قازاقستان مەن ارمەنيا پرەزيدەنتتەرى «استانا» حالىقارالىق قارجى ورتالىعىندا بولدى. بۇل تۋرالى اقوردا حابارلادى. 

مەملەكەت باسشىسى قاسىم-جومارت توقاەۆ پەن ەلىمىزگە رەسمي ساپارمەن كەلگەن ارمەنيا پرەزيدەنتى ۆااگن حاچاتۋريان «استانا» حالىقارالىق قارجى ورتالىعىنا باردى.

پرەزيدەنتتەرگە احقو باسقارۋشىسى رەنات بەكتۇروۆ قارجى ورتالىعى قىزمەتىنىڭ نەگىزگى باعىتتارى جانە ونىڭ وڭىرلىك باستامالاردى دامىتۋداعى ۇلەسى تۋرالى مالىمەت بەردى.

احقو ارقىلى قازاقستان ەكونوميكاسىنا تارتىلعان ينۆەستيتسيا كولەمى 13 ميلليارد دوللاردان اسقان. ونىڭ 5,9 ميلليارد دوللارى AIX بيرجاسىنداعى پورتفەلدىك ينۆەستيتسيا بولسا، 7,3 ميلليارد دوللارى احقو-عا قاتىسۋشى كومپانيالارعا تيەسىلى.

بۇگىندە مۇندا الەمدەگى 80-نەن استام ەلدىڭ 3200-گە جۋىق كومپانياسى جۇمىس ىستەيدى. ولاردىڭ قاتارىندا اقپاراتتىق-كوممۋنيكاتسيالىق تەحنولوگيالار، قارجى قىزمەتتەرى مەن ساقتاندىرۋ سالالارىنا ماماندانعان ارمەنيانىڭ 6 ءىرى كومپانياسى دا بار.

سونىمەن قاتار احقو سوتى مەن حالىقارالىق تورەلىك ورتالىعىنىڭ قىزمەتى، ورتالىقتاعى سوت جۇيەسىنىڭ ەرەكشەلىگى جونىندە دە اقپارات بەرىلدى.

بۇدان بولەك، احقو قارجى قىزمەتتەرىن رەتتەۋ كوميتەتىنىڭ جۇمىسى تۋرالى باياندالدى. اتالعان كوميتەت پەن ارمەنيا رەسپۋبليكاسىنىڭ ورتالىق بانكى اراسىندا بانك جانە ساقتاندىرۋ قىزمەتتەرىن، باعالى قاعازدار نارىعىن قاداعالاۋ جانە رەتتەۋ سالاسىنداعى ءوزارا ءىس-قيمىل تۋرالى مەموراندۋم جاسالعان.

Abai.kz