كولساي كولدەرى اۋماعىندا تازالىق جانە ەكولوگيالىق نورمالاردى ساقتاۋ بويىنشا كەشەندى جۇمىستار جاسالۋدا. بۇل تۋرالى «كولساي كولدەرى» مۇتپ اكىمشىلىگىنەن حابارلادى.

ايتا كەتەيىك، الەۋمەتتىك جەلىدە بالىق اۋلاۋشىلاردان كول بەتىندە قالعان قوقىس تۋرالى ۆيدەو تاراعان ەدى.

ۇلتتىق پارك اكىمشىلىگىنىڭ حابارلاۋىنشا ۆيدەو تاراعان كەزدە كول اۋماعىندا قوقىستان تازالاۋ بويىنشا كەشەندى جۇمىستار جۇرگىزىلىپ جاتقان. ۇلتتىق پارك اۋماعىندا كەلۋشىلەرگە تازالىق ساقتاۋ مەن تابيعات ەرەجەلەرى تۋرالى اقپارات ۇدايى بەرىلەدى. سونداي-اق، تازالىق جۇمىستارى تۇراقتى جۇرگىزىلەدى. مىسالى، 2024 جىلدىڭ قاڭتار-قىركۇيەك ايلارىندا كولساي كولدەرى اۋماعىنان 80 توننا قاتتى تۇرمىستىق قالدىق شىعارىلعان.

ال ۆيدەونى ءتۇسىرىپ، تابيعاتقا جاناشىرلىق تانىتقان ازاماتقا العىس بىلدىرگەن ۇلتتىق پارك اكىمشىلىگى قوقىس پەن بالىق اۋلاۋشىلار مەن دەمالۋشىلار قالدىرعان قالدىقتار سول كۇنى-اق تولىقتاي تازالانعانىن حابارلادى. سونداي-اق، تازالىق ەرەجەلەرىن بۇزعان بالىق اۋلاۋشىلارعا اكىمشىلىك جاۋاپكەرشىلىك تۋرالى ەسكەرتىلىپ،  ۇلتتىق پارك اۋماعىندا ەكولوگيالىق نورمالاردى قاتاڭ ساقتاۋ تۋرالى اقپارات بەرىلگەن.

«مەرەكە جانە دەمالىس كۇندەرى بالىق اۋلاۋشىلار مەن تۋريستەر سانى ايتارلىقتاي وسەدى. بۇل كۇندەرى ۇلتتىق پارك قىزمەتكەرلەرى كۇشەيتىلگەن جۇمىسقا كوشىپ، تازالىق پەن ءتارتىپتى ساقتاۋ شارالارىن قامتاماسىز ەتۋگە تىرىسادى. الايدا وكىنىشكە قاراي، تابيعاتقا جاناشىرلىقپەن قارامايتىن ادامدار دا ءجيى كەزدەسەدى. ۇلتتىق پارك اۋماعىنا كەلۋشىلەرگە بۇل تەك دەمالىس اۋماعى عانا ەمەس، تابيعي بايلىعىمىز ەكەنىن سەزىنىپ، جاۋاپكەرشىلىكپەن قاراۋىن سۇرايمىز»، - دەيدى ۇلتتىق پاركتە.

قازىرگى كەزدە كولساي كولدەرى اۋماعىندا باقىلاۋ كۇشەيتىلىپ، ينسپەكتورلار مەن ۇلتتىق پارك قىزمەتكەرلەرىنىڭ سانى كوبەيتىلگەن. ءاربىر ەكى ساعات سايىن رەيد وتكىزىلەدى.

كول اۋماعىندا كەلۋشىلەرگە زاڭسىز بالىق اۋلاۋعا تيىم سالىنعانى، ەرەجە بۇزۋشىلىق ءۇشىن ايىپپۇل قاراستىرىلعانى، تازالىق ساقتاۋ تۋرالى اقپارات بەرىلىپ، ەسكەرتۋ جاسالادى. ال جاناشىر ازاماتتاردى ەكولوگيالىق مادەنيەتتى قالىپتاستىرۋ باعىتىندا بىرگە جۇمىس ىستەۋگە شاقىرادى.

«ءبىز بۇل باعىتتا ەرىكتىلەرمەن، بلوگەرلەرمەن، تابيعاتقا جاناشىر ازاماتتارمەن تۇراقتى تۇردە ەكولوگيالىق اكتسيا، ءىس-شارالار وتكىزىپ، ەكولوگيالىق مادەنيەتتى قالىپتاستىرۋ باعىتىندا حالىققا اقپارات جەتكىزگىمىز كەلەدى. ويتكەنى كولساي كولدەرى سىندى تابيعي بايلىقتى ساقتاۋدىڭ ماڭىزدىلىعىن ەڭ ءبىرىنشى كەزەكتە قوعام تۇسىنسە دەيمىز. تابيعاتتى قورعاۋ ىسىندە جاناشىر ازاماتتار اتسالىسىپ، ءبىزدىڭ سەرىكتەس، قولداۋشىلارىمىزدىڭ قاتارىندا بولۋعا شاقىرامىز»، - دەيدى مۇتپ اكىمشىلىگى.

ايتا كەتەيىك، 2024 جىلى الماتى وبلىسى ءتۋريزمنىڭ قارقىندى دامۋى بويىنشا رەكوردتىق كورسەتكىشتەرگە قول جەتكىزدى. قاڭتار مەن قازان ارالىعىندا ايماققا 1,6 ميلليون تۋريست كەلگەن. ونىڭ ىشىندە «كولساي كولدەرى» تۋريستەر ەڭ كوپ كەلگەن نىسانداردىڭ ءبىرى. مۇندا 2024 جىلى 394 903 دەمالۋشى كەلگەن. بۇل كورسەتكىشتەر ەلىمىزدە ىشكى تۋريزم دامىپ، تۋريستەر كوبەيگەنىن كورسەتەدى، الايدا سونىمەن قاتار، ەكولوگيالىق مادەنيەتتى ارتتىرۋ قاجەتتىلىگى بايقالادى.

Abai.kz