پرەزيدەنت توقاەۆ رەسمي ساپارمەن فرانتسياعا باردى. پاريج اۋەجايىندا قازاقستان پرەزيدەنتىن فرانتسيانىڭ سىرتقى ىستەر ءمينيسترى جان-نوەل باررو قارسى الدى.

بۇل پرەزيدەنت توقاەۆ پەن پرەزيدەنت ماكروننىڭ ءۇشىنشى جولىعۋى. وسىعان دەيىن: 2022 جىلى قازاقستان پرەزيدەنتى ەليسەي سارايىنا بارعان. 2023 جىلى فرانتسيا پرەزيدەنتى اقورداعا كەلدى.

اقوردا تاراتقان اقپارعا سۇيەنسەك، بۇل ساپار بارىسىندا «ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى دامىتۋ» ماسەلەلەرى تالقىلانباق. سونىمەن قاتار، قازاقستان پرەزيدەنتى فرانتسۋز ىسكەر توپتارىنىڭ وكىلدەرىمەن بىرقاتار كەزدەسۋلەر وتكىزەتىنى ايتىلعان.

سۋرەتتەر اقوردا تەلەگرام ارناسىنان الىندى.

ورتالىق ازيا ءوڭىرى – ەو قول جەتكىزۋگە تىرىسىپ جاتقان تابيعي قازبالارعا باي. ونىڭ ۇستىنە وا-نىڭ باستى درايۆەرى – قازاقستان ينۆەستورلار ءۇشىن قولايلى جاعدايلار ۇسىنۋشى مەملەكەت. وسى جولعى ساپار بارىسىندا قازاقستاندا سالىناتىن اەس قۇرىلىسىنا دەگەن فرانتسيا تارابىنىڭ ۇسىنىسى تا تالقى بولادى دەپ كۇتىلۋدە.

بۇگىن ءبىز پرەزيدەنت توقاەۆتىڭ فرانتسياعا جاساعان ساپارى اياسىندا قازاقستان مەن فرانتسيا اراسىنداعى مادەني-گۋمانيتارلىق ارىپتەستىكتى كەڭەيتۋ بويىنشا اتقارىلعان جۇمىستارعا ازدى-كەم شولۋ ۇسىنباقپىز...

سۋرەت قر مادەنيەت جانە اقپارات مينيسترلىگىنىڭ تەلەگرام ارناسىنان الىندى.

قوس مينيستر قانداي كەلىسىمدەرگە قول قويدى؟

قر مادەنيەت جانە اقپارات ءمينيسترى ايدا بالاەۆا فرانتسيانىڭ مادەنيەت ءمينيسترى راشيدا داتيمەن كەزدەسىپ، مادەنيەت سالاسىنداعى ىنتىماقتاستىق تۋرالى بىرقاتار ماڭىزدى كەلىسىمدەرگە قول قويدى.

*كەزدەسۋ بارىسىندا تاراپتار مۋزەيلەر جانە مادەني مۇرا سالاسىنداعى ىنتىماقتاستىق نيەتى تۋرالى دەكلاراتسياسىن، سونداي-اق قر ۇلتتىق مۋزەيى مەن گيمە مۋزەيى اراسىنداعى ءوزارا تۇسىنىستىك تۋرالى مەموراندۋمدى قوسا العاندا، بىرقاتار كەلىسىمدەرگە قول قويدى.

* سونداي-اق، عىلىمي-زەرتتەۋ سالاسىنداعى ىنتىماقتاستىقتى كۇشەيتۋ جانە «Courants du Monde» باعدارلاماسى اياسىندا قازاقستاندىق ماماندارعا ارنالعان تاعىلىمدامالار ۇيىمداستىرۋ ۇسىنىلدى.

* سونداي-اق، مۋزەي ساراپتاماسى بويىنشا تاجىريبە الماسۋ، تاريحي مۇرانى ساقتاۋ جانە مۋزەي ىسىنە جاڭا تەحنولوگيالاردى ەنگىزۋ ماسەلەلەرى تالقىلاندى.

* ەكى ەلدىڭ مينيسترلەرى كرەاتيۆتى يندۋستريا، ونىڭ ىشىندە، ءسان سالاسىنداعى ىنتىماقتاستىققا قىزىعۋشىلىق تانىتتى. ايدا بالاەۆا ەتنيكالىق سانگە جانە ونىڭ الەمدىك دەڭگەيدەگى كورسەتىلىمىنە نازار اۋدارۋدى ۇسىندى.

«قازاقتىڭ تاريحي جانە مادەني مۇراسىن جاھاندىق گۋمانيتارلىق كەڭىستىككە ناسيحاتتاۋ جانە ينتەگراتسيالاۋ — مەملەكەتتىڭ مادەني ساياساتىنداعى باسىمدىقتاردىڭ ءبىرى»، - دەدى ايدا بالاەۆا.

