ءماجىلىس ەسىرتكى ءوندىرۋ مەن تاراتۋعا قاتىستى قىلمىستىق جاۋاپكەرشىلىك تۋرالى زاڭدى قارادى.

زاڭدا ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن ءوندىرۋ مەن ولاردى ساتۋدى اجىراتۋدىڭ جاڭا ءتارتىبى بەلگىلەنگەن. ەسىرتكى قۇرالدارىن زاڭسىز ساتىپ الۋ، ساقتاۋ، تاسىمالداۋ، ساتۋ ماقساتىمەن جىبەرۋ نەمەسە وتكىزۋ بۇرىنعىداي قىلمىستىق كودەكستىڭ 297-بابىمەن رەتتەلەدى. بۇل باپ بويىنشا جازا سارالاۋشى بەلگىلەرگە بايلانىستى وزگەرىپ وتىرادى. مىسالى، لاۋازىمدى ادامنىڭ قىزمەتتىك جاعدايىن پايدالانا وتىرىپ جاساعان مۇنداي ارەكەتتەرى ءۇشىن ون بەس جىلدان جيىرما جىلعا دەيىنگى مەرزىمگە (بۇرىن 10 جىلدان 15 جىلعا دەيىن بولعان) باس بوستاندىعىنان ايىرۋ قاۋپى بار.

ەسىرتكىنى تاراتقانى ءۇشىن جاۋاپكەرشىلىكتى كۇشەيتۋ ماقساتىمەن قر قك 301-بابى مۇلىكتى تاركىلەۋ تۇرىندەگى قوسىمشا سانكتسيامەن تولىقتىرىلدى. قىلمىستىق كودەكس كۇشتى اسەر ەتەتىن زاتتار مەن پرەكۋرسورلاردىڭ زاڭسىز اينالىمى ءۇشىن جاۋاپكەرشىلىكتى (301-باپ), سونداي-اق وسىنداي زاتتار مەن پرەكۋرسورلاردى قولدانۋ ەرەجەلەرىن ساقتاۋ مىندەتى جۇكتەلگەن تۇلعالاردىڭ بۇل ەرەجەلەردى بۇزعانى ءۇشىن جاۋاپكەرشىلىكتى (303-باپ) كوزدەيتىن نورمالارمەن تولىقتىرىلدى.

Abai.kz