استانادا ۋاكىلەتتى ورگاندار اكىمدىكپەن بىرلەسىپ، اسىرەسە جاستار اراسىندا ەسىرتكى قىلمىسىنا قارسى بەلسەندى كۇرەس جۇرگىزۋدە. جىل باسىنان بەرى قالادا 400-دەن استام ەسىرتكى قىلمىسى تىركەلدى.

بۇل تۋرالى كوممۋنيكاتسيالار قىزمەتىندە وتكەن بريفينگتە استانا قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ اعا جەدەل ۋاكىلى ءاليا قيباتقىزى ايتتى، دەپ حابارلايدى قالالىق اكىمدىكتىڭ رەسمي سايتى.

2024 جىلدىڭ 11 ايىندا استانادا 407 ەسىرتكى قىلمىسى تىركەلگەن، سونىڭ ىشىندە 285 وتكىزۋ فاكتىسى، سونداي-اق ەسىرتكىنىڭ سينتەتيكالىق تۇرلەرىمەن بايلانىستى 621 ەسىرتكى قۇقىق بۇزۋشىلىق.

زاڭسىز اينالىمنان 339 كەلى ەسىرتكى زاتتارى، سونىڭ ىشىندە 20,8 كەلى «سينتەتيكا» تاركىلەندى.

«ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان رەسپۋبليكالىق كەشەندى جوسپارى جانە مەملەكەتتىك ورگاندار مەن جۇرتشىلىق بارىنشا تارتىلعان «استانا – ەسىرتكىسىز قالا 2023-2025 جىلدارعا ارنالعان» باعدارلاماسى ىسكە اسىرىلۋدا. ونىڭ اياسىندا ۋاكىلەتتى ورگاندارمەن ناشاقورلىقتىڭ الدىن الۋعا جانە ەسىرتكىنىڭ زاڭسىز اينالىمى سالاسىنداعى قىلمىستاردى انىقتاۋعا باعىتتالعان بىرقاتار ءىس-شارا جۇرگىزىلۋدە»، - دەدى سپيكەر.

مەملەكەتتىك ورگاندارمەن جانە ۇەۇ-مەن بىرلەسىپ قۇقىق قورعاۋ ورگاندارى 496 الدىن الۋ ءىس-شارالارىن، سونىڭ ىشىندە اكتسيالار، سەمينارلار، دارىستەر، دوڭگەلەك ۇستەلدەر، كەزدەسۋلەر، سپورتتىق تۋرنيرلەر، كونكۋرستار وتكىزدى.

Abai.kz