قازاق ونەرىنىڭ قارا شاڭىراعى جامبىل اتىنداعى قازاق مەملەكەتتىك اكادەميالىق فيلارمونيا ساحناسىندا تاعى دا ءبىر ايتۋلى مەرەيتوي كەشى ءوتتى.

ونەر ورداسىنىڭ 89-جىلدىق تاريحىندا ەسىمدەرى التىن ارىپپەن جازىلعان دارا تۇلعالار قىزمەت اتقارعان. سونىڭ ءبىرى دە، بىرەگەيى قازاقستان جانە كسرو حالىق ءارتىسى، مەملەكەتتىك سىيلىقتىڭ لاۋرەاتى، سوتسياليستىك ەڭبەك ەرى، بۇلبۇل ءانشى بيبىگۇل احمەتقىزى تولەگەنوۆا. قازاقتىڭ بۇلبۇلى كيەلى شاڭىراقتا وتكەن ءوزىنىڭ ونەر جولىندا فيلارمونيا ءان رەپەرتۋارىنىڭ بايۋى مەن دامۋىنا ەسەلى ۇلەسىن قوسىپ، شىعارماشىلىقتىڭ شىڭىنا شىعىپ، مەملەكەتتىك ماراپاتتىڭ كوبىنە قول جەتكىزگەن. عيبراتتى عۇمىر يەسى، ۇلت ماقتانىشى بيبىگۇل تولەگەنوۆا بيىل 95 جاسقا تولادى. مەرەيلى توي قارساڭىندا قارا شاڭىراقتا ءانشىنىڭ شىعارماشىلىعىنا ارناپ، ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ بيبىگۇل تولەگەنوۆانىڭ شىعارماشىلىعىنا ارنالعان كونتسەرتى ءوتتى.

قازاقستاننىڭ ەڭبەك سىڭىرگەن قايراتكەرى، فيلارمونيا ديرەكتورى  ابدۋاليەۆ اقان جىلقىشىبايۇلى:

– وسى جەلتوقسان ايىندا قازاق ءان ونەرىنىڭ بۇلبۇلى بيبىگۇل تولەگەنوۆا  اپامىز ۇلكەن 95 دەگەن، عاسىرمەن قۇرداس جاسقا كەلەدى. ول كىسىمەن اڭگىمەلەسكەن كەزدە فيلارمونيادا اپامىز ون بەس جىلعا جۋىق قىزمەت اتقارعانىن، جانە ءوزىنىڭ ايتۋىنشا كسرو حالىق ءارتىسى، قازاقستان حالىق ءارتىسى، سوتسياليستىك  ەڭبەك ەرى ودان باسقا دا ماراپاتتارى بار، سونىڭ ءبارىن وسى فيلارمونيا قابىرعاسىندا جۇرگەن كەزدە العانىن ايتادى. سوندىقتان دا، بۇل مەرەيتويدى مىندەتتى تۇردە اتاپ ءوتۋدى ءجون كوردىك. جانە دە اتاپ وتۋدە بىزدەگى ءىرى ۇجىمداردىڭ ىشىنەن نۇرعيسا تىلەنديەۆ اتىنداعى «وتىرار سازى» وركەسترىنە توقتالدىق. سەبەبى، نۇرعيسا تىلەنديەۆ پەن بيبىگۇل احمەتقىزى ءبىر ءۇيدىڭ ءۇشىنشى-ءتورتىنشى قاباتىندا كورشى تۇرعان. ەكەۋى ونەردە سىرلاس بولعان. سوندىقتان دا بۇگىنگى كەشتى وتىرار سازىمەن وتكىزۋدى ءجون كوردىك.

ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ كوركەمدىك جەتەكشىسى جانە باس ديريجەرى، قازاقستاننىڭ ەڭبەك سىڭىرگەن قايراتكەرى «پاراسات» جانە «قۇرمەت» وردەندەرىنىڭ كاۆالەرى ءدىنزۋحرا تىلەنديەۆا:

