«جالپى ىشكى ءونىمنىڭ ناقتى ءوسۋ دەڭگەيى 4% قۇرادى. وعان نەگىزىنەن اۋىل شارۋاشىلىعى، وڭدەۋ ونەركاسىبى، قۇرىلىس جانە ساۋدا سالالارى ىقپال ەتتى. اتالعان كەزەڭدە مۇناي ءوندىرۋ كولەمى تومەندەپ كەتتى. بۇل ءوز كەزەگىندە، جالپى ىشكى ءونىمنىڭ ءوسۋ قارقىنىنا كەرى اسەرىن تيگىزدى. دەگەنمەن، ەكونوميكانىڭ ءوسۋى مۇنايدان تىس سەكتورلاردىڭ ەسەبىنەن قامتاماسىز ەتىلگەنىن ايتا كەتۋ كەرەك. بۇعان ەكونوميكانى ءارتاراپتاندىرۋ شارالارى ناتيجەسىندە قول جەتكىزىلدى»، - دەدى و. بەكتەنوۆ بۇگىنگى ۇكىمەت وتىرىسىندا.

بارلىق نەگىزگى ماكروكورسەتكىشتەر بويىنشا الماتى، قاراعاندى، قىزىلوردا، پاۆلودار، تۇركىستان، شىعىس قازاقستان وبلىستارىندا، استانا جانە شىمكەنت قالالارىندا ءوسىم تىركەلىپ وتىر. ەڭ تومەن كورسەتكىشتەر – اتىراۋ، ماڭعىستاۋ، جامبىل، باتىس قازاقستان جانە اقمولا وبلىستارىندا.

«اكىمدەر مەن مينيسترلەر بەلسەندى جۇمىس جۇرگىزسە، كەيبىر سالالار مەن وڭىرلەردەگى ەكونوميكالىق كورسەتكىشتەر بۇدان الدەقايدا جوعارى بولاتىن ەدى. ارتتا قالعان سالالاردى جەدەلدەتۋ ءۇشىن قاجەتتى شارالاردى دەر كەزىندە قابىلداپ، كۇندەلىكتى مونيتورينگ جۇرگىزۋ كەرەك. اكىمدىكتەر وڭدەۋ ونەركاسىبىن قولداۋعا، قۇرىلىس پەن ساۋدانى ىنتالاندىرۋعا باسا نازار اۋدارۋى قاجەت. مۇندا ۇلكەن رەزەرۆتەر بار»، - دەدى و. بەكتەنوۆ.

وعان قوسا، پرەمەر-مينيستر ينۆەستيتسيالىق جوبالاردى ىسكە اسىرۋ كەزىندە قارجىلىق ءتارتىپتى قاتاڭ قامتاماسىز ەتۋدى تاپسىردى. بارلىق مەملەكەتتىك ورگاندار ينۆەستيتسيالىق جوبالاردى ۋاقتىلى ءارى ساپالى ىسكە اسىرۋدى ماقسات ەتۋگە ءتيىس.

«كورىپ وتىرعانىمىزداي، ينۆەستيتسيا تارتۋ دەڭگەيى تومەندەپ بارادى. 11 ءوڭىر نەگىزگى كاپيتالعا سالىنعان ينۆەستيتسيالار بويىنشا جوسپارلى كورسەتكىشكە قول جەتكىزگەن جوق. 11 سالادا ينۆەستيتسيا تارتۋ كورسەتكىشى وتە تومەن. ولاردىڭ ىشىندە تۋريزم، اقپارات جانە بايلانىس، رەزەڭكە جانە پلاستماسسا بۇيىمدارى، حيميا ونەركاسىبى جانە ازىق-تۇلىك ونىمدەرىنىڭ ءوندىرىسى بار. سالالىق مينيسترلىكتەر مەن اكىمدىكتەر ءونىمدى ساتۋ نارىقتارى مەن ەكسپورتتىق تاۋارلاردى كەڭەيتۋ ءۇشىن كاسىپكەرلەرگە تۇراقتى تۇردە قولداۋ كورسەتۋگە ءتيىس. وندىرىستەردى قازاقستانعا كوشىرۋ ءۇشىن شەتەلدىك كاسىپورىنداردى ىزدەپ تاۋىپ، وسىندا ورنالاسقان وندىرىستەردە لوكاليزاتسيانى ارتتىرۋعا جاردەمدەسۋ كەرەك»، - دەدى ولجاس بەكتەنوۆ.