«ءبىز كينووندىرىس سالاسى، قازىرگى زامانعى قازاق ادەبيەتىن فرانتسيادا جانە كەرىسىنشە فرانتسۋز ادەبيەتىن بىزدە تانىستىرۋ، كونتسەرتتىك ۇيىمداردىڭ ءوزارا ءىس-قيمىلى جانە بالالار كونتەنتىنە قاتىستى بىرلەسكەن مادەني ءىس-شارالار وتكىزۋ مۇمكىندىكتەرىن قاراستىرۋىمىزعا بولادى»، - دەدى ا. بالاەۆا.

سۋرەت قر مادەنيەت جانە اقپارات مينيسترلىگىنىڭ تەلەگرام ارناسىنان الىندى.

ايگىلى لۋۆر مۋزەيى - مادەني ىنتىماقتاستىقتىڭ جاڭا كوكجيەگى

ونان سوڭ قر مادەنيەت جانە اقپارات مينيستر ايدا بالاەۆا مەن لۋۆر مۋزەيىنىڭ پرەزيدەنت-ديرەكتورى لورانس دە كار ەكى ەل اراسىنداعى مادەني جوبالاردى تالقىلادى.

تاراپتار قازاقستان مۋزەيلەرى مەن لۋۆر اراسىندا بىرلەسكەن سەمينارلار مەن كونفەرەنتسيالار وتكىزۋ ارقىلى تاجىريبە الماسۋ مۇمكىندىگىن تالقىلادى. ىنتىماقتاستىق كورمە قىزمەتىمەن قاتار، عىلىمي-زەرتتەۋ، ارحەولوگيالىق زەرتتەۋلەر، عىلىمي ماتەريالدار جاريالاۋ جانە مۋزەي ىسىندەگى تاجىريبە الماسۋ باعىتتارىن دا قامتۋى مۇمكىن.

«ءبىزدى قازاقستاننىڭ مادەني مۇراسىن زەرتتەۋ بويىنشا بىرلەسكەن عىلىمي جۇمىسقا قاتىستى ىنتىماقتاستىق قىزىقتىرادى. قر ۇلتتىق مۋزەيىنىڭ جانىنان رەستاۆراتسيا ورتالىعىن اشۋدى جوسپارلاپ وتىرمىز. سوندىقتان لۋۆر مۋزەيىنىڭ عىلىمي، كادرلاردى دايارلاۋ، كورمەلەر ۇيىمداستىرۋ بويىنشا قولداۋىن العىمىز كەلەدى»، - دەپ اتاپ ءوتتى ايدا بالاەۆا.

مينيستر قازاقستاندىق ماماندار ءۇشىن ماستەر-كلاسستار مەن تاعىلىمدامالار ۇيىمداستىرۋ  كاسىبي ءبىلىم الماسۋ مەن قازاقستاندا مۋزەي ءىسىن جەتىلدىرۋدە ماڭىزدى قادام بولاتىنىن اتاپ ءوتتى.

سۋرەت قر مادەنيەت جانە اقپارات مينيسترلىگىنىڭ تەلەگرام ارناسىنان الىندى.

يۋنەسكو-قازاقستان: دۇنيەجۇزىلىك مادەني مۇرالاردى قورعاۋ

فرانتسياعا ساپار اياسىندا قر مادەنيەت جانە اقپارات ءمينيسترى ايدا بالاەۆا يۋنەسكو باس ديرەكتورىنىڭ مادەنيەت جونىندەگى ورىنباسارى ەرنەستو وتتونەمەن كەزدەستى.

«قازاق مادەني مۇراسىن كەڭىنەن ناسيحاتتاۋ ماقساتىندا كىتاپتاردى اۋدارۋ جانە بىرلەسىپ شىعارۋ سالاسىندا تابىستى ىنتىماقتاستىق ورناتۋعا بولادى. مەن يۋنەسكو جوبالارىنىڭ، سونىڭ ىشىندە بىرگە اتقارعان جوبالاردىڭ ءساتتى جۇزەگە اسىرىلۋى ءۇشىن بارلىق كۇش-جىگەرىمدى سالامىن»، - دەدى ا. بالاەۆا.

تاراپتار قازاقستان مەن يۋنەسكو اراسىنداعى مادەني ىنتىماقتاستىقتىڭ نەگىزگى باعىتتارىن، اتاپ ايتقاندا، دۇنيەجۇزىلىك مادەني مۇرا ەسكەرتكىشتەرىن قورعاۋ، ماتەريالدىق ەمەس مادەني مۇرانى زەرتتەۋ جانە ناسيحاتتاۋ، كرەاتيۆتى يندۋستريالاردى دامىتۋ ماسەلەلەرىن تالقىلادى.

سۋرەت قر مادەنيەت جانە اقپارات مينيسترلىگىنىڭ تەلەگرام ارناسىنان الىندى.

«قازاقستان: ۇلى دالا جاۋھارلارى»: 3 مىڭ جىلدىق مادەنيەت فەنومەنى

بۇگىن فرانتسيانىڭ ايگىلى گيمە مۋزەيىندە «قازاقستان: ۇلى دالا جاۋھارلارى» كورمەسىنىڭ سالتاناتتى اشىلۋى ءوتتى.

