ «اتا جولى» كارتاسىن بەرۋ تەتىگى ەنگىزىلگەن ساتتەن باستاپ (2023 جىلعى شىلدەدەن باستاپ) جانە بۇگىنگى كۇنگە دەيىن جەرگىلىكتى اتقارۋشى ورگاندار 55 ءوتىنىمدى (124 ادام) ماقۇلداعانىن; ونىڭ ىشىندە 26 ءوتىنىم (70 ادام) «اتا جولى» كارتاسىن بيزنەس-يمميگرانتتار رەتىندە العانىن، 31 ءوتىنىم (59 ادام) سۇرانىسقا يە ماماندار ەكەنىن ايتىپ: «اتا جولى» كارتاسىنىڭ يەگەرى كوشىپ كەلۋشى بولعاندىقتان، بار قۇقىقتارى مەن مىندەتتەرى «حالىقتىڭ كوشى-قونى تۋرالى» قازاقستان رەسپۋبليكاسى زاڭىنىڭ (بۇدان ءارى - زاڭ) 5-بابى جانە 23-بابى 1-تارماعىندا جازىلعان جانە بولەك جازۋدىڭ قاجەتتىلىگى جوق...», - دەپ بەت باقتىرماي كەلگەن بولاتىن!

سۋرەت primeminister.kz سايتىنان الىندى.

سەنات دەپۋتاتى، سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى اليشەر ساتۆالديەۆتىڭ مىنا جاۋابى احمادي سارباسوۆ پەن اسقاربەك ەرتاەۆتىڭ،  جوبا اۆتورى تامارا دۇيسەنوۆانىڭ اۋزىنا قۇم قۇيدى! ۇشەۋى دە ماسقارا بولدى!

سۋرەتتەر primeminister.kz جانە sputnik.kz سايتتارىنان الىندى.

ارينە، «اتا جولى» كارتاسىمەن قاسىم-جومارت كەمەلۇلىن الداپ، وتىرىكشى ەتىپ كەلگەن جالعىز سەنات ەمەس!

ءبىرىنشى الدامكوس – زاڭ جوباسىن جاساعان ەڭبەك جانە حالىقتى الەۋمەتتىك قورعاۋ مينيسترلىگى;

سوسىن، اتالعان مينيسترلىك جاساعان زاڭ جوباسىن كۇزەپ-تۇزەپ، ماجىلىسكە قاراۋعا جىبەرگەن پرەزيدەنت اكىمشىلىگى;

سوسىن، پرەزيدەنت اكىمشىلىگى كۇزەپ-تۇزەگەن زاڭ جوباسىن نوتوريۋس رەتىندە بەكىتىپ بەرە سالعان ءماجىلىس;

سوسىن، ۇلكەن نوتوريۋس – سەنات!

كوردىڭىز بە، زاڭ شىعارۋ جۇيەسى ءالى وزگەرگەن جوق، سول باياعى قالپىندا تۇر.

اتاقتى رينات زايتوۆىڭىز دا، ماقسات تولىقبايىڭىز دا، كاسىبي زاڭگەرلەر ابزال قۇسپان مەن باقىتجان بازاربەك تە، ءتىپتى ۇلى كوشكە مۇددەلى قاۋىمنىڭ قۇرساعىن جارىپ شىققان ءۇنزيلا شاپاق تا، نۇرگۇل تاۋ دا، تامادا جارقىنبەك امانتايۇلى دا بۇل زاڭ جوباسىنىڭ بەتىن اشپاعان، كەلگەن بەتى بىردەن قولداپ بەرە سالعان.

ال، سەناتتىڭ وڭكەي «توكارلارى مەن سلەسارلارىنا»، «بۇرعىشىلارى مەن  مەحانيكتەرىنە»، «ۆەتەرينارلىق دارىگەرلەرى مەن ينجەنەرلەرىنە»، «زووتەحنيكتەرى مەن سانيتارلارىنا» ءبارىبىر، ولار «زاڭ» دەگەن نارسەڭىزدى قاقپايدى!

وتكەندە كوردىك قوي، سەنات ولار ءۇشىن زاڭ شىعارۋشى ورگان ەمەس، اكىمدىك سەكىلدى...

قالاي دەسەك تە، بۇل – سەناتتىڭ مويىنداعان ءبىرىنشى قاتەلىگى!

ءبىلىپ قويىڭىزدار، بۇل – سەناتور اليشەر  ساتۆالديەۆتىڭ ءوزى بەرە سالعان جاۋاپ ەمەس! ابدەن تەكسەرىپ، كوزدەرى جەتكەن سوڭ، سەنات توراعاسىنىڭ پارمەنىمەن بەرىلگەن جاۋاپ.

سول ءۇشىن ماۋلەن ساعاتحانۇلىنا راحمەت ايتۋىمىز كەرەك! وتە دۇرىس شەشىم جاسادى.

ەندى ەكىنشىسى بار.

ول سەناتور  الداشەۆ سۇيىندىك تاسەمەنۇلىنىڭ قولىندا جاتىر.

باياعى «حالىقتىڭ كوشى-قونى تۋرالى» زاڭىنىڭ 20-بابىنىڭ اتى شۋلى 5) تارماعىن نە ماقساتپەن جانە قانداي قاجەتتىلىك ءۇشىن قابىلداعانى تۋرالى سۇراق!

مىنە، ءبىزدىڭ ىقپالدى دەپۋتاتتاردىڭ سيقى – وسى، اعايىن!

سول باياعى ەسكى ءداستۇر...

قاتىستى مينيسترلىك زاڭ جوباسىن جاسايدى، پرەزيدەنت اكىمشىلىگى ونى كۇزەپ-تۇزەيدى، ءماجىلىس پەن سەنات نوتوريۋس رەتىندە بەكىتىپ بەرە سالادى...

قۇرمەتپەن، اۋىت مۇقيبەك

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى    

Abai.kz