كەشە مولدوۆادا پرەزيدەنتتىك سايلاۋدىڭ ەكىنشى كەزەڭى اياقتالدى. قورىتىندى ەسەپ بويىنشا قازىرگى پرەزيدەنت مايا ساندۋ ەكىنشى مەرزىمگە سايلاندى.

شىن مانىندە، مولدوۆاداعى سايلاۋ رەسەي مەن باتىس اراسىنداعى تارتىستى تاڭداۋ بولدى دەسەك قاتەلەسپەيمىز. ەندى وسى تۋرالى قىسقا-نۇسقا اقپارات بولىسەيىك:

مولدوۆاداعى پرەزيدەنتتىك سايلاۋدىڭ ءبىرىنشى كەزەڭى 20 قازاندا وتكەن. 11 ۇمىتكەر مولدوۆانى باسقارۋعا نيەتتى بولدى. دەسە دە، وزگەلەردەن وق بويى وزىپ شىققان ەكەۋ بولدى. ءبىرىنشىسى – مولدوۆانىڭ قازىرگى پرەزيدەنتى مايا ساندۋ. ال ەكىنشىسى – مولدوۆانىڭ بۇرىنعى باس پروكۋرورى الەكساندر ستويانوگلو.

ءبىرىنشى كەزەڭدە ساندۋ 42,49% داۋىس جيناسا، ستويانوگلو 25,95% داۋىس الدى.  سول كۇنى مولدوۆا كونستيتۋتسياسىنا «ەلدىڭ ەۋروپالىق باعامىنىڭ قايتىمسىز ەكەندىگى تۋرالى تۇزەتۋلەر ەنگىزۋ» بويىنشا جالپىحالىقتىق رەفەرەندۋم قاتار وتكەن.

مولدوۆا جۇرتى ەۋروينتەگراتسيانى تاڭدادى. 50,35% حالىق قولداپ، 49,65%-ى قارسى داۋىس بەرگەن. دەسە دە، ەۋروپا باعىتىن تاڭداۋشىلار جەڭىسكە جەتتى دەپ جاريالاندى.

ال كەشە مايا ساندۋ مەن الەكساندر ستويانوگلونىڭ ەكىنشى تۋرداعى بەتپە-بەت ايقاسى اياقتالدى. مولدوۆا ورتالىق سايلاۋ كوميسسياسى حاتتامالاردى ەسەپتەپ، جەڭىمپازدى اتادى. ءسويتىپ، مايا ساندۋ 55 پايىز داۋىس جيناپ، ەكىنشى مەرزىمگە سايلاندى.

ال ونىڭ باستى وپپونەنتى بولعان الەكساندر ستويانوگلو 45 پايىز داۋىسپەن شەكتەلدى.

مايا ساندۋ مولدوۆا ىشىندەگى سايالاۋ ۋچاسكەلەرىندە ستويانوگلومەن تەڭ ناتيجە كورسەتسە، شەتەلدەگى ەلشىلىكتەردە اشىلعان داۋىس بەرۋ ۋچاسكەلەرىندە ايقىن باسىمدىقپەن جەڭگەن. شەتەلدەگى داۋىس بەرۋدە باسىم كوپشىلىك ساندۋدى قولداعان (85% داۋىس العان).

ال ستويانوگلو ەڭ كوپ داۋىس جيناعان اۋماقتار - رەسەيشىل اۋماقتار! مولدوۆانىڭ رەسەيشىل اۆتونومياسى سانالاتىن عاعاۋىزيادا ستويانوگلو 97,04% داۋىس العان. ال ساندۋ بۇل وڭىردە - 2,96% عانا داۋىس جيناعان. سونداي-اق، رەسەي اسكەرى باقىلاۋىنداعى پريدنەستروۆەدە ستويانوگلو 79,40%، ساندۋ 20,60% داۋىس جيناعان.

Abai.kz