پرەمەر-مينيستر ولجاس بەكتەنوۆ ۇكىمەت وتىرىسىندا ساران قالاسىنداعى جىلۋ جۇيەسىنىڭ اقاۋىنا جول بەرگەن ادامدار جاۋاپقا تارتىلاتىنىن ايتتى.

«بۇگىن ءبارىن اياقتاۋ قاجەت. ءبىرىنشى كەزەكتە بۇل ساران قالاسى اكىمىنىڭ جەكە جاۋاپكەرشىلىگى جانە وبلىس اكىمدىگى تاراپىنان ءتيىستى باقىلاۋدىڭ جوقتىعى. مەنىڭ تاپسىرمام بويىنشا قازىر تەكسەرۋ ءجۇرىپ جاتىر. جىلۋ بەرەتىن نىساننىڭ دايىندىعى تۋرالى جالعان اقپارات بەرگەن ادامداردىڭ ءبارى جاۋاپقا تارتىلادى. وسى وتىرىستان كەيىن ەنەرگەتيكا ءمينيسترى ساران قالاسىنا بارىپ، ءبارىن ءوزى تەكسەرەدى. ناتيجەسى بويىنشا ماتەريالداردى قۇقىق قورعاۋ ورگاندارىنا جىبەرەمىز. ەگەر قىلمىستىق قۇرام بولسا، كىنالى ادامداردىڭ ءبارى قىلمىستىق جاۋاپكەرشىلىككە تارتىلادى»، - دەدى پرەمەر-مينيستر.

قاراعاندى وبلىسىنىڭ اكىمى ەرماعانبەت بولەكپاەۆتىڭ ايتۋىنشا، شاھارعا بۇگىن تولىق جىلۋ بەرىلەدى.

«ساران جاڭا ورتالىق قازاندىعىندا 4 قازاندىق ورناتىلدى. 13 قازاندا №1 قازاندىق ىسكە قوسىلدى جانە تاۋلىك ىشىندە شىعاتىن تەمپەراتۋرا 55 گرادۋس بولدى. 13 قازاندا قازاندىق تومەن قايناعان قابات پەن ناسوس جابدىعى اۆتوماتيكاسىنىڭ دۇرىس جۇمىس ىستەمەۋىنە بايلانىستى ءماجبۇرلى تۇردە توقتاتىلدى. رەجيمدىك باپتاۋ جۇمىستارى جالعاسىپ جاتىر. اقاۋلاردىڭ شىعۋىنا بايلانىستى جىلۋمەن جابدىقتاۋدى رەزەرۆتىك سحەماعا كوشىرۋ تۋرالى شەشىم قابىلداندى. 124 ءۇي رەزەرۆتىك جىلىتۋعا قايتا قوسىلىپ، جىلۋ بەرىلىپ جاتىر. بۇگىنگى كۇننىڭ سوڭىنا دەيىن بارلىق ۇيلەرگە جىلۋ بەرىلەدى»، - دەدى اكىم.

Abai.kz