باس پروكۋروردىڭ ورىنباسارى عالىمجان قويگەلديەۆ قىتاي تۇرمەسىندە جاتقان قازاقستان ازاماتى اقجارقىن تۇرلىبايدىڭ ىسىنە قاتىستى مالىمدەمە جاسادى.

«اقجارقىن تۇرلىبايعا قاتىستى ءبىز سىرتقى ىستەر مينيسترلىگىمەن بىرلەسە وتىرىپ، قىتايدان قايتارۋعا بار كۇش-جىگەرىمىزدى سالىپ جاتىرمىز. ءبىز ول جۇمىستى توقتاتقان جوقپىز. ول جۇمىس بەلسەندى تۇردە اتقارىلىپ جاتىر. مەنىڭ ويىمشا، جاقىن ارادا وڭ شەشىمىن تابادى دەپ سەنەمىن. بۇل وڭاي جۇمىس ەمەس.

ول ءوز جازاسىن ەلىمىزگە كەلىپ وتەۋگە قاتىستى ونىڭ ارىزى بىزگە تۇسكەن. ول جازاسىن ەلىمىزگە كەلىپ وتەگىسى كەلەدى. ول ءوزىنىڭ ادۆوكاتىمەن تۇراقتى تۇردە بايلانىستا»، - دەدى عالىمجان قويگەلديەۆ.

ايتا كەتەيىك، اقجارقىن تۇرلىباي 2014 جىلى گۋانچجوۋ اۋەجايىنان 4 جارىم كەلى ەسىرتكى الىپ وتپەك بولدى دەپ ايىپتالعان. ءبىر جىلدان سوڭ قىتاي سوتى ونى ءومىر بويىنا باس بوستاندىعىنان ايىردى. ال وتانداسىمىز ءوزىن شەتەلدىك دوسى، ياعني اديندو نونسو فورتۋنەنىڭ ارباۋىنا ءتۇسىپ قالعانىن ايتقان ەدى.

Abai.kz