ۇلتتىق مۋزەي بازاسىندا رەستاۆراتسيا ورتالىعى قۇرىلادى
بۇگىن، 4 جەلتوقساندا مادەنيەت جانە اقپارات ءمينيسترى ايدا بالاەۆا يتاليا دەلەگاتسياسىمەن كەزدەسۋ وتكىزدى. دەلەگاتسيا قۇرامىندا يتاليا مادەنيەت مينيسترلىگىنىڭ ورتالىق رەستاۆراتسيا ينستيتۋتىنىڭ ديرەكتورى وليۆا لۋيدجي، قازاقستان رەسپۋبليكاسىنداعى يتاليا ەلشىسى البەرتي ماركو جانە يتاليانىڭ مادەني-اعارتۋشىلىق مەكەمەلەرىنىڭ وكىلدەرى بولدى.
كەزدەسۋدە تاراپتار مادەني مۇرانى ساقتاۋ جانە قالپىنا كەلتىرۋ سالاسىنداعى ىنتىماقتاستىق پەرسپەكتيۆالارىن تالقىلادى. اتاپ ايتقاندا، قر ۇلتتىق مۋزەيى بازاسىندا رەستاۆراتسيا ورتالىعىن قۇرۋ جايى ايتىلدى. مينيستر بۇل ورتالىقتىڭ رەستاۆراتسيالىق قىزمەتتىڭ دامۋى مەن ۇلتتىق مۇرانى ساقتاۋعا ىقپال ەتەتىن ىنتىماقتاستىقتىڭ نەگىزگى باعىتى بولاتىنىن اتاپ ءوتتى. ايدا بالاەۆا وسى سالاداعى تاجىريبە الماسۋدىڭ ماڭىزىنا توقتالىپ، يتاليانىڭ تاجىريبەسى مۋزەي ءىسىن، اسىرەسە رەستاۆراتسيا باعىتىن دامىتۋعا ەلەۋلى ۇلەس قوساتىنىن ايتتى.
«بۇگىنگى تاڭدا قازاقستان مەن يتاليا اراسىنداعى قارىم-قاتىناس جاڭا جوعارى دەڭگەيگە كوتەرىلدى. بىرلەسىپ اتقارىلعان جۇمىستار ءۇشىن العىس بىلدىرەمىن. بۇل ەكى ەل اراسىنداعى بەرىك بايلانىستى كورسەتەدى. ىنتىماقتاستىقتىڭ نەگىزگى باعىتتارىنىڭ ءبىرى – قر ۇلتتىق مۋزەيىنىڭ بازاسىندا رەستاۆراتسيا ورتالىعىن قۇرۋ. بۇل وسى سالانىڭ دامۋىنا جاسالعان ماڭىزدى قادام دەپ بىلەمىز. ەلىمىزدىڭ باي تاريحي-مادەني مۇراسىن بولاشاق ۇرپاق ءۇشىن ساقتاۋ – ءبىزدىڭ بورىشىمىز. رەستاۆراتسيا ءبىز ءۇشىن بارلىق باعىتتا ماڭىزدى. قازاقستاندا رەستاۆراتسيا ورتالىعىنىڭ تابىستى جۇمىس ىستەۋى ءۇشىن ءتيىستى نورماتيۆتىك-قۇقىقتىق بازا جاساۋ قاجەت. ۇلتتىق مۋزەي پراكتيكالىق داعدىلاردىڭ ورتالىعىنا اينالۋى ءتيىس. مۋزەيدە قالپىنا كەلتىرۋدى قاجەت ەتەتىن قىزىقتى ارتەفاكتىلەر مەن ەكسپوناتتار بار. ءبىز بۇل ىسپەن كاسىبي ماماندار اينالىسۋىن جانە ءوز تاجىريبەلەرىن شاكىرتتەرگە جەتكىزگەنىن قالايمىز. سىزدەردىڭ ۇسىنىستارىڭىز قازاقستانداعى مۋزەي ءىسىنىڭ دامۋىنا ۇلكەن اسەر ەتەدى. وسى باعىتتا قازاقستانعا شىن نيەتپەن كومەكتەسۋگە دەگەن قىزىعۋشىلىقتارىڭىز بەن ۇمتىلىستارىڭىز ءۇشىن العىس ايتامىن. بۇل جوبا ءبىزدىڭ ورتاق تاريحىمىزدىڭ كەلەسى بەتى بولاتىنىنا سەنەمىن»، – دەدى ايدا بالاەۆا.
