جەتىسۋ وبلىسىندا الەۋمەتتىك وسال توپتار ساناتىنداعى 57 وتباسى  باسپانالى بولدى. اتاپ ايتقاندا، تالدىقورعاندا 37 جاڭا پاتەردىڭ، سارقان قالاسىندا 20 جەكە تۇرعىن ءۇيدىڭ كىلتتەرى تاپسىرىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى. 

سارقان اۋدانى اكىمدىگىنىڭ حابارلاۋىنشا، اۋدان ورتالىعىندا باسپانا سالۋ ماسەلەسىنە سوڭعى جىلدارى باسا نازار اۋدارىلىپ، اۋقىمدى جۇمىستار اتقارىلۋدا.

- 2022 جىلى تۇرعىن ءۇي كەزەگىندە تۇرعان ازاماتتار ءۇشىن 5 قاباتتى 50 پاتەرلى ءۇي، وتكەن جىلى «بولاشاق» شاعىن اۋدانىندا ەكى قاباتتى 20 پاتەرلى تۇرعىن ءۇي قولدانىسقا بەرىلدى. بۇعان قوسا، اۋداننىڭ الەۋمەتتىك وسال توپتاعى ازاماتتارى ءۇشىن 24 تۇرعىن ءۇي ساتىپ الىنىپ، بەرىلدى. بۇگىن 20 ءۇيدىڭ كىلتى تاپسىرىلسا، بۇدان بولەك، جاقىن ارادا وسى تيپتەگى 30 تۇرعىن ءۇيدىڭ قۇرىلىسى اياقتالىپ، قولدانىسقا بەرىلەدى، - دەيدى سارقان اۋدانىنىڭ تۇرعىن ءۇي-كوممۋنالدىق شارۋاشىلىعى، اۆتوموبيل جولدارى، جولاۋشىلار كولىگى جانە تۇرعىن ءۇي ينسپەكتسياسى ءبولىمىنىڭ باسشىسى اسەت قاناپيانوۆ.

وسى كۇنى جاڭا ۇيگە يە بولعاندار قاتارىندا جەتىم بالالار، مۇگەدەكتىگى بار بالانى تاربيەلەۋشى وتباسىلار، مۇگەدەكتىگى بار ازاماتتار، كوپ بالالى انالار، تولىق ەمەس وتباسىلار، ۇلى وتان سوعىسىنىڭ ارداگەرلەرىنە تەڭەستىرىلگەندەر بار.

سارقاندىق كوپ بالالى انا تولقىن مانتەكوۆا قونىستوي قۋانىشىنا كەنەلگەندەردىڭ ءبىرى.

- تۇرعىن ءۇي كەزەگىنە 2019 جىلى كوپ بالالى انا رەتىندە تۇرعانمىن. بۇگىن جاڭا جىل قارساڭىندا ارمانىمىزعا جەتىپ، ءۇيلى بولدىق. مەملەكەت تاراپىنان بەرىلگەن ءۇي كەڭ، جايلى، قولايلى. باسپانالى بولعانىمىزعا اسىرەسە بالالارىم ەرەكشە قۋانىپ جاتىر، - دەيدى.

وبلىس ورتالىعى تالدىقورعان قالاسىنداعى «قۇلاگەر» شاعىن اۋدانىنان جاڭا پاتەرگە يە بولعان جانار بولاتبەكوۆا دا وي ءبولىستى.

 - بۇگىن كوپتەن كۇتكەن پاتەرىمىزدى الدىق. مۇگەدەكتىگى بار بالامىزدىڭ دەنساۋلىق جاعدايىنا قولايلى جاڭا پاتەرگە يە بولعانىمىزعا قۋانىشتىمىز. كەزەكتە 10 جىلدان اسا ۋاقىت تۇرىپ، وسى كۇندى كۇتتىك. سول كۇنگە دە جەتتىك، راقمەت، - دەدى ج. بولاتبەكوۆا.

جالپى جەتىسۋ وبلىسىندا بيىل تۇرعىن ءۇي قۇرىلىسىنا 7,6 ملرد. تەڭگە ءبولىندى. بۇل قارجى 56 كوپ قاباتتى مەن 214 جەكە تۇرعىن ءۇي سالۋعا باعىتتالدى. بۇدان بولەك، حالىقتىڭ الەۋمەتتىك وسال توپتارى ءۇشىن 866 پاتەر ساتىپ الىندى، وعان 15,9 ملرد. تەڭگە ءبولىندى

Abai.kz