– بۇگىنگى تولىق كونتسەرت جيىرما شىعارمادان تۇرادى. ونىڭ كوبىسى بيبىگۇل احمەتقىزىنىڭ رەپەرتۋارىنان الىنعان اندەر. ءبىز ول كىسىمەن ءبىر ۇيدە تۇردىق. اكەم بيبىگۇل احمەتقىزىمەن ونەردە بىرگە كوپ جۇمىس ىستەدى، اكەمنىڭ كوپتەگەن اندەرىن ءبىرىنشى بولىپ ورىندادى. ونىڭ ىشىندە "كەل ەركەم الاتاۋىما", "جان جارىم", "جان ساۋلەم" اندەرى بار. كونتسەرتكە ءبىز ءبىراز ۋاقىت دايىندالدىق. بۇگىنگى كونتسەرتتىڭ باعدارلاماسىن دايىنداۋدا دا سوعان قاراپ ويلاستىردىم. باعدارلاماداعى شىعارمالاردىڭ كوپشىلىگىن وركەسترگە اكەم ءوزى جازىپ كەتكەن، جانە ودان بولەك بيبىگۇل احمەتقىزىنىڭ تىكەلەي شاكىرتى بولماسا دا، ءىزىن باسىپ كەلە جاتقان جاڭا انشىلەر جاڭا كومپوزيتورلاردىڭ اندەرى دە ورىندالدى.

كونتسەرتتىك باعدارلامادا قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ كاۆالەرى جالعاسبەك بەگەندىكوۆ پەن حالىقارالىق كونكۋرستاردىڭ لاۋرەاتى ابىلقايىرحان بەيسەكوۆتىڭ ديريجەرلىك ەتۋىمەن بيبىگۇل تولەگەنوۆانىڭ رەپەرتۋارىنداعى حالىق ءانى «گاۋھارتاس»، «جان جارىم»، «ماما» اتتى ۇزدىك شىعارمالارى مەن بار قازاققا تانىمال ەۆگەني برۋسيلوۆسكيدىڭ «قىز جىبەك» وپەراسىنان «گاككۋ» ت.ب. اندەرى ورىندالدى. كەشتە قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ كاۆالەرى گۇلزات داۋىرباەۆا، «ەرەن ەڭبەگى ءۇشىن» مەدالىنىڭ يەگەرى ايگەرىم شارىپبەك، حالىقارالىق كونكۋرستاردىڭ لاۋرەاتتارى فارحات كۋبيەۆ، نۇرعالىم امانباي، اياجان قۋانىشاليەۆا، ايدوس جاباعين، جۇلدىز بايجۇما ونەر كورسەتتى. توقساننىڭ تورقاسىنا شىققان تۇلعا مەرەيتويلىق كونتسەرتتە كورەرمەندەر قاتارىنان تابىلىپ، وزىنە كورسەتىلگەن سىي-قۇرمەتكە ريزاشىلىعىن ءبىلدىردى.

قازاقستان جانە كسرو حالىق ءارتىسى، مەملەكەتتىك سىيلىقتىڭ لاۋرەاتى، سوتسياليستىك ەڭبەك ەرى، بۇلبۇل ءانشى بيبىگۇل احمەتقىزى تولەگەنوۆا:

– بۇگىن مەن باقىتتى اداممىن. ويتكەنى، سىزدەر مەنىمەن بىرگە، مەنىڭ 95 جىلدىعىمدى تويلاۋعا كەلىپ وتىرسىزدار. ارينە، بۇل جاسقا جەتۋدىڭ ءوزى جەڭىل ەمەس. تالاي قيىنشىلىقتار دا بولدى. سىزدەرگە ايتارىم، ەلىمىز امان بولسىن، تىنىشتىق بولسىن. اسپانىمىز اشىق بولىپ، سىرتتاعى جاۋدان ساقتاسىن. قازاق دەگەن – كەڭ حالىق قوي. حالقىمىز امان بولسىن، تىنىشتىق بولسا، قولىمىزدان ءبارى كەلەدى. ۇلكەندەرگە وسىنداي قۇرمەت، جاستارعا جول بولسىن، – دەپ ەلگە اق باتاسىن بەردى.

قازاق ونەرىنىڭ تاريحىندا ۇلت ماقتانىشتارىن ۇنەمى جادىمىزدا ۇستاپ، مادەني مۇرا دەپ ءبىلۋ – مادەني مەكەمەنىڭ باستى ۇستانىمى. وسى ماقساتتا فيلارمونيا قابىرعاسىندا الداعى ۋاقىتتا دا كەرەمەت كەشتەر جالعاسىن تاپپاق.

Abai.kz