كەزدەسۋ بارىسىندا تەوريالىق جانە پراكتيكالىق دايىندىقتى قامتيتىن باعدارلامالار ازىرلەۋ مۇمكىندىگى دە قاراستىرىلدى. قازاقستاندىق رەستاۆراتورلاردى يتاليان ورتالىقتارىندا وقىتۋعا باسا نازار اۋدارىلدى. بۇل تاجىريبە الماسۋ مەن تاعىلىمدامالاردى ۇيىمداستىرۋعا مۇمكىندىك بەرەدى. لۋيدجي وليۆا يتاليانىڭ رەستاۆراتسيا سالاسىنداعى جەتىستىكتەرىن تانىستىرىپ، قازاقستاندىق مامانداردى دايارلاۋ ىسىندە ىنتىماقتاستىققا دايىن ەكەنىن جەتكىزدى.
«ءبىز ءتۇرلى باعىتتاردى دامىتىپ، قازاقستانمەن تىعىز ىنتىماقتاسقىمىز كەلەدى. يتالياداعى ورتالىق رەستاۆراتسيا ينستيتۋتى 80 جىلدان بەرى جۇمىس ىستەپ كەلەدى جانە كوپتەگەن باعىتتى قامتيدى. قازاقستاندا تولىق جابدىقتالعان رەستاۆراتسيا ورتالىعىن قۇرۋ قاجەت. ءبىزدىڭ ينستيتۋت ءۇش نەگىزگى باعىتقا باسا نازار اۋدارادى: مادەني مۇرانى ساقتاۋ، عىلىمي زەرتتەۋلەر جۇرگىزۋ جانە مامانداردى وقىتۋ. ءبىز ۇلتتىق مۋزەيدى جانە ونداعى زەرتحانالاردى ارالاپ كوردىك. كونسەرۆاتسيا جانە قالپىنا كەلتىرۋ قىزمەتىمەن، شەبەرحانالارمەن جانە مۋزەي ەكسپوزيتسياسىمەن تانىستىق. سىزدەردە جۇمىس ءۇشىن كەڭ عيماراتتاردىڭ بولۋى – ۇلكەن ارتىقشىلىق. ءبىز بۇل سالانى دامىتۋعا، كۋرستار مەن تاجىريبەلەر ۇيىمداستىرۋعا، سونداي-اق جاڭا تەحنولوگيالار مەن ادىستەردى ەنگىزۋگە ءاردايىم كومەكتەسۋگە دايىنبىز»، – دەدى ول.
تاراپتار مادەني مۇرانى ساقتاۋ ماسەلەلەرى بويىنشا تاجىريبە الماسۋ مۇمكىندىگىن تالقىلاپ، ورتالىق ءۇشىن نورماتيۆتىك بازا قۇرۋ جانە رەستاۆراتورلاردى وقىتۋعا باعىتتالعان ءبىلىم بەرۋ باعدارلامالارىن دايىنداۋ بويىنشا بىرلەسكەن جۇمىس تۋرالى ۋاعدالاستى.
ايدا بالاەۆا مەن لۋيدجي وليۆا بىرلەسكەن ىنتىماقتاستىق ۇزاق مەرزىمدى ناتيجەلەر بەرىپ، قازاقستان مەن يتاليا اراسىنداعى دوستىق پەن ءوزارا تۇسىنىستىكتى نىعايتۋعا ماڭىزدى ۇلەس قوساتىنىنا سەنىم ءبىلدىردى.
Abai.kz
