بۇگىن الەمدىك اقپارات ىزۋ-قىزۋ تالقىلاپ جاتقان رەسەي مەن ۋكراينا سوعىسىنا قاتىستى بىرنەشە ماڭىزدى اقپاراتتى توپتاپ، Abai.kz وقىرماندارىنىڭ تالقىسىنا ۇسىنعاندى ءجون سانادىق...

سۋرەت ريا نوۆوستي سايتىنان الىندى.

موڭعوليا ءپۋتيندى تۇتقىنداماعانى ءۇشىن «سوتتالادى»

حالىقارالىق قىلمىستىق سوت رەسەي پرەزيدەنتى ۆلاديمير ءپۋتيننىڭ ەلگە ساپارى كەزىندە تۇتقىنداۋدان جانە سوتقا بەرۋدەن باس تارتقانى ءۇشىن موڭعوليانىڭ ماسەلەسىن مايشاممەن قاراپ جاتىر. حقس موڭعوليا ءىسىن ريم ستاتۋتىنا قاتىسۋشى ەلدەردىڭ قاراۋىنا بەردى.

ۆلاديمير پۋتين 2024 جىلعى 2-3 قىركۇيەگىندە موڭعولياعا ساپارلاپ بارىپ، حالحين-گولدا كەڭەس جانە موڭعول اسكەرلەرىنىڭ جاپون قارۋلى كۇشتەرىن جەڭگەنىنە 85 جىل تولۋىنا وراي وتكەن ءىس-شاراعا قاتىسقان.

حالىقارالىق قىلمىستىق سوت رەسەي پرەزيدەنتى ءپۋتيندى تۇتقىنداۋعا وردەر شىعارعان. ال موڭعوليا حقس مۇشەسى جانە ريم ستاتۋسىن بەكىتكەن ەل رەتىندە، ءپۋتيندى تۇتقىنداۋعا مىندەتتى بولعان. بىراق، موڭعوليا ولاي جاسامادى. حقس مىندەتتەمەسىن ورىنداعان جوق.

موڭعوليا وردەر بويىنشا قاماۋدان باس تارتۋىنىڭ باستى سەبەبى – «بەيتاراپ مارتەبە جانە كورشى ەلدەرگە ەكونوميكالىق تاۋەلدىلىكتىڭ جوعارى دارەجەسى» دەپ ءتۇسىندىردى.

قازاق بۇنى – «ساۋ باسقا ساقينا تىلەۋ» دەيدى.

سۋرەت focus.ua سايتىنان الىندى.

قىتاي رەسەيدىڭ ءىس-ارەكەتتەرىنە نارازى 

سولتۇستىك كورەي باسشىسى كيم چەن ىن ۋكرايناعا قارسى سوعىستا ءوز اسكەرلەرىن رەسەيگە كومەككە جىبەرگەنگە دەيىن قىتاي سولتۇستىك كورەيدىڭ ماسكەۋمەن بايلانىستارىنىڭ تەرەڭدەۋىنە نارازى بولعان. بۇل ۋترالى «Financial Times» جازدى.

ال وتكەن اپتادا قىتاي پرەزيدەنتى شي جيپيڭ كيم چەن ىنعا حات جولداعان. وندا شي توراعا قحر-نىڭ قۇرىلۋىنىڭ 75 جىلدىعىمەن قۇتتىقتاعانى ءۇشىن كيم باسشىعا العىس ايتقان. بىراق بۇعان دەيىنگى حاتتاردا قولدانىلىپ كەلگەن «سولتۇستىك كورەيدى دوستاس كورشى ەل» دەگەن انىقتاما قولدانىلماعان. ساراپشىلاردىڭ پىكىرىنشە، بۇل ارەكەت بەيجىڭنىڭ نارازىلىعىنىڭ بەلگىسى بولىپ تابىلادى.

كيم چەن ىن بۇعان دەي                ءىن 12 مىڭنان استام اسكەردى رەسەيگە الدىڭعى شەپتە قولداۋ كورسەتۋگە جىبەرۋ تۋرالى شەشىم قابىلداعان. سولتۇستىك كورەي اسكەرىنىڭ الدى مايدان شەبىنە كىرىپ ۇلگەرگەن.

رەسەي مەن سولتۇستىك كورەيدىڭ بۇلايشا اسكەري جاقىنداسۋى بەيجىڭنىڭ الاڭداۋشىلىعىن تۋدىرعان.

قازاق بۇنى – «دوستىڭ كوڭىلى ءبىر اتىم ناسىبايدان قالادى» دەيدى.

سۋرەت rbc.ua سايتىنان الىندى.

سولتۇستىك كورەي اسكەرى ۇرىسقا قاشان ارالاسپاق؟

ۋكراينا قك باس قولباسشىسى الەكساندر سىرسكي رەسەيدىڭ سولتۇستىك كورەيدەن اسكەر الدىرىپ، سوعىسقا كىرگىزگەنى تۋرالى باياندادى. ۋكراينا بارلاۋىنىڭ اقپاراتى بويىنشا، رەسەي سولتۇستىك كورەيدىڭ اسكەري كۇشتەرىن ۇرىس قيمىلدارى ايماعىندا 27-28 قازاندا قوسپاق.

زەلەنسكي باتىسقا ۇندەۋ جاساپ: «بۇعان كوزدى جاۋىپ، ۇنسىزدىك تانىتپاي،  ماسكەۋ مەن پحەنيانعا قاتتى قىسىم كورسەتۋ كەرەك»، - دەپ پىكىر ءبىلدىردى.

سىرسكي: «دونباسستا جاعداي قيىن، بىراق ءبىزدىڭ جاۋىنگەرلىك بريگادالار رەسەي اسكەرىن جويۋ ءۇشىن قولدان كەلگەننىڭ ءبارىن جاساپ جاتىر. ال ءبىزدىڭ اسكەر كۋرسك وبلىسىنداعى مىندەتتەرىن ءساتتى اتقارۋدا»، - دەپ باياندادى.

بۇل جاعداي – رەسەيدىڭ كەڭەستىك داۋىردە اۋعانستانعا ورتالىق ازيا ۇلتتارىنان شىققان سولداتتار جىبەرىلگەنى سياقتى قيتۇرقى ارەكەتى. باستىس اناۋ-مىناۋ دەيتىن بولسا، كارىستەر ەمەس، سىبىردەگى ەتنيكالىق ازشىلىق وكىلدەرى سوعىسىپ جاتىر دەگەن سىلتاۋلارى دايىن تۇر. بۇل قۋلىعىنا قۇرىق بويلامايتىن رەسەي يمپەرياسىنىڭ كەزەكتى سايقالدىعى دەسەك ارتىق ايتپايمىز. بۇدان باتىستىڭ سوعىسقا تىكە ارالاسۋى عانا قۇتقارادى.

Abai.kz