بۇگىن ۇكىمەتتە قازاقستاندا ۋاقىت بەلدەۋىن اۋىستىرۋ جايى ءسوز بولدى. قر ساۋدا جانە ينتەگراتسيا ءمينيسترى ارمان شاققاليەۆ بايانداما جاساپ، ۇكىمەت باسشىسى ولجاس بەكتەنوۆ قازاقستاندا ۋاقىت بەلدەۋى اۋىسپايتىنىن مالىمدەدى.

ۇكىمەت وتىرىسىنداقازاقستاننىڭ 5-ءشى ۋاقىت بەلدەۋىنە كوشۋىنىڭ ارتىقشىلىقتارى تۋرالى بايانداعان مينيستر ارمان شاققاليەۆ:

«UTC+5 ۋاقىت بەلدەۋى ەلىمىزدىڭ حالقىنىڭ 76%-دان استامى تۇراتىن (15 ملن 240 مىڭ ادام) استانا، الماتى، پەتروپاۆل، وسكەمەن، شىمكەنت، سەمەي جانە پاۆلودار قالالارىن قوسا العاندا، 67,5-تەن 82,5 گرادۋسقا دەيىنگى بويلىقتاردى قامتيدى. بۇگىنگى تاڭدا الەمنىڭ 195 ەلىنىڭ 117-ءسى گەوگرافيالىق ۋاقىتتى ستاندارتتى ۋاقىت بەلدەۋىنە مۇمكىندىگىنشە جاقىن ەتىپ تاڭدادى، ويتكەنى ادامنىڭ تسيركادتى ىرعاعى تابيعي كۇندىزگى كەزەڭمەن سينحروندالادى. وسىلايشا، ۋاقىت بەلدەۋىن وزگەرتۋ تۋرالى قابىلدانعان شەشىم عىلىمي نەگىزدەلگەن جانە ەكونوميكالىق تۇرعىدان ورىندى سانالادى»، - دەدى.

ال ۇكىمەت باسشىسى ولجاس بەكتەنوۆ:

«ۇكىمەت بۇل شەشىمدى قولدايدى. ەلىمىزدىڭ اۋماعىنىڭ كوپ بولىگى 5-ءشى ۋاقىت بەلدەۋىندە ورنالاسقان، سوندىقتان عىلىمي تۇرعىدان بۇل دۇرىس شەشىم. ساۋدا جانە اقپارات مينيسترلىكتەرىنە نەعۇرلىم تۇسىنىكتى اقپاراتتىق-ءتۇسىندىرۋ ناۋقانىن جۇرگىزۋدى تاپسىرامىن»، - دەدى.

وسىعان دەيىن قر پارلامەنتى ءماجىلىسىنىڭ ءبىر توپ دەپۋتاتى ۋاقىت بەلدەۋىن بۇرىنعى قالىپقا كەلتىرۋ تۋرالى باستاما كوتەرگەن ەدى.

Abai.kz