قر مادەنيەت جانە اقپارات ءمينيسترى ايدا بالاەۆا الەم تاريحىنداعى ۇلى دالانىڭ ءۇش مىڭ جىلدىق ەرەكشە مادەني فەنومەنىن پاش ەتەتىن كورمەدەگى بىرەگەي ەكسپوناتتاردىڭ ماڭىزدىلىعىن اتاپ ءوتتى.

«كەيىنگى جىلدارى قازاقستان مەن فرانتسيا اراسىنداعى بايلانىس ارتىپ، جاڭا سەرپىن الدى. قازاقستان پرەزيدەنتى قاسىم-جومارت توقاەۆ پەن فرانتسيا پرەزيدەنتى ەممانۋەل ماكروننىڭ ءوزارا ساپارلارى ەكىجاقتى ىنتىماقتاستىقتى نىعايتا ءتۇستى. ارىپتەسىم، مينيستر حانىم راشيدا داتي مەن گيمە مۋزەيىنىڭ پرەزيدەنتى، دوكتور ياننيك لينتتسكە وسى كورمەنى ۇيىمداستىرۋدا كورسەتكەن قولداۋى ءۇشىن، سونداي-اق، گيمە مۋزەيى ۇجىمىنا جوعارى دەڭگەيدەگى كاسىبي بىلىكتىلىگى مەن ۇيلەسىمدى جۇمىسى ءۇشىن ەرەكشە العىسىمدى بىلدىرەمىن»، – دەدى ايدا بالاەۆا.

ەكسپوزيتسيادا قازاقستاننىڭ ۇلتتىق مۋزەيى مەن «ازىرەت سۇلتان» مۋزەي-قورىعىنىڭ كوللەكتسيالارىنان الىنعان 35 سيرەك ارتەفاكت ۇسىنىلعان. ولار قازاقستان تاريحىنىڭ نەگىزگى كەزەڭدەرىن پاش ەتەدى.

«مۋزەيدىڭ بيىك ميسسياسى – وتكەننىڭ مادەني قۇندىلىقتارىن كورسەتە وتىرىپ، زاماناۋي تاريحتى جاساۋ. كورمەگە قويىلعان ەڭ قۇندى جادىگەرلەر العاش رەت شەتەلدىك كورەرمەنگە زاماناۋي، جاڭاشىل فورماتتا ۇسىنىلىپ وتىر. بۇگىن ءبىز جاڭا تاريحتىڭ – ەلدەرىمىز اراسىنداعى قارىم-قاتىناستاردىڭ دامۋ تاريحىنىڭ كۋاسى بولىپ وتىرمىز»، – دەدى مينيستر.

كورەرمەندەر كوشپەلى مادەنيەتتىڭ جانە مەملەكەتتىلىكتىڭ دامۋىن بەينەلەيتىن قۇندى مۇرالاردى تاماشالاي الادى، ولاردىڭ قاتارىندا عۇن-سارمات كەزەڭىنەن باستاپ قازاق حاندىعىنا دەيىنگى جادىگەرلەر بار. كورمەنىڭ ەرەكشەلىگى – كورەرمەنگە قازاقستان مادەنيەتىنىڭ سانعاسىرلىق تاريحى مەن باي قازىناسىن تەرەڭ تانۋعا مۇمكىندىك بەرەتىن يممەرسيۆتى مۋلتيمەديالىق كونتەنت.

«كورمەدە قازاقستاننىڭ بەس «دجوكونداسى» قويلعان. بۇل كورمەنىڭ يدەياسى ءبىر جىل بۇرىن فرانتسيا پرەزيدەنتىنىڭ قازاقستانعا ساپارى كەزىندە تۋىندادى. ونىڭ ماقساتى – كورەرمەنگە قازاقستان مادەنيەتىن، ونىڭ الەمدىك تاريحتا الار ورنىن تانىستىرۋ. كورمە ەجەلگى تاريحتان باستاپ 18-ءشى عاسىرداعى قازاقستانعا دەيىنگى ارالىقتى قامتىعان. بۇل – قازاقستاننىڭ پەيزاجدارىن، دىبىستارىن، اسىرەسە، وسى وركەنيەتتىڭ بەس كەزەڭىن بەينەلەيتىن بەس شەدەۆردى نەمەسە شەدەۆرلەر ءانسامبلىن كورسەتەتىن يممەرسيۆتى ساياحات»، – دەدى گيمە – ازيا ونەرىنىڭ ۇلتتىق مۋزەيى ديرەكتورى ياننيك لينتس.

كورمە 2025 جىلدىڭ 24 ناۋرىزىنا دەيىن جالعاسادى. 5 قاراشادا، كورمەنى قازاقستان مەن فرانتسيا پرەزيدەنتتەرى قاسىم-جومارت توقاەۆ پەن ەممانۋەل ماكرون تاماشالايدى.

Abai.kz