الەۋمەتتىك مەديتسينالىق ساقتاندىرۋ قورى 2025 جىلعا ارنالعان مەديتسينالىق قىزمەتتەر كولەمىن ورنالاستىرۋ ءراسىمىن باستادى. 27 قاراشادا اشىلعان پورتال ارقىلى كەز كەلگەن ايماق ءوتىنىش بەرە الادى.

ساقتاندىرۋ قورىنىڭ مالىمەتىنشە، مەديتسينالىق قىزمەت كولەمىن بولۋگە مەملەكەتتىك جانە جەكە مەديتسينالىق ۇيىمدار قاتىسا الادى. بىراق ولار تمككك جانە ءمامس جۇيەسى اياسىندا مەديتسينالىق كومەك كورسەتۋ ءۇشىن دەنساۋلىق ساقتاۋ سۋبەكتىلەرىنىڭ دەرەكقورىندا تىركەلۋى ءتيىس. سونداي-اق، قىزمەتتەردى ساتىپ الۋ ەرەجەلەرىنىڭ 37-1-بابىنىڭ 1-تارماعىندا كورسەتىلگەن تالاپتارعا سايكەس بولۋى قاجەت.

- وتىنىمدەردى قابىلداۋ كەزەڭىنەن كەيىن كوميسسيا مۇشەلەرى 10 كۇن ىشىندە ۇسىنىلعان قۇجاتتاردىڭ مەديتسينالىق كومەك كولەمدەرىن ورنالاستىرۋ تالاپتارىنا سايكەستىگىن تەكسەرەدى. ناتيجەسىندە دەنساۋلىق ساقتاۋ سۋبەكتىسىنىڭ تالاپتارعا سايكەس نەمەسە سايكەس ەمەستىگى تۋرالى حاتتاما جاسالادى. ەگەر قانداي دا ءبىر ەسكەرتۋلەر انىقتالسا، كلينيكالارعا ولاردى تۇزەتۋ ءۇشىن 3 جۇمىس كۇنى بەرىلەدى. بۇدان سوڭ وتىنىمدەر قايتا قارالىپ، مەديتسينالىق قىزمەت كولەمدەرى كوميسسيا ارقىلى بولىنەدى، – دەدى الەۋمەتتىك مەديتسينالىق ساقتاندىرۋ قورى باسقارما توراعاسىنىڭ ورىنباسارى سۆەتلانا پونومارەۆا.

باسقارما توراعاسىنىڭ ورىنباسارى 2025 جىلعا ەنگىزىلگەن نەگىزگى جاڭالىقتاردى اتاپ ءوتتى. ەندى مەديتسينالىق قىزمەت كولەمدەرىن ءبولۋ كەزىندە ۇزاق مەرزىمدى كەلىسىمشارتتار جاسالاتىن سۋبەكتىلەرگە باسىمدىق بەرىلەدى. ول ءۇشىن مەديتسينالىق ۇيىمدار:

قور بازاسىندا تىركەلگەن بولۋى;

سوڭعى 5 جىل بويى «ستاتسيونار جاعدايىندا مامانداندىرىلعان مەديتسينالىق كومەك» ءتۇرى بويىنشا ۇزدىكسىز قىزمەت كورسەتۋ تاجىريبەسىنە يە بولۋى;

دەنساۋلىق ساقتاۋ سالاسىندا جوعارى نەمەسە 1-ساناتتاعى اككرەديتاتسيا كۋالىگىنە يە بولۋى;

بانكروتتىق نەمەسە تاراتىلۋ راسىمدەرىنە قاتىسپاۋى ءتيىس.

سونىمەن قاتار، دەنساۋلىق ساقتاۋ سۋبەكتىلەرىن ىرىكتەۋ راسىمىنە وزگەرىستەر ەنگىزىلدى. بۇل كەلەسى قىزمەت تۇرلەرىنە قاتىستى:

قان ورتالىقتارى – قان الۋ، ساقتاۋ جانە جەتكىزۋ قىزمەتتەرى.

جەدەل جاردەم مەن سانيتارلىق اۆياتسيا – شۇعىل كومەك كورسەتۋ جانە ناۋقاستاردى تاسىمالداۋ.

ايتۆ جۇقتىرعان ادامدارعا كومەك – ەمدەۋ، كەڭەس بەرۋ جانە الەۋمەتتىك قولداۋ.

تۋبەركۋلەزبەن اۋىراتىندارعا كومەك – ەمدەۋ، وڭالتۋ جانە الەۋمەتتىك قولداۋ.

پسيحيكالىق اۋرۋلارى بار ادامدارعا كومەك – ەمدەۋ، پسيحولوگيالىق قولداۋ جانە وڭالتۋ.

قور جاڭا مەديتسينالىق سۋبەكتىلەردى جانە جاڭا مەديتسينالىق كومەك تۇرلەرى بويىنشا ءوتىنىم بەرگەن ۇيىمداردى ساپالى ىرىكتەۋ ءۇشىن ايماقتىق كوميسسيا مۇشەلەرىنىڭ ولاردى تىكەلەي ارالاپ تەكسەرەتىنىن حابارلادى. بۇل وزگەرىستەر مەديتسينالىق قىزمەت ساپاسىن جاقسارتۋ جانە ناۋقاستارعا ءتيىمدى كومەك كورسەتۋ ءۇشىن جاسالىپ وتىر.

ايتا كەتەيىك 2025 جىلعا ارنالعان مەديتسينالىق قىزمەتتەردى ساتىپ الۋ جوسپارىنا سايكەس ەكى پاكەت بويىنشا 2,9 تريلليون تەڭگەدەن استام قاراجات قاراستىرىلعان، ونىڭ 1,3 تريلليون تەڭگەدەن استامى – ءمامس بويىنشا كورسەتىلەدى.

Abai.kz